ဥပဒေနဲ့မညီတဲ့ ဆန္ဒပြမှုတွေနဲ့ ပိတ်ဆို့ဆန္ဒပြမှုတွေ ပြုလုပ်ခြင်းက အလုပ်ရှင် ၊ အလုပ်သမားတွေရဲ့အကျိုးစီးပွားကိုသာမက နိုင်ငံတော်ရဲ့အကျိုးစီးပွားကိုလည်း ထိခိုက်နစ်နာစေတယ်လို့ အလုပ်သမား ၊ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောပါတယ်။ အလုပ်ရှင် ၊ အလုပ်သမားတွေ အနေနဲ့ တည်ဆဲအလုပ်သမားဥပဒေတွေကို သိရှိလေးစားလိုက်နာရန်နဲ့  ဥပဒေပါခံစားခွင့်တွေ လိုအပ်သလို အလုပ်ရှင်များကလည်း  အလုပ်သမားတွေကို မိမိတို့ရဲ့ ရပိုင်ခွင့်တွေကို ဥပဒေနဲ့အညီ တင်ပြတောင်းခံရန် အပြည့်အ၀ပေးဖို့လိုအပ်ပါတယ်။  ပြေလည်မှုမရှိပါက သတ်မှတ်ထားတဲ့ ဥပဒေပါလုပ်ငန်းစဉ်တွေအတိုင်း လုပ်ဆောင်သင့်တယ်လို့ အလုပ်သမား ၊ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ ကပြောပါတယ်။

ပြည်တွင်းမှာ အလုပ်ရှင်နဲ့ အလုပ်သမားတွေကြား ဖြစ်ပွားနေတဲ့ ပြဿနာတွေကို ဖြေရှင်းပေးနိုင်ရေးအတွက် ရည်ရွယ်ပြီး အလုပ်ရှင် ၊ အလုပ်သမား ပဋိပက္ခမှုများနှင့် ပတ်သက်ပြီး လိုအပ်မယ့် စည်းမျဉ်းစည်းကမ်းများဆိုင်ရာ  အလုပ်ရုံဆွေးနွေးပွဲကို ၂၀၁၉ခုနှစ် ဇန်န၀ါရီလ ၁၀ရက်က နေပြည်တော်မှာရှိတဲ့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ရုံးမှာ ပြုလုပ်ခဲ့ပါတယ်။ လုပ်ငန်းခွင်အတွင်းမှာ အငြင်းပွားမှုတွေ မဖြစ်ပေါ်ဖို့ဟာ ၀န်ကြီးဌာနအပါအ၀င် အလုပ်ရှင်တွေနဲ့ အလုပ်သမားအဖွဲ့အစည်းတွေမှာ တာဝန်ရှိပြီး အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာနအနေနဲ့ မိမိဝန်ထမ်းတွေကို ဥပဒေနဲ့အညီ ဆောင်ရွက်နိုင်ဖို့အတွက် ပညာပေးလုပ်ငန်း တွေဆောင်ရွက်နေတယ်လို့ သိရပါတယ်။

ဒါ့အပြင် အလုပ်ရှင်တွေ အနေနဲ့လည်း အလုပ်သမားတွေရဲ့ ရသင့်ရထိုက်တဲ့အခွင့်အရေးတွေကို လုပ်ခလစာတွေပေးဖို့အတွက် ညွှန်ကြားဆောင်ရွက်မှုတွေ ပြုလုပ်နေတယ်လို့သိရပါတယ်။ ယခုပြုလုပ်ခဲ့တဲ့ အလုပ်ရှင် ၊ အလုပ်သမား ပဋိပက္ခမှုများနှင့် ပတ်သက်ပြီး လိုအပ်မယ့် စည်းမျဉ်းစည်းကမ်းများဆိုင်ရာ အလုပ်ရုံဆွေးနွေးပွဲကို ပြီးခဲ့တဲ့ (၂၀၁၈)ခုနှစ် နိုဝင်ဘာလ ၁၇ ရက်ကပြုလုပ်ခဲ့တဲ့ ဒုတိယသမ္မတ (၁) နဲ့ စီးပွားရေးလုပ်ငန်းရှင်များတွေ့ဆုံစဉ် မြန်မာနိုင်ငံအထည်ချုပ်လုပ်ငန်းရှင်များအသင်းက အလုပ်သမားများ ဆန္ဒပြမှုအပေါ် ဥပဒေအရထိရောက်စွာ အရေးယူပေးရန် တင်ပြခဲ့ခြင်းကြောင့် ပြုလုပ်ခဲ့ရခြင်းဖြစ်တယ်လို့ သိရပါတယ်။

 

 

Related News