အခု စစ်တမ်းကိုတော့ ရွေးကောက်ပွဲဆိုင်ရာ ပြည်သူ့လှုပ်ရှားမှုအဖွဲ့ (PACE) က ကောက်ယူခဲ့တာဖြစ်ပြီး စက်တင်ဘာ(၂၈)ရက်ထုတ်ပြန်ခဲ့တဲ့  အစိုးရသက်တမ်းဝက် ဆောင်ရွက်ချက်များအပေါ် နိုင်ငံသားများ၏သဘောထားအမြင် စစ်တမ်းမှာ ဖော်ပြထားတာ ဖြစ်ပါတယ်။ စစ်တမ်းမှာ ပါဝင်ဖြေဆိုသူ(၆၀)ရာခိုင်နှုန်းကျော်ဟာ ဒီမိုကရေစီ အပြည့်အ၀ရဖို့ အရေးကြီးတယ်လို့ ဖြေဆိုထားပြီး (၁၈)ရာခိုင်နှုန်းကတော့ မသိရှိကြောင်းဖြေဆိုထားပါတယ်။ ဒီမိုကရေစီ အပြည့်အ၀ရဖို့ အဓိကဆောင်ရွက်ရမယ့်ကိစ္စတွေနဲ့ပတ်သက်ပြီး  ဖြေဆိုသူအများစုက ငြိမ်းချမ်းရေးလို့ ဖြေဆိုကြပါတယ်။ ပညာရေးနဲ့ စီးပွားရေးကိုအဓိကဆောင်ရွက်ရမှာလို့ (၂၀)ရာခိုင်နှုန်း ၀န်းကျင်စီက ဖြေဆိုထားပြီး  (၁၃)ရာခိုင်နှုန်းကတော့ အခြေခံဥပဒေ ပြုပြင်ပြောင်းလဲရေးလို့ ဖြေဆိုထားပါတယ်။ (၂၅)ရာခိုင်နှုန်းကတော့ မသိရှိဘူးလို့ အခုစစ်တမ်းမှာ ဖော်ပြထားပါတယ်။

တစ်ဖက်မှာ နိုင်ငံရေးအပေါ်စိတ်ပါဝင်စားမှုကတော့ လျော့ကျလာကြောင်း အခုစစ်တမ်းက ဖော်ပြထားပါတယ်။ ဖြေဆိုသူတွေရဲ့ (၃၈)ရာခိုင်နှုန်းကသာ နိုင်ငံရေးကို စိတ်ဝင်စားတယ်လို့ဖြေဆိုထားပြီး နိုင်ငံရေးကို မသိရှိသူက ၁၁ရာခိုင်နှုန်းရှိတယ်လို့သိရပါတယ်။ကျန်တဲ့ ၅၀ရာခိုင်နှုန်းထဲမှာ တစ်ဝက်က နိုင်ငံရေးကို လုံးဝ စိတ်မ၀င်စားပဲ ကျန်တဲ့ တစ်ဝက်ကတော့ အတိုင်းအတာတစ်ခုအထိ စိတ်မ၀င်စားဘူးလို့ ဖြေဆိုထားပါတယ်။နိုင်ငံရေးကို စိတ်ဝင်စားကြောင်းဖြေဆိုသူတွေထဲမှာ ၄၃ရာခိုင်နှုန်းက မြို့ပြကဖြစ်ပြီး ၃၅ရာခိုင်နှုန်းက ကျေးလက်နေသူ တွေလို့ဖော်ပြထားပါတယ်။

၂၀၁၅ခုနှစ်တုန်းက စစ်တမ်းမှာတော့ နိုင်ငံရေးကို စိတ်ဝင်စား သူ (၄၃)ရာခိုင်နှုန်းရှိခဲ့ပြီး ၂၀၁၆ ခုနှစ်စစ်တမ်းမှာတော့ (၅၈)ရာခိုင်နှုန်း အထိရှိခဲ့တယ်လို့သိရပါတယ်။ PACE ရဲ့ အခု သဘောထားစစ်တမ်းကိုတော့ ပြီးခဲ့တဲ့မေလအတွင်း တိုင်းနဲ့ပြည်နယ်(၁၄)ခုက မြို့နယ်(၂၁၄)ခု ၊ ကျေးရွာအားဖြင့် (၄၀၀) ကျော်မှာရှိတဲ့ လူဦးရေ ၂၃၀၀ ကျော်ကိုမေးမြန်း ကောက်ယူခဲ့တာလို့ ပြောပါတယ်။ နိုင်ငံတကာစာရင်းအင်းနည်းအရ တွက်ချက်ပြီး ကျပန်းမေးမြန်းထားတာဖြစ်လို့ နိုင်ငံသားအားလုံးရဲ့ သဘောထားနဲ့ကွဲလွဲမှုရှိနိုင်ပြီး အခုစစ်တမ်းဟာ နိုင်ငံအတွက် ပိုပြီးကောင်းမွန်တဲ့ ဆောင်ရွက် ချက်တွေ လုပ်ဆောင်နိုင်ဖို့ရည်ရွယ်တယ်လို့ ဖော်ပြထားပါတယ်။

 

 

Related News