နိုင်ငံတကာအကြမ်းဖက်မှုတိုက်ဖျက်ရေးအတွက်အာဆီယံနိုင်ငံတွေနဲ့ သြစတြေးလျနိုင်ငံတို့အကြား ပူးပေါင်းဆောင်ရွက်မှု နားလည်မှုစာချွန်လွှာကို မြန်မာပါဝင်လက်မှတ်ရေးထိုးဖို့ ပြည်ထောင်စုလွှတ်တော်ကသဘောတူလိုက်တယ်လို့ သိရပါတယ်။ယခု နားလည်မှု စာချွန်လွှာဟာ နိုင်ငံတကာအကြမ်းဖက်မှုတိုက်ဖျက်ရေး ပူးပေါင်း ဆောင်ရွက်မှု ကိစ်္စတွေ၊ အကြမ်းဖက်သမားတွေရဲ့ သတင်းအချက်အလက်ဖလှယ်တာတွေ အပါအ၀င် အကြမ်းဖက် ခြိမ်းခြောက်မှုတွေကို တိုက်ဖျက်ဖို့ရည်ရွယ်လုပ်ဆောင်ထားတာပါ။

မြန်မာနိုင်ငံအနေနဲ့ ယခုနားလည်မှုစာချွန်လွှာကို လက်မှတ်ရေးထိုး လိုက်ခြင်းအားဖြင့် အကြမ်းဖက်မှုတိုက်ဖျက်ရေးအတွက် ဒေသတွင်းနိုင်ငံတွေနဲ့သာမက နိုင်ငံတကာနဲ့ပါ ပူးပေါင်းဆောင်ရွက်မှုတွေ လုပ်ဆောင်လာနိုင်မယ်လို့ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေက ပြောပါတယ်။နိုင်ငံတော်သမ္မတထံမှ ပေးပို့ထားသော အာဆီယံ- သြစတြေးလျနိုင်ငံတကာ အကြမ်းဖျက်မှုတိုက်ဖျက်ရေး ပူးပေါင်းဆောင်ရွက်မှု နားလည်မှုစာချွန်လွှာအား မြန်မာနိုင်ငံမှ ပါဝင်လက်မှတ်ရေးထိုးရေးကိစ္စနဲ့ ပတ်သက်ပြီး မတ်လ(၁၂)ရက်ကပြုလုပ်ခဲ့တဲ့ ဒုတိယအကြိမ်ပြည်ထောင်စုလွှတ်တော် သတ္တမပုံမှန်အစည်းအဝေးမှာ လွှတ်တော် ကိုယ်စားလှယ်(၅)ဦးကဆွေးနွေးခဲ့ ပြီး သဘောတူလိုက်တာပါ။

အကြမ်းဖက်သမားတွေဟာ ခေတ်မီနည်းပညာတွေကို အသုံးပြုနေကြတာကြောင့် အာဆီယံနိုင်ငံတွေအနေနဲ့ ခေတ်မီနည်းညာတွေ၊နိုင်ငံတကာမှာ ပူးပေါင်း ဆောင်ရွက်မှုတွေလုပ်ဆောင်နေတဲ့ သြစတြေးလျနိုင်ငံနဲ့ အကြမ်းဖက်မှုတိုက်ဖျက်ရေး သဘောတူ လက်မှတ်ရေးထိုးတာဟာ ကောင်းမွန်ကြောင်းဆွေးနွေးခဲ့ကြပါတယ်။သြစတြေးလျနိုင်ငံအနေနဲ့ အကြမ်းဖက်မှုလုပ်ငန်းတွေ၊ အကြမ်းဖက်သမားတွေကို ထိရောက်စွာတားဆီးနိုင်ဖို့ အင်ဒိုးနီးရှားနိုင်ငံ၊ မလေးရှားနိုင်ငံ၊ ကမ္ဘောဒီးယားနိုင်ငံတို့အပါအ၀င် နိုင်ငံပေါင်း(၂၀)ကျော်နဲ့ ပူးပေါင်းဆောင်ရွက်မှု နားလည်မှု စာချွန်လွှာကို လက်မှတ်ရေးထိုးထားတယ်လို့ သိရပါတယ်။

 

 

Related News