သင်္ကြန်ကာလအတွက် ရန်ကုန်ပြည်သူ့ဆေးရုံကြီး၊ အရေးပေါ်ဌာနမှာ ဝန်ထမ်းအင်အားနှစ်ဆတိုးချထားတယ်လို့ ရန်ကုန်ပြည်သူ့ဆေးရုံကြီးရဲ့ ဆေးရုံအုပ် ဒေါက်တာခင်သိင်္ဂီမြင့်ကပြောပါတယ်။ရန်ကုန်ပြည်သူ့ဆေးရုံကြီး၊ အရေးပေါ်ဌာနမှာ ပုံမှန်ဝန်ထမ်းဦးရေ ရှစ်ဆယ်ကနေ တစ်ရာထိ ထားရှိနေကြဖြစ်ပေမယ့် သင်္ကြန်ကာလအတွက်တော့ ဝန်ထမ်းဦးရေ တစ်ရာကနေ ၁၅၀ အထိ နှစ်ဆ တိုးချထားတယ်လို့သိရပါတယ်။ အရေးပေါ်ဌာနမှာ ဆေးပညာရပ်ဆိုင်ရာ ခွဲစိတ်ကုသမှုတွေ၊ ထိခိုက်ဒဏ်ရာနဲ့ပတ်သက်တဲ့ ကုသမှုတွေကို အချိန်နဲ့တစ်ပြေးညီရရှိအောင် ဆောင်ရွက်ထားပြီး တစ်နေရာတည်းမှာ ကုသမှုအစုံရနိုင်တဲ့ One Stop Service အနေနဲ့ ဝန်ဆောင်မှုပေးမှာဖြစ်ပါတယ်။ သင်္ကြန်ကာလမှာ အရေးပေါ်ဌာနကို ယာဉ်မတော်တဆမှုကြောင့် လာရောက်သူဦးရေ အများဆုံးဖြစ်ပြီး ခိုက်ရန်ဖြစ်ပွားမှုနဲ့ အခြားအထွေထွေရောဂါတွေကြောင့် လာရောက်ပြသသူတွေလည်းရှိပါတယ်။

အရေးပေါ်ဌာနကို ရောက်လာတဲ့ လူနာတွေကို ရောဂါအဆင့်ခွဲခြားပြီးမှ လိုအပ်တဲ့ ကုသမှုတွေကို ပေးသွားမှာဖြစ်ပြီး တာဝန်ထမ်းဆောင်မယ့် ဆရာဝန်၊သူနာပြုတွေကို အကြိုလေ့ကျင့်သင်ကြားမှုတွေ ပြုလုပ်ပေးပြီး ဖြစ်တယ်လို့သိရပါတယ်။ ဒါ့အပြင် အရေးပေါ်ဌာနမှာ အပူရှပ်(Heat Stroke) လူနာတွေအတွက် ပန်ကာ၊အဲကွန်းတွေနဲ့ အခန်းသီးသန့်ပြင်ဆင်ကုသမှုပေးသွားမယ်လို့လည်းသိရပါတယ်။

ပြီးခဲ့တဲ့ ၂၀၁၈ ခုနှစ် သင်္ကြန်ကာလမှာ ရန်ကုန်ဆေးရုံကြီး၊ အရေးပေါ်ဌာနကို လူနာဦးရေ ၈၃၀ ကျော်ဝင်ရောက်ခဲ့ပြီး ယာဉ်မတော်တဆမှုကြောင့် လာရောက်တဲ့လူနာဦးရေက ၄၀ ရာခိုင်နှုန်းအထိ ရှိပါတယ်။ ရန်ကုန်ဆေးရုံကြီးအပြင် မြောက်ဥက္ကလာပ ပြည်သူ့ဆေးရုံကြီး၊ သင်္ဃန်းကျွန်းစံပြဆေးရုံကြီးတို့မှာ သင်္ကြန်ကာလအတွက် အရေးပေါ်ဌာန ၂၄ နာရီဖွင့်လှစ်ထားရှိတယ်လို့သိရပါတယ်။

 

 

Related News