မြောင်းမြမြို့နယ်အတွင်းက  ကျေးလက်ဒေသတွေမှာ လျှပ်စစ်မီးရရှိမှုနဲ့ ကျန်းမာရေးအတွက် ဆေးပေးခန်းတွေရရှိအောင်ဆောင် ရွက်သွားမှာဖြစ်တယ်လို့ မြောင်းမြလွှတ်တော်ကိုယ်စားလှယ်က ပြောပါတယ်။ မြောင်းမြမြို့နယ်အတွင်းမှာ ကျေးရွာပေါင်း(၅၀၀)ကျော်ရှိပြီး ဒီကျေးရွာတွေက ပထ၀ီအနေအထားမတူတဲ့အပြင် မြို့နယ်နဲ့ အလှမ်းဝေးကွာတဲ့ ကျေးလက်ဒေသတွေဖြစ်ပါတယ်။ ဒါ့အပြင် မြောင်းမြမြို့နယ်မှာရှိတဲ့ ကျေးလက်ဒေသတွေမှာ ကျန်းမာရေး ဆေးပေးခန်းတွေ လိုအပ်ချက်ရှိနေသလို လျှပ်စစ်မီးကလည်း လိုအပ်ချက်တွေ ဖြစ်ပေါ်နေတာဖြစ်ပါတယ်။ ကျေးလက်ဒေသ တွေမှာ လျှပ်စစ်မီးလိုအပ်ချက်ရှိနေတာကြောင့် ဆိုလာစနစ်ကို အသုံးပြုနေကြတာဖြစ်ပြီး မြောင်းမြတစ်မြို့နယ်လုံးကို (၂၀၂၀-၂၀၃၀)ပြည့်နှစ်မှာ လျှပ်စစ်မီးရရှိအောင် ဆောင်ရွက်သွားမှာဖြစ်တယ်လို့ သိရပါတယ်။ ဒါ့အပြင် ကျေးလက်ဒေသတွေမှာ ကျေးလက်ကျန်းမာရေးဌာန(၂)ခုနဲ့ ကျေးလက်ကျန်းမာရေးဌာနခွဲ (၁၀)ခုကို  ရရှိအောင်ဆောင်ရွက်သွားမှာဖြစ်တယ်လို့ မြောင်းမြမြို့နယ် ပြည်သူ့လွှတ်တော်ကိုယ်စားလှယ်က ပြောပါတယ်။

မြောင်းမြမြို့နယ်အတွင်းရှိ ကျေးလက်ဒေသတွေမှာ လျှပ်စစ်မီးရရှိအောင်ဆောင်ရွက်နိုင်ဖို့အတွက် ကမ္ဘာ့ဘဏ်နှင့်ပူးပေါင်းပြီး ဆောင်ရွက်တာတွေရှိသလို ICP စီမံကိန်းတွေလည်း လုပ်ဆောင်တာတွေရှိပါတယ်။ ICP စီမံကိန်းမှာ ကျေးလက်ဒေသတွေကို ဆိုလာ မီးတပ်ဆင်ပေးတာက (၂၀၁၇)ခုနှစ်မှာ ကျေးရွာ (၅၉) ရွာ၊ ဆိုလာယူနစ်ပေါင်း (၂၈၀၀)ကျော်၊ (၂၀၁၈) ခုနှစ်မှာ ကျေးရွာ (၇)ရွာကို ဆိုလာယူနစ်ပေါင်း (၃၀၀)ကျော် ဆောင်ရွက်ခဲ့ပြီးဖြစ်သလို အခု (၂၀၁၉) ခုနှစ်မှာ ကျေးရွာ (၁၁) ရွာကို ဆိုလာစနစ်တွေ တပ်ဆင်သွားဖို့ ရှိတယ်လို့ သိရပါတယ်။

မြောင်းမြမြို့နယ်အတွင်းမှာရှိတဲ့ကျေးလက်ဒေသတွေဖွံ့ဖြိုးတိုးတက်ရန်အတွက် လမ်းပန်းဆက်သွယ်ရေး၊ လျှပ်စစ်မီး အပြင် ကျေးလက်ဒေသတွေမှာ အဓိကလိုအပ်ချက်ဖြစ်တဲ့ ပညာရေး၊ ကျေးလက်ကျန်းမာရေးဌာနတွေကိုလည်း အစိုးရ အနေနဲ့ ဆက်လက်ဆောင်ရွက်သွားဖို့ရှိတယ်လို့ သိရပါတယ်။

 

Related News