ရန်ကုန်မြို့တော်စည်ပင်သာယာရေးကော်မတီ(YCDC)ရွေးကောက်ပွဲကို မတ်လ(၃၁)ရက်မှာ ကျင်းပမှာဖြစ်ပြီး  မဲစာရင်းတွေကြေညာဖို့ကိုတော့  ဖေဖော်ဝါရီ(၁၅)ရက် နောက်ဆုံးထားကြေညာသွားမှာ ဖြစ်တယ်လို့  တိုင်းဒေသကြီးလွှတ်တော်ကိုယ်စားလှယ် ဒေါ်ကြည်ပြာက ပြောပါတယ်။ရန်ကုန်မြို့တော်စည်ပင်သာယာရေးကော်မတီအနေနဲ့ လက်ရှိမှာ ရွေးကောက်ခံ ကိုယ်စားလှယ်တွေမရှိဘဲ လုပ်ငန်းဆောင်ရွက်နေတာဟာ နှစ်နှစ်ကျော်ကြာမြင့်လာပြီးလည်းဖြစ်ပါတယ်။ ၂၀၁၈ခုနှစ်အတွင်း ရန်ကုန်မြို့တော်စည်ပင်သာယာရေးဥပဒေ (၂၀၁၈) ကို ပြင်ဆင်ပြဌာန်းနိုင်ခဲ့ပြီး နည်းဥပဒေကိုလည်း ပြင်ဆင်ရေးဆွဲခဲ့ပြီး ဖြစ်ပါတယ်။

၂၀၁၉ခုနှစ်၊မတ်လ(၃၁)ရက်မှာတော့ ရန်ကုန်မြို့တော်စည်ပင်သာယာရေးကော်မတီ(YCDC) ရွေးကောက်ပွဲကို ကျင်းပဖို့အတည်ပြုလိုက်ပြီဖြစ်တယ်လို့ တိုင်းဒေသကြီးလွှတ်တော်ကိုယ်စားလှယ် ဒေါ်ကြည်ပြာက ဇန်န၀ါရီ (၈)ရက်က ပြောကြားခဲ့ပါတယ်။ မဲဆွယ်ကာလကို ရွေးကောက်ပွဲ မကျင်းပမီ တစ်လအလိုလောက်မှာ စတင်ဖို့ရှိနေတယ်လို့ သိရပြီး ရွေးကောက်ပွဲ ကျင်းပနိုင်ဖို့အတွက် သက်ဆိုင်ဌာနတွေ၊ အဖွဲ့အစည်းတွေက စီစဉ်လုပ်ဆောင်နေပြီး မဲစာရင်းတွေကို ဖေဖော်ဝါရီ(၁၅)ရက်မှာ နောက်ဆုံထားကြေညာသွားမှာဖြစ်တယ်လို့လည်းပြောပါတယ်။

ဒီရွေးကောက်ပွဲကို စည်ပင်သာယာနယ်နမိတ်အတွင်းက မြို့နယ်(၃၃)မြို့နယ်မှာ ကျင်းပပြုလုပ်သွားမှာဖြစ်ပြီး ကော်မတီဝင်(၁၁)ဦးအနက် (၆)ဦးကိုရွေးချယ်တင်မြှောက်ရမှာလည်းဖြစ်ပါတယ်။ရန်ကုန်မြို့တော်စည်ပင်သာယာရေးကော်မတီကို ကော်မတီဝင်(၁၁)ဦးနဲ့ဖွဲ့စည်းရမှာဖြစ်ပြီး ဒီ(၁၁)ဦးမှာ (၅)ဦးက အစိုးရကရွေးချယ်တင်မြှောက်ပြီး ကျန်ကော်မတီဝင်(၆)ဦးကို ပြည်သူတွေကရွေးချယ်တင်မြှောက် ရမှာဖြစ်ပါတယ်။ ဥပဒေအရ မြို့တော်ဝန်အပြင် ဒုတိယစည်ပင်သာယာရေးဝန်ကြီးလည်းဖြစ်မယ့် ဒုတိယမြို့တော်ဝန်ကို ထားရှိရမှာဖြစ်ရမှာဖြစ်ပါတယ်။

ဒုတိယမြို့တော်ဝန်ကိုတော့ ဒီကော်မတီဝင်(၁၁)ဦးက ရွေးကောက်တင်မြှောက်ပေးရမှာလည်း ဖြစ်ပါတယ်။ ရန်ကုန်မြို့တော်စည်ပင်သာယာရေး ကော်မတီကို တာဝန်ခံအဖွဲ့(၇)ဖွဲ့နဲ့ ဌာနကြီး(၃)ခုကို ဖွဲ့စည်းကာ ထိန်းညှိပေးသွားမှာဖြစ်တယ်လို့ သိရပါတယ်။ရန်ကုန်မြို့တော်စည်ပင်သာယာရေးဥပဒေကို ၂၀၁၈ ခုနှစ်ဇွန်လ(၂၇)ရက်မှာ လွှတ်တော်က အတည်ပြုပေးခဲ့တာဖြစ်ပါတယ်။ ဇွန်လ(၂၈)ရက်မှာတော့  ရန်ကုန်မြို့တော်ခန်းမမှာ  ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက အတည်ပြုလက်မှတ်ရေးထိုးပြဌာန်းပေးခဲ့ပြီး ဒီဥပဒေကို ရန်ကုန်မြို့တော်ဝန်သို့ လွှဲပြောင်းပေးအပ်ခဲ့တာလည်းဖြစ်ပါတယ်။ လွှဲပြောင်းပေးအပ်တဲ့နေ့မှာဘဲ ရန်ကုန်မြို့တော်ဝန် ဦးမောင်မောင်စိုးက(YCDC)ရွေးကောက်ပွဲကို ၂၀၁၉ ခုနှစ်အတွင်းမှာ ကျင်းပဖြစ်အောင်လုပ်ဆောင်သွားမယ်လို့ လည်း ပြောကြားခဲ့တာဖြစ်ပါတယ်။

 

 

Related News