ဆေးတက္ကသိုလ်မှာ တက်ရောက်နေတဲ့ ဆေးကျောင်းသားကျောင်းသူတွေ ခန္ဓာဗေဒသင်ကြားရာမှာ အထောက်အကူပြုဖို့ ခန္ဓာကိုယ်လှူဒါန်းနိုင်ပြီဖြစ်တယ်လို့ သိရပါတယ်။ခန္ဓာကိုယ်လှူဒါန်းလိုတယ်ဆိုရင် ဆေးတက္ကသိုလ်(၁)၊ ရန်ကုန်က ခန္ဓာဗေဒဌာနရုံးခန်းမှာ သွားရောက်စုံစမ်းနိုင်ပြီ ဖြစ်ပါတယ်။ အသက် (၁၈)နှစ်ပြည့်ပြီးတဲ့ မည်သူမဆို သွားရောက်လှူဒါန်းနိုင်ပြီး မိဘဆွေမျိုးတွေရဲ့ ထောက်ခံချက်လိုအပ်တယ်လို့ သိရပါတယ်။ အလှူရှင်တွေ ကွယ်လွန်ပြီးမှ ခန္ဓာကိုယ်ကို ဆေးတက္ကသိုလ်၊ ခန္ဓာဗေဒဌာနက လွှဲပြောင်းလက်ခံရယူတာဖြစ်ပါတယ်။ ခန္ဓာကိုယ်အလှူရှင်ဟာ ကူးစက်ရောဂါနဲ့ ကွယ်လွန်တာ၊ ထိခိုက်ဒဏ်ရာရပြီး သေဆုံးတာ၊ မှုခင်းတစ်စုံတစ်ရာနဲ့ သေဆုံးတာ ဒါမှမဟုတ် ကင်ဆာရောဂါခံစားရပြီး သေဆုံးတာဆိုရင် အဲ့ဒီခန္ဓာကိုယ်ကို လက်မခံဘူးလို့ သိရပါတယ်။ ဆေးတက္ကသိုလ်က လှူဒါန်းတဲ့ ခန္ဓာကိုယ်တွေကို ဆေးစိမ်သိမ်းဆည်းထားပြီး ဒုတိယနှစ် ဆေးကျောင်းသားကျောင်းသူတွေကို ခန္ဓာဗေဒ လက်တွေ့ သင်ကြားရာမှာ အသုံးချသလို၊ ဘွဲ့လွန်ကျောင်းသားတွေ ခွဲစိတ်ပညာရပ် လေ့လာရာမှာလည်း အသုံးချတာဖြစ်ပါတယ်။ ဒါကြောင့် ဒီလှူဒါန်းမှုက ဆရာဝန်ဖြစ်လာမယ့် သူတွေကို သင်ကြားရေးအထောက်အကူပြုတဲ့ ခန္ဓာကိုယ်လှူဒါန်းမှုဖြစ်ပါတယ်။

လှူဒါန်းလာတဲ့ ခန္ဓာကိုယ်တွေကို ဆေးစိမ်တာက နှစ်မျိူးရှိပြီး ဖော်မလင်ထိုးပြီး သိမ်းတဲ့ ခန္ဓာကိုယ်က လေးငါးနှစ်ကနေ ဆယ်နှစ် အထိခံတယ်လို့ သိရပါတယ်။ အဲ့ဒီ ဖော်မလင်နဲ့ ဆေးစိမ်တဲ့ ခန္ဓာကိုယ်တွေကို ဒုတိယနှစ် ဆေးကျောင်းသား၊ ကျောင်းသူတွေ အတွက် အသုံးပြုတာဖြစ်ပါတယ်။ နောက်ထပ် ဆေးစိမ်နည်းက ဖော်မလင်အနည်းငယ်ကိုသာသုံးပြီး အခြားဓာတ်ပစ္စည်းတွေနဲ့ ရောနှောကာ ရေခဲသေတ္တာထဲမှာ အနုတ် ၁၈ ဒီဂရီ စင်တီဂရိတ်နဲ့ သိမ်းဆည်းတာဖြစ်ပါတယ်။ အဆိုပါ သိမ်းဆည်းနည်းကြောင့် ခန္ဓာကိုယ်က ပျော့ပြောင်းပြီး ခွဲစိတ်ဆရာဝန်တွေ လေ့ကျင့်တာနဲ့ ဆေးသုတေသနလုပ်ရာမှာ အသုံးပြုတယ်လို့ သိရပါတယ်။

နှစ်တိုင်း  ဆေးတက္ကသိုလ်(၁)၊ ခန္ဓာဗေဒဌာနကို ခန္ဓာကိုယ်လာရောက်လှူဒါန်းမှုတွေက ထောင်ချီပြီး ရှိတယ်လို့ သိရပါတယ်။ ဒါပေမဲ့ ခန္ဓာကိုယ် အလှူရှင်သေဆုံးမှသာ လှူဒါန်းပြီးတဲ့ ခန္ဓာကိုယ်ကို လွှဲပြောင်း လက်ခံရရှိတာဖြစ်လို့ တစ်နှစ်ကို ခန္ဓာကိုယ် ငါးခုကနေ ဆယ်ခုအထိ အလှူခံရရှိတယ်လို့ သိရပါတယ်။

 

 

Related News