ပြည်ထောင်စုသမ္မတမြန်မာနိုင်ငံတော်ဖွဲ့စည်းပုံအခြေခံဥပဒေ (၂၀၀၈ခုနှစ်) ပြင်ဆင်ရေးလုပ်ငန်းများကို ဆောလျင်စွာ ဆောင်ရွက်နိုင်ရေးအတွက် ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီတစ်ရပ်ကို သင့်လျော်သည့် ပြည်ထောင်စုလွှတ်တော် ကိုယ်စားလှယ်များနှင့် ဖွဲ့စည်းရန်ပြည်ထောင်စုလွှတ်တော် သို့ တိုက်တွန်းကြောင်း အရေးကြီးအဆိုကို ပြည်ထောင်စုလွှတ်တော်က အတည်ပြုလိုက်ပါတယ်။အရေးကြီးအဆိုနဲ့ပတ်သက်ပြီး ဖေဖော်ဝါရီလ (၆)ရက်က ပြုလုပ်ခဲ့တဲ့ ဒုတိယအကြိမ် ပြည်ထောင်စုလွှတ်တော် (၁၁)ကြိမ်မြောက် ပုံမှန်အစည်းအဝေးမှာ   ပြည်ထောင်စုလွှတ်တော် ဒုတိယနာယက ဦးထွန်းထွန်းဟိန် က ပြန်လည်ရှင်းလင်းဆွေးနွေးခြင်းနှင့် လွှတ်တော်ရဲ့ အဆုံးအဖြတ်ရယူခြင်းတွေ ဆောင်ရွက်ခဲ့ပါတယ်။

ပြည်ထောင်စုလွှတ်တော် ဒုတိယနာယက ဦးထွန်းထွန်းဟိန်က အဆိုနဲ့ပတ်သက်ပြီး ပြန်လည်ရှင်းလင်းဆွေးနွေးရာမှာ အဆိုဟာ ဖွဲ့စည်းပုံအခြေခံဥပဒေပြင်ဆင်ရေးအတွက် အားလုံးပူးပေါင်းပါဝင်ပြီး သဘောတူညီမှုရရှိတဲ့ ဥပဒေကြမ်းတစ်ခုရရှိသည်အထိ အဆင့်ဆင့် ဆောင်ရွက်သင့်တဲ့ ကိစ္စများကို အစပြုနိုင်ရန် ရည်ရွယ်တင်သွင်းခြင်းဖြစ်ပြီး အဆိုကို အတည်ပြုပေးနိုင်ဖို့တင်ပြခဲ့ပါတယ်။အဲဒီနောက် အဆိုရှင် ဖြစ်တဲ့ မကွေးတိုင်းဒေသကြီး မဲဆန္ဒနယ် အမှတ်(၄)မှ အမျိုးသားလွှတ်တော်ကိုယ်စားလှယ် ဦးအောင်ကြည်ညွန့် က အတည်ပြုပေးဖို့ တင်ပြခဲ့ပေမယ့် အဆိုကို ထောက်ခံခြင်းတွေ၊ ကန့်ကွက်ခြင်းတွေ နဲ့အကြံပြုခြင်းတွေရှိခဲ့တာကြောင့် လွှတ်တော်ရဲ့ အဆုံးအဖြတ်ရယူခဲ့ပါတယ်။ လွှတ်တော်ရဲ့ အဆုံး အဖြတ်ရယူရာမှာတော့ဆန္ဒမဲပေးခွင့်ရှိသူပေါင်း(၆၂၁) ဦးအနက် အဆိုကို ထောက်ခံဆန္ဒမဲပေါင်း (၄၁၄)ဦး၊ ကန့်ကွက်ဆန္ဒမဲပေါင်း (၁၉၁)ဦးနဲ့ ကြားနေဆန္ဒမဲပေါင်း (၆)ရှိခဲ့ပြီး ထောက်ခံဆန္ဒမဲပေါင်းက ပိုမိုများပြားခဲ့တာကြောင့် အဆိုကိုအတည်ပြုလိုက်တာပါ။

ယခုအဆိုကို အတည်ပြုလိုက်တဲ့အတွက် ပြည်ထောင်စုသမ္မတမြန်မာနိုင်ငံတော်ဖွဲ့စည်းပုံ အခြေခံဥပဒေ (၂၀၀၈)ခုနှစ် ပြင်ဆင်ရေးပူးပေါင်းကော်မတီတစ်ရပ်ကို ပြည်သူ့လွှတ်တော်နှင့် အမျိုးသား လွှတ်တော် တို့မှ ကိုယ်စားလှယ်ဦးရေ တူညီမျှတစွာ သင့်လျှော်သော အရေအတွက်နဲ့ ဖွဲ့စည်းသွားမယ်လို့ သိရပါတယ်။ ဒါ့အပြင် အဆိုပါပူးပေါင်းကော်မတီရဲ့ ဥက္ကဋ္ဌအဖြစ် ပြည်ထောင်စုလွှတ်တော် ဒုတိယနာယက ဦးထွန်းထွန်းဟိန်ကို တာဝန်ပေးအပ်သွားမှာဖြစ်ပြီး လွှတ်တော်အတွင်းရှိ နိုင်ငံရေးပါတီအသီးသီးနှင့်တပ်မတော်သား လွှတ်တော်ကိုယ်စားလှယ်များ အစုအဖွဲ့တို့မှ ကိုယ်စားလှယ်အရေအတွက်အချိုးကျပါဝင်ဖွဲ့စည်းသွားမယ်လို့ သိရပါတယ်။အရေးကြီးအဆိုကို ဇန်န၀ါရီလ(၂၉)ရက်က ပြုလုပ်ခဲ့တဲ့ ဒုတိယအကြိမ် ပြည်ထောင်စုလွှတ်တော် (၁၁)ကြိမ်မြောက် ပုံမှန်အစည်းအဝေးမှာ အမျိုးသားလွှတ်တော် ကိုယ်စားလှယ် ဦးအောင်ကြည်ညွန့် ကတင်သွင်းခဲ့တာဖြစ်ပြီး ဖေဖော်ဝါရီလ(၅)ရက်က ပြုလုပ်ခဲ့တဲ့ ပြည်ထောင်စုလွှတ်တော်အစည်းအဝေးမှာတော့ လွှတ်တော်ကိုယ်စားလှယ် (၃၀) ဦးကဆွေးနွေးမှုတွေပြုလုပ်ခဲ့ပါတယ်။

 

 

Related News