မန္တလေးတိုင်းဒေသကြီးမှာ ၂၀၁၈ ခုနှစ် အောက်တိုဘာလမှ ၂၀၁၉ ခုနှစ် မေလအထိ မီးလောင်မှု (၂၁၂) ကြိမ် ဖြစ်ပွားခဲ့ ပြီး ခန့်မှန်းပျက်စီးဆုံးရှုံးမှုတန်ဖိုး ကျပ်သန်း (၄၉၀၀၀၀)ကျော်ရှိတယ်လို့ မန္တလေးတိုင်းဒေသကြီးမီးသတ်ဦးစီးဌာန ထုတ်ပြန်ချက်အရ သိရပါတယ်။

မန္တလေးတိုင်းဒေသကြီးအတွင်းဖြစ်ပွားခဲ့တဲ့ မီးလောင်မှုတွေမှာ မီးဖိုမီး၊ပေါ့ဆမီး၊လျှပ်စစ်မီး၊မသမာသူရှို့မီး၊အလိုအလျောက် လောင်ကျွမ်းမှုနဲ့ တောမီးလောင်ကျွမ်းမှုတို့ကြောင့် ဖြစ်ပွားခဲ့ပြီး ၊လျှပ်စစ်မီး က အများဆုံးဖြစ်တယ်လို့ သိရပါတယ်။ ခရိုင်အလိုက် ဖြစ်ပွားမှုမှာ မန္တလေးခရိုင်က(၆၆)ကြိမ် ဖြစ်ပွားခဲ့ပါတယ်။ အခုလို ဖြစ်ပွားခဲ့တဲ့ မီးလောင်မှုတွေကြောင့် အိမ်ခြေ(၂၈၆)လုံး၊ စက်ရုံအလုပ်ရုံ(၁)ရုံ နဲ့ ဂိုထောင်(၁၁)လုံး မီးလောင်ကျွမ်းခဲ့ပြီး သေဆုံးသူ(၃)ဦး၊ ဒဏ်ရာရရှိသူ (၁၉)ဦးနဲ့ မီးဘေးဒုက္ခသည် (၇၉၈)ဦး ရှိပြီး ခန့်မှန်းပျက်စီးဆုံးရှုံးမှုတန်ဖိုး ကျပ်သန်း (၄၉၀၀၀၀) ကျော်ရှိတယ်လို့ မန္တလေးတိုင်းဒေသကြီး မီးသတ်ဦးစီးဌာန ထုတ်ပြန်ချက်အရ သိရပါတယ်။

မန္တလေးတိုင်းဒေသကြီး မီးသတ်ဦးစီးဌာန အနေနဲ့ မီးလောင်မှုတွေမဖြစ်စေဖို့ အတွက် မီးဘေးအန္တရာယ်ရှိတဲ့ ပစ္စည်းတွေကို ထုတ်လုပ် သိုလှောင်ရောင်းချနေတဲ့ စက်ရုံ၊အလုပ်ရုံ၊ သိုလှောင်ရုံနဲ့ ဈေးတွေကိုစစ်ဆေးအကြံပြုခြင်း၊ အထပ်မြင့်အဆောက်အဦတွေ၊ စုပေါင်းနေအိမ်တွေနဲ့ စက်ရုံအလုပ်ရုံတွေကို မီးဘေးလုံခြုံရေးစနစ် တပ်ဆင်အသုံးပြုစေဖို့ စစ်ဆေးအကြံပြုခြင်း၊ အိမ်တိုင်းမီးသတ် ဆေးဗူးထားနိုင်ခြင်းစတဲ့ လုပ်ငန်းတွေ ဆောင်ရွက်ခဲ့တယ်လို့ သိရပါတယ်။

ဒါ့အပြင် မီးငြှိမ်းသတ်ရေးကို ထိရောက်စွာ ဆောင်ရွက်နိုင်ရန် အတွက် အရန်မီးသတ်တပ်ဖွဲ့ဝင် တိုးချဲ့ဖွဲ့စည်းခြင်း၊ မီးဘေးကြိုတင်ကာကွယ်ရေးအဖွဲ့ ဖွဲ့စည်းခဲ့ပြီး အရန်မီးသတ်တပ်ဖွဲ့ဝင် အကြိုအခြေခံသင်တန်း၊ အရန်မီးသတ်တပ်ဖွဲ့ဝင် လေ့ကျင့်ရေးမွမ်းမံသင်တန်းတွေ ဖွင့်လှစ်ပို့ချပေးခဲ့တယ်လို့ သိရပါတယ်။မန္တလေးတိုင်းဒေသကြီး မီးသတ်ဦးစီးဌာနအနေနဲ့ မန္တလေးတိုင်းဒေသကြီးအစိုးရအဖွဲ့ရဲ့ ကြီးကြပ်လမ်းညွှန်မှုကိုခံယူပြီး ၂၀၁၈ ခုနှစ် အောက်တိုဘာလမှ ၂၀၁၉ ခုနှစ် မေလအထိ သက်ဆိုင်ရာကဏ္ဍအလိုက် အကောင်အထည်ဖော်ဆောင်ရွက်ရာမှာ မီးလောင်မှု လျော့နည်းကျဆင်းရေး၊ အရန်မီးသတ်တပ်ဖွဲ့ဝင်များ တိုးချဲ့ဖွဲ့စည်းလေ့ကျင့်တည်ဆောက်ရေးလုပ်ငန်းတွေကို အရှိန်အဟုန်မြှင့် ဆောင်ရွက်နိုင်ရေးအတွက် သက်ဆိုင်ရာခရိုင်/မြို့နယ်တွေကို ကြပ်မတ်ဆောင်ရွက်နေတယ်လို့ သိရပါတယ်။

 

Related News