ပြည်ထောင်စုဥပဒေဆိုင်ရာ အထောက်အကူပေးရေးအဖွဲ့ရုံးခန်းကို နေပြည်တော်မှာ မေလ ၁၁ ရက်က စတင်ဖွင့်လှစ်လိုက်တယ်လို့ သိရပါတယ်။ပြည်ထောင်စု ဥပဒေဆိုင်ရာအထောက်အကူပေးရေးအဖွဲ့ကို ပြီးခဲ့တဲ့၂၀၁၇ခုနှစ် နိုဝင်ဘာလ၁၅ရက်က ဥက္ကဋ္ဌအဖြစ် ဦးဥာဏ်ဝင်း အပါအ၀င် အဖွဲ့ဝင် ၁၃ ဦးနဲ့ ဖွဲ့စည်းခဲ့တာပါ။ပြည်ထောင်စုဥပဒေဆိုင်ရာ အထောက်အကူပေးရေးအဖွဲ့ကို ဥပဒေကိစ္စရပ်တွေမှာ မျှတမှု၊ တန်းတူညီမျှမှုစတဲ့ အခွင့်အရေးများရရှိစေဖို့နဲ့ ပြစ်မှုများတွင်ဥပဒေနဲ့အညီ ခုခံချေပခွင့်နှင့် အယူခံပိုင်ခွင့်တို့ကို ဆောင်ရွက်ရာမှာ နိုင်ငံတကာ စံချိန်စံညွှန်းတွေနဲ့ ကိုက်ညီမှုရှိစေဖို့ ဖွဲ့စည်းခဲ့တာလို့ သိရပါတယ်။ ဒါ့အပြင် ပြစ်မှုဆိုင်ရာစုံစမ်းထောက်လှမ်းမှုနဲ့ စုံစမ်းစစ်ဆေးမှုတွေ ပြုလုပ်နေစဉ်ကာလအတွင်း ရဲအချုပ်နဲ့အကျဉ်းထောင်တွေမှာ မလိုလားအပ်တဲ့ဖမ်းဆီးချုပ်နှောင်တဲ့ ကာလတွေလျော့ကျစေရန်နဲ့  ဥပဒေနဲ့မညီတဲ့ဖမ်းဆီးချုပ်နှောင်မှုတွေ ပပျောက်စေရန်အပါအ၀င် အမှုများကိုမှန်မှန်နှင့် မြန်မြန်စီရင်ဆုံးဖြတ်နိုင်ရေးတို့မှာ အထောက်အကူဖြစ်စေဖို့လည်း ရည်ရွယ်ဖွဲ့စည်းခဲ့တာလို့ သိရပါတယ်။

ပြည်ထောင်စုဥပဒေဆိုင်ရာအထောက်အကူပေးရေးအဖွဲ့ရဲ့ ဥက်္ကဋ္ဌဖြစ်တဲ့ ဦးဥာဏ်ဝင်းက ပြည်ထောင်စုဥပဒေဆိုင်ရာ အထောက်အကူပေးရေး အဖွဲ့ဟာ မြန်မာနိုင်ငံမှာ ပထမဆုံး ဖွဲ့စည်းခဲ့တာဖြစ်ပြီး ပြည်သူတွေအနေနဲ့ ဆင်းရဲချမ်းသာမရွေး တရားဥပဒေကိစ်္စတွေမှာ အညီအမျှရစေဖို့ ကူညီပေးသွားမယ်လို့ ပြောပါတယ်။ပြည်ထောင်စုဥပဒေဆိုင်ရာအထောက်အကူပေးရေးအဖွဲ့ရဲ့ရုံးခန်းဖွင်လှစ်တဲ့ အခမ်းအနားကို ပြည်သူ့လွှတ်တော်ဥက္ကဋ္ဌ ဦးတီခွန်မြတ်၊ အမျိုးသားလွှတ်တော်ဥက္ကဋ္ဌ မန်းဝင်ခိုင်သန်းနဲ့ ပြည်ထောင်စုတရားသူကြီးချုပ်ဦးထွန်းထွန်းဦးတို့ အပါအ၀င် တာဝန်ရှိသူတွေတက်ရောက် ဖွင့်လှစ်ခဲ့ကြတာပါ။ ပြည်ထောင်စုဥပဒေဆိုင်ရာအထောက်အကူပေးရေးအဖွဲ့ရဲ့ ရုံးကို နေပြည်တော် အားကစားလေ့ကျင်းရေးစခန်းမှာ ဖွင့်လှစ်ခဲ့တာဖြစ်ပြီး နောက်ပိုင်းမှာ တိုင်းဒေသကြီးနဲ့ပြည်နယ်တွေ အပါအ၀င် မြို့နယ်တွေမှာပါ ရုံးခွဲတွေဖွင့်လှစ်သွားမယ်လို့ သိရပါတယ်။

 

 

Related News