နိုင်ငံတော်အစိုးရအနေနဲ့ လူငယ်တွေအတွက် အပြောင်းအလဲကြီးကိုခံစားရရှိဖို့အတွက် ကြိုးစားလုပ်ဆောင်နေတယ်လို့ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးက  မတ်လ(၂၅)ရက်က နေပြည်တော်မှာရှိတဲ့ မင်္ဂလာသီရီဟိုတယ်မှာ ပြုလုပ်တဲ့ လူငယ်ရေးရာမူဝါဒဆိုင်ရာ အမျိုးသားအဆင့် မဟာဗျူဟာစီမံချက်(မူကြမ်း)အတည်ပြုဆွေးနွေးပွဲမှာ ပြောကြားခဲ့ပါတယ်။ပြည်တွင်းကလူငယ်တွေအနေနဲ့ ရှေးအစဉ်အဆက်က လူငယ်တွေရဲ့ အခွင့်အရေးတွေ အပြည့်အ၀ရရှိဖို့နဲ့ ဖွံ့ဖြိုးတိုးတက်မှု တွေဟာ နှောင့်နှေးမှုတွေရှိခဲ့ပါတယ်။

လူငယ်တွေအနေနဲ့လည်းမိမိတိုရဲ့ အခွင့်အရေးတွေ ရရှိဖို့ပါဝင်ကြိုးစားဖို့လိုအပ်နေပြီး  လူငယ်တွေအားလုံး တူညီတဲ့ အခွင့်အရေးတွေကို သာတူညီမျှရရှိဖို့ လိုအပ်တယ်လို့ ပြည်ထောင်စုဝန်ကြီး ဒေါက်တာဝင်းမြတ် အေးက  ပြောပါတယ်။လူငယ်တွေအားလုံး အခွင့်အရေးတွေကို သာတူညီမျှရရှိဖို့ လူငယ်ရေးရာမူဝါဒကို ရေးဆွဲထားတယ်လို့ ပြောပါတယ်။လူငယ်တွေအတွက် ကောင်းမွန်တဲ့ အခွင့်အရေး၊ အခွင့်အလမ်းတွေ ရရှိစေနိုင်ဖို့အတွက် အချက်(၁၆) ချက်ပါဝင်တဲ့ လူငယ် မူဝါဒကို အစိုးရကဦးဆောင်ပြီး (၂၀၁၈)ဇန်န၀ါရီလမှာ အတည်ပြုထုတ်ပြန်ထားတာပါ။

လူငယ်မူဝါဒအချက် (၁၆)ချက်ထဲမှာ လူငယ်နှင့် ငြိမ်းချမ်းရေး၊ လူငယ်နှင့်ပညာရေး၊ လူငယ်နှင့် အလုပ်ကိုင်အခွင့်အလမ်း၊ လူငယ်နဲ့ နိုင်ငံရေးစသည့် အချက်များပါ ၀င်ပါတယ်။ ယခုချိန်မှာတော့ လူငယ်မူဝါဒကို အကောင်အထည်ဖော်ဆောင်ရွက်ဖို့ရာအတွက် အမျိုးသားအဆင့် မဟာဗျူဟာ တစ်ခုကို ရေးဆွဲနေပြီး  မူကြမ်းအဆင့်အထိရောက်ရှိနေပြီးဖြစ်ကာ မကြာခင်မှာ အတည်ပြုနိုင်တော့မယ်လို့ သိရပါတယ်။မြန်မာနိုင်ငံမှာ(၂၀၁၄) ခုနှစ်ကကောက်ယူခဲ့တဲ့ လူဦးရေနှင့်အိမ်အကြောင်းအရာသန်းခေါင်စာရင်းအရ မြန်မာနိုင်ငံလူဦးရေရဲ့ (၁၇ဒသမ၈၁)ရာခိုင်နှုန်းဟာအသက်(၁၅)နှစ်မှ (၂၄)နှစ်အတွင်းလူငယ်တွေဖြစ်တယ်လို့ သိရပါတယ်။

 

 

Related News