ရန်ကုန်တိုင်းဒေသကြီးအတွင်း ရင်ခွင်မဲ့ကလေးငယ်များလျှော့ချရေးနှင့် ကာကွယ်စောင့်ရှောက်ရေးအသင်းဖွဲ့စည်းသွားမယ်လို့ မေလ(၁၉)ရက်က ရန်ကုန်တက္ကသိုလ် စိန်ရတုခန်းမမှာ ပြုလုပ်ခဲ့တဲ့ မြန်မာနိုင်ငံ ရင်ခွင်မဲ့ကလေးငယ်များ လျှော့ချရေးနှင့် ကာကွယ်စောင့်ရှောက်ရေးအသင်း အဆင့်ဆင့်ဖွဲ့စည်းရေးတွေ့ဆုံဆွေးနွေးပွဲမှ သိရတာဖြစ်ပါတယ်။

ရင်ခွင်မဲ့ကလေးငယ်များလျှော့ချရေးနှင့်ကာကွယ်စောင့်ရှောက်ရေးအသင်း(ဗဟို)ကို နေပြည်တော်မှာဖွဲ့စည်းခဲ့ပြီးဖြစ်သလို ရန်ကုန်တိုင်းဒေသကြီး အတွင်းမှာ ဖွဲ့စည်းသွားဖို့အတွက် ဆောင်ရွက်နေတာဖြစ်တယ်လို့ သိရပါတယ်။ ရင်ခွင်မဲ့ကလေးငယ်များလျှော့ချရေးနှင့်ကာကွယ်စောင့်ရှောက်ရေးအသင်းကိုဖွဲ့စည်းရာမှာ ပြည်တွင်းမှာအကြောင်းအမျိုးမျိုးကြောင့် မိဘမဲ့ဖြစ်ခဲ့တဲ့ ကလေးသူငယ်တွေကို ကာကွယ်စောင့်ရှောက်ပေးနိုင်ရန်၊ ရင်ခွင်မဲ့ကလေးငယ်များဖြစ်ခြင်းကို လျှော့ချနိုင်စေရန်၊ ရင်ခွင်မဲ့ကလေးငယ်များကို ကလေးသူငယ်အခွင့်အရေးများဆိုင်ရာ ဥပဒေပါ အခြေခံအခွင့်အရေးများနဲ့ အညီ ကာကွယ်စောင့်ရှောက်မှုပေးနိုင်ရန်စတဲ့ ရည်ရွယ်ချက်တွေနဲ့ ဖွဲ့စည်းသွားမှာဖြစ်တယ်လို့ သိရပါတယ်။

ရင်ခွင်မဲ့ကလေးငယ်များလျှော့ချရေးနှင့်ကာကွယ်စောင့်ရှောက်ရေးအသင်းအနေနဲ့ ကလေးငယ်များအပါအ၀င် အမျိုးသမီးတွေကို လိင်ပိုင်းဆိုင်ရာ အကြမ်းဖက်ခံရခြင်း၊ လိင်ပိုင်းဆိုင်ရာလှည့်ဖျားခံရခြင်း၊ လူကုန်ကူးခံရခြင်းစတဲ့ ကိစ္စရပ်တွေမှ ကာကွယ်ပေးနိုင်ရန်၊ အမျိုးသမီးတွေအနေနဲ့ မမျှော်လင့်ပဲ တစ်ကိုယ်ရေမိခင်(Single Mother) များဖြစ်လာခြင်းကို လျှော့ချဖို့နဲ့ အမျိုးသမီးတွေကို အသိပညာတွေပေးနိုင်ဖို့ စတာတွေကို လုပ်ဆောင်သွားမှာဖြစ်တယ်လို့ သိရပါတယ်။

အခုပြုလုပ်ခဲ့တဲ့ ရန်ကုန်တိုင်းဒေသကြီးအတွင်း ရင်ခွင်မဲ့ကလေးငယ်များလျှော့ချရေးနှင့် ကာကွယ်စောင့်ရှောက်ရေးအသင်း အဆင့်ဆင့်ဖွဲ့စည်းရေး တွေ့ဆုံဆွေးနွေးပွဲမှာတော့ ရန်ကုန်တိုင်းဒေသကြီးအစိုးရအဖွဲ့ လူမှုရေးဝန်ကြီး ဦးနိုင်ငံလင်းအပါအ၀င် အစိုးရအဖွဲ့ဝင်တွေနဲ့ သက်ဆိုင်ရာဌာနမှ တာဝန်ရှိသူတွေတက်ရောက်ခဲ့ကြပါတယ်။

 

 

Related News