၂၀၁၈-၁၉ ဘဏ္ဍာရေးနှစ်အတွက်  လက်ရှိအချိန်အထိ နိုင်ငံခြားရင်းနှီးမြှုပ်နှံမှု အမေရိကန်ဒေါ်လာသန်း(၂၅၀၀)ကျော်သာ ၀င်ရောက်ထားတာကြောင့် အခုဘဏ္ဍာရေးနှစ် နိုင်ငံခြားရင်းနှီးမြှုပ်နှံမှု မျှော်မှန်းချက် ပြည့်မီဖို့ အရင်းအနှီးများတဲ့ စီမံကိန်းကြီးတွေ ထပ်မံဝင်ရောက်ဖို့ လိုနေတယ်လို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန အမြဲတမ်းအတွင်းဝန်က ပြောပါတယ်။ အခု ဘဏ္ဍာရေးနှစ်အတွက် နိုင်ငံခြားရင်းနှီးမြှုပ်နှံမှု မျှော်မှန်းချက်က အမေရိကန်ဒေါ်လာ သန်း(၅၈၀၀) ဖြစ်တယ်လို့ သိရပါတယ်။ ၂၀၁၈-၁၉ ဘဏ္ဍာရေးနှစ်ဟာ လာမယ့်စက်တင်ဘာ(၃၀)ရက်မှာ ကုန်ဆုံးမှာဖြစ်ပြီး လက်ရှိ ဘဏ္ဍာရေးနှစ် တစ်ဝက်ကုန်ဆုံးချိန်မှာတော့ နိုင်ငံခြားရင်းနှီးမြှုပ်နှံမှုက အမေရိကန်ဒေါ်လာသန်း(၂၅၇၀)နီးပါးသာ ၀င်ရောက်ထားတာ ဖြစ်ပါတယ်။ ဌာနဆိုင်ရာတွေတက်ရောက်တဲ့ အောက်မြန်မာပြည်အတွက် ရင်းနှီးမြှုပ်နှံမှုတွေဝင်ရောက်ရာမှာ ပိုမိုလွယ်ကူစေရေး ဆွေးနွေးပွဲကို မေလ(၁၆)ရက်ကနေ (၁၇)ရက်အထိ ရန်ကုန်မြို့ချက်ထရီယံဟိုတယ်မှာပြုလုပ်နေပြီး ဒီပွဲမှာ ရင်းနှီးမြှုပ်နှံမှုတွေ ပိုမိုဝင်ရောက်လာစေဖို့ ပူးပေါင်းဆောင်ရွက်ရမယ့် အပိုင်းတွေကို ဆွေးနွေးကြမှာ ဖြစ်ပါတယ်။

နိုင်ငံခြားရင်းနှီးမြှုပ်နှံမှုတွေ ပိုမိုဝင်ရောက်လာဖို့ လုပ်ထုံးလုပ်နည်းဖြေလျှော့မှုတွေအစိုးရဘက်က ပြုလုပ်နေသလို တစ်ဖက် မှာလည်း ဒီအပေါ်မှာ ၀န်ကြီးဌာနတွေဘက်က ပူးပေါင်းဆောင်ရွက်မှု အားကောင်းဖို့ လိုအပ်နေသေးတယ်လို့ အမြဲတမ်း အတွင်းဝန်က ပြောပါတယ်။ နိုင်ငံခြားရင်းနှီးမြှုပ်နှံသူတွေဘက်ကတော့ မြေ၊ လျှပ်စစ်မီး၊ ကျွမ်းကျင်ဝန်ထမ်းရရှိမှုနဲ့ ချေးငွေ ရရှိနိုင်မှုအပိုင်းမှာ ပိုမိုအားကောင်းဖို့ တိုက်တွန်းထားတယ်လို့ သိရပါတယ်။  မြန်မာနိုင်ငံရင်းနှီးမြုပ်နှံမှုမြှင့်တင်ရေးစီမံကိန်း(MIPP)အရ မြန်မာနိုင်ငံမှာ ၂၀၁၆ ခုနှစ်ကနေ ၂၀၃၆ ခုနှစ်အထိ အနှစ်(၂၀) အတွင်း ပြည်တွင်း ပြည်ပရင်းနှီးမြှုပ်နှံမှုပမာဏ အမေရိကန်ဒေါ်လာ ဘီလီယံ(၂၂၀)ကျော် ၀င်ရောက်ဖို့  မျှော်မှန်းထား တာဖြစ်ပြီး  ၂၀၂၁ အထိ တစ်နှစ်ကို နိုင်ငံခြားရင်းနှီးမြှုပ်နှံမှု အမေရိကန်ဒေါ်လာ (၅.၈)ဘီလီယံဝင်ရောက်ဖို့် လျာထားတယ်လို့ သိရပါတယ်။


 

Related News