ရန်ကုန်တိုင်းဒေသကြီးမှာ (၂၀၁၇)ခုနှစ်အတွင်း မြို့ရွာနဲ့ အိုးအိမ်ဌာနကထုတ်ပေးထားတဲ့ မြေချပါမစ်တွေကို တိုင်းဒေသကြီးအစိုးရက  တာဝန်ယူစိစစ်ပြီး ထိရောက်စွာ အရေးယူသွားမယ်လို့ ရန်ကုန်တိုင်းဒေသကြီး လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ပြောကြားလိုက်ပါတယ်။မြေချပါမစ်တွေနဲ့ ပတ်သက်လို့ ၂၀၁၇ခုနှစ်အတွင်း ရပ်ကွက်အချို့မှာ  မြေကွက်များစွာကို  မြို့ရွာနဲ့ အိုးအိမ်ဌာနက မြေချပါမစ်တွေထုတ်ပေးထားပြီး ဒီမြေချပါမစ်တွေ ထုတ်ပေးထားရာမှာ မှန်ကန်မှုမရှိလို့ ပြန်လည်စိစစ်အရေးယူဆောင်ရွက်ဖို့ ရှိ၊ မရှိကို ဒဂုံမြို့သစ်တောင်ပိုင်းမြို့နယ်အမတ် ဦးကျော်ကျော်မောင်က တိုင်းဒေသကြီးလွှတ်တော်မှာ မေးမြန်းခဲ့တာပါ။
 
မြို့ပြနှင့်အိမ်ရာဖွံ့ဖြိုးရေးစီဌာနအနေနဲ့ ၂၀၁၂ခုနှစ်ကစပြီး မြို့သစ်တွေကမြေနေရာတွေကို ဦးစီဌာနအစီအစဉ်နဲ့ မြေချပါမစ်ထုတ်ပေးတာမရှိတော့ဘဲ ၂၀၁၂ ကနေ ယနေ့ထိ မြို့တော်စည်ပင်ကို လွှဲပြောင်းလုပ်ပိုင်ခွင့် လွှဲပြောင်းပေးနေဆဲ ဖြစ်တယ်လို့ ရန်ကုန်တိုင်းဒေသကြီး လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီးဒေါ်နီလာကျော်က ပြောကြားခဲ့ပါတယ်။ ဒါ့ကြောင့်  ရန်ကုန်တိုင်းဒေသကြီးမှာ(၂၀၁၇)ခုနှစ်အတွင်း မြို့ရွာနဲ့အိုးအိမ်ဌာနကထုတ်ပေးထားတဲ့ မြေချပါမစ်တွေ ရှိနေမှုအပေါ် တိုင်းဒေသကြီးအစိုးရက တာဝန်ယူကာ မြို့ပြနှင့် အိမ်ရာဖွံ့ဖြိုးရေးဦးစီဌာနအပါအ၀င် ရန်ကုန်မြို့တော်စည်ပင်သာယာတို့ ပူးပေါင်းစိစစ်ပြီး ထိရောက်စွာအရေးယူသွားမယ်လို့ ၀န်ကြီးဒေါ်နီလာကျော်က ပြောကြားလိုက်တာပါ။
 
မြေချပါမစ်ရရှိသူအချို့ဟာ မြို့ပြဖွံ့ဖြိုးမှုအားနည်တဲ့နေရာတွေမှာ သူတို့ရရှိတဲ့မြေကွက်တွေကို  လက်ခံရရှိယူတာ၊ အဆောက်အအုံဆောက်လုပ်ခြင်းမရှိဘဲ လက်လွှဲရောင်းချမှုတွေအရ မြေယာ ဈေးကစားသူတွေ လက်ဝယ်ရောက်ရှိပြီး အဆင့်ဆင့်ရောင်းဝယ်တာ၊ လက်လွှဲရယူတာတွေ အဆင့်ဆင့် လုပ်ဆောင်နေတယ်လို့လည်း ပြောပါတယ်။ ဒါတွေကြောင့် မြေချပါမစ် အတုပြုလုပ် ရောင်းချတာတွေလည်း ဖြစ်ပေါ်နေတယ်လို့ ပြောပါတယ်။ မြေချပါမစ်ဆိုတာ မြို့တော်စည်ပင်သာယာရဲ့ အုပ်ချုပ်မှုမရှိသေးတဲ့ မြို့သစ်တွေမှာ အိမ်ရာဆောက်လုပ်ဖို့ စည်းကမ်းချက်တွေ သတ်မှတ်ပေးပြီး  ချထားပေးတာဖြစ်ပါတယ်။ သတ်မှတ်စည်းကမ်းချက်တွေအရ တစ်ဆင့်ရောင်းဝယ် တာ၊ လက်လွှဲတာမပြုလုပ်နိုင်ပါဘဲ အိမ်ရာဆောက်လုပ်ဖို့ တာဝန်ရှိပြီး အိမ်ရာဆောက်လုပ်ပြီးမှသာ မြေငှားစာချုပ် လျှောက်ထားနိုင်တယ်လို့လည်း သိရပါတယ်။
 
 
 
 

Related News