ပြီးခဲ့တဲ့(၂၀၁၈)ခုနှစ် နှစ်စကစလို့ တစ်နှစ်ခွဲဝန်းကျင်အတွင်း ရန်ကုန်တိုင်းဒေသကြီးမှာ မော်တော်ဆိုင်ကယ်ကို စီးနင်းအသုံးပြုပြီး ဒုစရိုက်မှုများ ကျူးလွန်တဲ့အမှုပေါင်း(၆၀) ကျော်ရှိခဲ့တယ်လို့ ရန်ကုန်တိုင်းဒေသကြီးအစိုးရအဖွဲ့က ပြောကြားထားပါတယ်။ ဒုစရိုက်မှုတွေထဲ လူသတ်မှုက(၃)မှုပါဝင်ခဲ့တယ်လို့ သိရပါတယ်။

ရန်ကုန်တိုင်းဒေသကြီးအတွင်းက မြို့နယ်တွေထဲမှာ မော်တော်ဆိုင်ကယ် စီးနင်းခွင့်ပြုထားတဲ့ မြို့နယ်ပေါင်း (၁၃)မြို့နယ်ရှိပြီး စီးနင်းခွင့်မပြုတဲ့ မြို့နယ်ပေါင်း (၃၁)မြို့နယ်ရှိတယ်လို့ သိရပါတယ်။ မော်တော်ဆိုင်ကယ်စီးခွင့်မရှိတဲ့ မြို့နယ်တွေမှာ မစီးနင်းစေရေးကိုလည်း ပညာပေးဟောပြောပွဲတွေမှာ ထည့်သွင်းဟောပြောထားရှိပြီး လိုက်နာမှုမရှိတဲ့ မော်တော်ဆိုင်ကယ်စီးနင်းသူတွေကို ဖမ်းဆီးအရေးယူဆောင်ရွက်နေတယ်လို့ ရန်ကုန်တိုင်းဒေသကြီးအစိုးရအဖွဲ့က ပြောကြားထားပါတယ်။ တိုင်းဒေသကြီးအတွင်းမှာ မော်တော်ဆိုင်ကယ်ကို စီးနင်းအသုံးပြုပြီး လုယက်မှု ၊ခြောက်လှန့်တောင်းယူမှုတွေအပြင် လူသတ်မှုတွေအထိ ဒုစရိုက်မှုများ ကျူးလွန်နေတာတွေ ဖြစ်ပေါ်နေတယ်လို့ ရန်ကုန်တိုင်းဒေသကြီးအစိုးရအဖွဲ့က ပြောကြားထားပါတယ်။ မော်တော်ဆိုင်ကယ်အသုံးပြုပြီး ဒုစရိုက်မှုများကျူးလွန်မှု အခြေအနေတွေအနေနဲ့ ပြီးခဲ့တဲ့(၂၀၁၈)ခုနှစ် နှစ်စကနေ (၂၀၁၉)ခုနှစ်ဇွန်လ(၁၅)ရက်ထိ တစ်နှစ်ခွဲ ၀န်းကျင်အတွင်း လူသတ်မှု(၃)မှု၊ လုယက်မှု(၅၃)မှု၊ ခြောက်လှန့်တောင်းယူမှု(၆)မှု စုစုပေါင်း(၆၂)မှုရှိခဲ့တယ်လို့ သိရပါတယ်။

ရန်ကုန်တိုင်းဒေသကြီးအတွင်းက မြို့နယ်တွေထဲမှာ မော်တော်ဆိုင်ကယ် စီးနင်းအသုံးပြုပြီး ဒုစရိုက်မှုများ ကျူးလွန်ခဲ့မှုအပြင် မော်တော်ဆိုင်ကယ်ကြောင့် ဖြစ်ပွားတဲ့ယာဉ်တိုက်မှုတွေများပြားနေပြီး တစ်နှစ်ခွဲဝန်းကျင်အတွင်း ပျမ်းမျှ တစ်လယာဉ်တိုက်မှုအမှုပေါင်း(၅၀)နဲ့အထက် ဖြစ်ပွားနေတယ်လို့သိရပါတယ်။ ဒါ့ကြောင့် တိုင်းဒေသကြီးအတွင်းမှာ မော်တော်ဆိုင်ကယ်ကြောင့် ဖြစ်ပွားတဲ့ယာဉ်တိုက်မှုနဲ့ ဒုစရိုက်မှုတွေကျူးလွန်မှုများ လျော့နည်းကျဆင်းရေးအတွက် တရားမဝင် မော်တော်ဆိုင်ကယ်စီးနင်းသူတွေကို အရှိန်အဟုန်မြှင့်ဖမ်းဆီးအရေးယူဆောင်ရွက်နေတယ်လို့လည်း လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ပြောပါတယ်။

 (၂၀၁၈)ခုနှစ်အတွင်း မော်တော်ဆိုင်ကယ်အသုံးပြုပြီး ဒုစရိုက်မှုများကျူးလွန်မှုအတွေအနေနဲ့ လူသတ်မှု(၂)မှု၊ လုယက်မှု(၄၃)မှု၊ ခြောက်လှန့်တောင်းယူမှု (၆)မှု၊ စုစုပေါင်း (၅၁)မှုဖြစ်ပွားခဲ့တာဖြစ်ပြီး (၂၀၁၉)ခုနှစ် နှစ်စကနေ ဇွန်လ(၁၅)ရက်အထိ လူသတ်မှု(၁)မှု၊ လုယက်မှု(၁၀)မှု ၊ စုစုပေါင်း (၁၁)မှုဖြစ်ပွားခဲ့တာဖြစ်ပါတယ်။ ရန်ကုန်တိုင်းဒေသကြီးမှာ မော်တော်ဆိုင်ကယ်ကြောင့်ဖြစ်ပွားခဲ့တဲ့ ယာဉ်တိုက်မှုတွေအနေနဲ့  ပြီးခဲ့တဲ့(၂၀၁၈)ခုနှစ် နှစ်စကစလို့ တစ်နှစ်ခွဲဝန်းကျင်အတွင်း ယာဉ်တိုက်မှုပေါင်း(၉၀၀)နီးပါးဖြစ်ပွားခဲ့ပြီး သေဆုံးသူ(၂၈၀)ကျော်၊ ဒဏ်ရာရရှိသူ(၁၂၀၀)၀န်းကျင်ရှိခဲ့တယ်လို့သိရပါတယ်။

 

 

Related News