ဝါဆိုလပြည့်နေ့မှာ လူစည်ကားများပြားတဲ့အတွက် Clean Yangon ကမ်ပိန်းမှ (၂၇)ကြိမ်မြောက် အမှိုက်ကောက်ကမ်ပိန်းကို ဇူလိုင်လ(၁၆)ရက်က ရွှေတိဂုံဘုရားတောင်ဘက်မုဒ်အနီးရှိ ဦးဥတ္တမပန်းခြံမှာစုရပ်ထားပြီး ပြုလုပ်ခဲ့ကြပါတယ်။ဝါဆိုလပြည့်နေ့လိုအခါကြီးရက်ကြီးမှာ အနယ်နယ်အရပ်ရပ်က ဘုရားဖူးပြည်သူတွေရွှေတိဂုံဘုရားကို လာရောက်ဖူးမျှော်ကြပြီး  လူစည်ကားများပြားတဲ့အတွက် လမ်းပေါ်မှာ အမှိုက်ပစ်ချမှုတွေလည်း ရှိနိုင်တာကြောင့် အခုလို ရွှေတိဂုံဘုရား အနီးတ၀ိုက်မှာ အမှိုက်ကောက်ကမ်ပိန်းပြုလုပ်တာလို့သိရပါတယ်။ ဒါ့အပြင် အခါကြီးရက်ကြီး ဖြစ်တာကြောင့် ဘုရားနားမှာ စတုဒီတာအလှူ ပြုလုပ်သူတွေနဲ့ ရေသန့်ဘူး အအေးဘူး လိုက်ဝေငှမှုတွေလည်းရှိနေတာကြောင့် အမှိုက်ကောက်ကမ်ပိန်းကို ရွှေတိဂုံဘုရား အနီးတစ်ဝိုက်ကို ရွေးချယ်ထားဖြစ်တာလို့ သိရပါတယ်။

(၂၇)ကြိမ်မြောက် အမှိုက်ကောက်ကမ်ပိန်းမှာ ပရဟိတအဖွဲ့အစည်းတွေနဲ့လူအင်အား(၂၀၀)ကျော်က ရွှေတိဂုံဘုရားအနောက် ဘက်မုဒ်၊ ရွှေတိဂုံဘုရားအရှေ့ဘက်မုဒ်၊ ဗဟန်း(၃)လမ်း တို့မှာ စုပေါင်းအမှိုက်ကောက်ခဲ့ကြတာဖြစ်ပါတယ်။ အဆိုပါ Clean Yangon ကမ်ပိန်းကို ရန်ကုန်မြို့တော်စည်ပင်သာယာရေးကော်မတီမှ  အမှိုက်သိမ်းယာဉ်ကားအကြီး(၁)စီး၊ အသေး(၆)စီး၊ အမှိုက်သိမ်းလှည်း(၇)စီး၊ သန့်ရှင်းရေးဝန်ထမ်း(၃၀)ဦးအပါအ၀င် အမှိုက်အိတ်တွေနဲ့ပါဝင်ပူပေါင်းဆောင်ရွက်ခဲ့ပါတယ်။ ဒီလို အမှိုက်ကောက်ကမ်ပိန်းတွေကို လူငယ်တွေက ဦးဆောင်ပြီး လစဉ်ပြုလုပ်နေသော်လည်း စည်းကမ်းမဲ့အမှိုက်တွေပစ်ချမှုတွေ ကတော့ ရှိနေသေးတယ်လို့ ကမ်ပိန်းမှာပူးပေါင်းပါဝင်ခဲ့သူတစ်ဦးက အခုလိုပြောပါတယ်။ရန်ကုန်မြို့တွင်း အမှိုက်လျှော့ချရေးအစီအစဉ်တွေကို ရန်ကုန်မြို့တော်စည်ပင်သာယာရေးကော်မတီနဲ့ Clean Yangon ကမ်ပိန်းက  (၂၀၁၇)ခုနှစ်ကစတင်ပြီး (၁)လတစ်ကြိမ် မတူညီတဲ့  နေရာတွေမှာ အခုလို အမှိုက်ကောက်ကမ်ပိန်းကို ပြုလုပ်လာခဲ့တာဖြစ်ပါတယ်။

 

 

Related News