မြေမြှုပ်မိုင်းနင်းမိပြီး မသန်စွမ်းအခြေအနေသို့ရောက်သွားတဲ့ ပြည်သူတွေရဲ့ ဘ၀ ပုံမှန်လည်ပတ်နိုင်ဖို့ ပြန်လည်ထူထောင်ရေး လုပ်ငန်းတွေ ထပ်တိုး လုပ်ဆောင်ပေးရန် လိုအပ်နေတယ်လို့ ဧပြီလ ၄ ရက်ကIBC Centre မှာ ပြုလုပ်တဲ့ မိုင်းအသိပညာပေးနှင့် မိုင်းဆိုင်ရာ လှုပ်ရှား ဆောင်ရွက်မှုများအား ထောက်ပံ့ရေးပွဲမှ သိရပါတယ်။မြန်မာနိုင်ငံမှာ မြေမြှုပ်မိုင်းဒဏ်ခံစားနေရတဲ့ အရပ်သား အရေအတွက် လေးသောင်းကျော်ရှိပြီး ယခုနှစ်အတွင်း မိုင်းဒဏ်ကြောင့် ဒဏ်ရာရသူတွေထဲမှာ ရှမ်းပြည်နယ်၊ ကချင်ပြည်နယ်နဲ့ ရခိုင်ပြည်နယ်၊ မောင်းတောဒေသမှ အရပ်သား (၇၀) ရာခိုင်နှုန်းကျော်ဖြစ်နေတာကြောင့် ၄င်းတို့လုပ်ကိုင်နေတဲ့ တောင်ယာလုပ်ငန်းတွေ ပြန်လည်လုပ်ကိုင်နိုင်ဖို့ ထောက်ပံ့မှု များစွာလိုအပ်နေပါတယ်။

မြေမြှုပ်မိုင်းကြောင့် မသန်စွမ်းဖြစ်သူတွေကို ခြေတုလက်တု တပ်ဆင်ပေးတာနဲ့ အလုပ်အကိုင် အခွင့်အလမ်းရှာပေးတာစတဲ့ ပြန်လည်ထူထောင်ရေးလုပ်ငန်းတွေ လုပ်ဆောင်ပေးနေတဲ့ အရပ်ဖက်အဖွဲ့အစည်းတွေနဲ့ အစိုးရမဟုတ်တဲ့နိုင်ငံတကာအဖွဲ့အစည်းတွေ ရှိပေမယ့် မိုင်းဒဏ်သင့်ဒေသတွေက တစ်နေရာနဲ့တစ်နေရာ ချိတ်ဆက်မှုမရှိပဲ ဝေးလံခေါင်ဖျားတာ၊ စာရင်းအတိအကျမရတာနဲ့ ငွေကြေးမလုံလောက်တာ စတဲ့ အခက်အခဲတွေကြောင့် ဖြန့်ကျက်ကူညီနိုင်မှု အားနည်းနေဆဲဖြစ်ပါတယ်။

မြန်မာနိုင်ငံရဲ့ တိုင်းဒေသကြီး၊ပြည်နယ်ကိုးခုမှာ မပေါက်ကွဲသေးတဲ့ စစ်ကျန်လက်နက်ခဲယမ်းတွေရဲ့ အန္တရာယ်အပြင် မြေမြှုပ်မိုင်းနင်းမိတဲ့ အကျိုးဆက်တွေကို ပြည်သူတွေတိုက်ရိုက်ခံစားနေရပါတယ်။ မိုင်းလုပ်တဲ့ကုန်ကျစရိတ်က တစ်ဒေါ်လာကနေ နှစ်ဒေါ်လာအတွင်းသာရှိပေမယ့် မြေမြှုပ်မိုင်းဒဏ်ခံရတဲ့ ပြည်သူတွေကို ပြန်လည်ထောက်ပံ့ရတဲ့ ကုန်ကျစရိတ်ကတော့ မြင့်မားနေတာကြောင့် မိုင်းတွေကို ဆင်ခြင်သုံးစွဲဖို့ လိုအပ်လာပြီလို့ မိုင်းဆိုင်ရာ လှုပ်ရှားနေတဲ့ အဖွဲ့တွေက ဝေဖန်ပြောဆိုခဲ့ပါတယ်။

လွန်ခဲ့တဲ့ နှစ်ပေါင်း (၄၀) တည်းက စစ်မြေပြင်မှာတာဝန်ထမ်းဆောင်ရင်း မြေမြှုပ်မိုင်းပေါက်ကွဲမှုကြောင့် ခြေတစ်ဖက်ဆုံးရှုံးခဲ့သူ တပ်မတော်အရာရှိတစ်ဦးကတော့ မြေမြှုပ်မိုင်း အသုံးပြုနေမှုအပေါ် သူ့ရဲ့သဘောထားတွေကို အခုလိုပြောပြခဲ့ပါတယ်။မိုင်းဒဏ်သင့်မသန်စွမ်းအရပ်သားတွေကို ပြန်လည်ထူထောင်ရေးလုပ်ငန်းတွေ လုပ်ဆောင်ပေးဖို့ လူမှုဝန်းထမ်း၊ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနက ယခုနှစ်အတွင်း ပြန်လည်ထူထောင်ရေးဦးစီးဌာနကိုဖွဲ့စည်းပြီးလုပ်ငန်းစဉ်တွေ စတင်ဆောင်ရွက်နေပြီလို့ သိရပါတယ်။တစ်ကမ္ဘာလုံးမှာမြေမြှုပ်မိုင်းဒဏ်ခံစားနေရသူတစ်ရက်ကို(၂၃)ဦးရှိပြီးမိုင်းဒဏ်ကြောင့် မသန်စွမ်းဖြစ်သူ တွေထဲမှာ (၄၀) ရာခိုင်နှုန်းကျော်က ကလေးတွေ ဖြစ်တယ်လို့ ကုလသမဂ္ဂ အစီရင်ခံစာကနေ သိရပါတယ်။

 

 

Related News