မြန်မာနိုင်ငံ အင်ဂျင်နီယာကောင်စီမှ ဦးစီးကျင်းပတဲ့ ပြည်တွင်း ပြည်ပမှ အင်ဂျင်နီယာပညာရှင်များအား အင်ဂျင်နီယာ မှတ်ပုံတင်လက်မှတ်ပေးအပ်မှုကို ဇန်န၀ါရီလ (၆)ရက်က ရန်ကုန်မြို့ လမ်းမတော်မြို့နယ်မှာရှိတဲ့ မြန်မာနိုင်ငံ အင်ဂျင်နီယာကောင်စီမှာ ပြုလုပ်ခဲ့ပါတယ်။ပြည်တွင်းမှာရှိတဲ့ အင်ဂျင်နီယာတွေ စွမ်းရည်ကဏ္ဍဖွံ့ဖြိုးတိုးတက်လာစေရန်၊ အင်ဂျင်နီယာလုပ်ငန်းတွေမှာ အင်ဂျင်နီယာမှတ်ပုံတင်လက်မှတ်ရရှိသူတွေအနေနဲ့ အများပြည်သူနဲ့ ဆက်စပ်တဲ့လုပ်ငန်းတွေကို လုပ်ကိုင်နိုင်စေရန် ရည်ရွယ်ပြုလုပ်တာဖြစ်တယ်လို့သိရပါတယ်။အင်ဂျင်နီယာမှတ်ပုံတင်လက်မှတ်ပေးအပ်ရာမှာတော့  ပြည်တွင်းကအင်ဂျင်နီယာတွေကို လက်မှတ်ပေးအပ်ခဲ့တာ တွေအပြင်  ထိုင်ဝမ်နိုင်ငံမှ အင်ဂျင်နီယာပညာရှင်နဲ့ ဂျပန်နိုင်ငံမှ အင်ဂျင်နီယာပညာရှင်တို့ကိုလည်း လက်မှတ်ပေးအပ်ခဲ့ပါတယ်။ ပြည်ပနိုင်ငံမှ အင်ဂျင်နီယာပညာရှင်တွေကို အင်ဂျင်နီယာမှတ်ပုံတင်လက်မှတ်ပေးအပ်ရတာဟာ  ပြည်တွင်းမှာအလုပ်လုပ်နိုင်စေဖို့အတွက်  ပေးအပ်ခဲ့တာဖြစ်တယ်လို့သိရပါတယ်။

အင်ဂျင်နီယာမှတ်ပုံတင်လက်မှတ်ပေးအပ်ရာမှာ အာဆီယံ ပဋိညာဉ်ခံ အင်ဂျင်နီယာ ပညာရှင်လက်မှတ်၊ မှတ်ပုံတင် ကန့်သတ်အင်ဂျင်နီယာ ပညာရှင်လက်မှတ်၊မှတ်ပုံတင်အင်ဂျင်နီယာပညာရှင်လက်မှတ်၊ မှတ်ပုံတင်အကြီးတန်းအင်ဂျင်နီယာလက်မှတ် စတာတွေကိုပေးအပ်ခဲ့တာဖြစ်ပါတယ်။အင်ဂျင်နီယာလက်မှတ်ထုတ်ပေးမှုကို  (၂၀၁၃)ခုနှစ်က စတင်ပြီး ပြည်တွင်းမှာပေးအပ်ခဲ့တာဖြစ်ပြီး  အင်ဂျင်နီယာ ပညာရှင်တွေအနေနဲ့ အာဆီယံနိုင်ငံတွေမှာ သွားရောက်လုပ်ကိုင်နိုင်မှာဖြစ်တယ်လို့ သိရပါတယ်။ အင်ဂျင်နီယာ မှတ်ပုံတင်လက်မှတ်ပေးအပ်မှုမှာ ကုမ္ပဏီအဆင့် သတ်မှတ်ချက်ဆိုင်ရာ အသိအမှတ်ပြု လက်မှတ်ပေးအပ်တာပါ ပါဝင်ခဲ့ပြီး ကုမ္ပဏီအဆင့်သတ်မှတ်ချက်မှာတော့ ဘေးအန္တရာယ်ကင်းရှင်းရေး၊ လုပ်ထုံးလုပ်နည်းတွေနဲ့အညီ ရွေးချယ်ပေးအပ်ခဲ့တာဖြစ်တယ်လို့သိရပါတယ်။

 

Related News