(၂၀၁၉) နှစ်အကုန်မှာ ကျောက်တံတားမြို့နယ်ကို ဆေးလိပ်ငွေ့ကင်းစင်နယ်မြေအဖြစ် သတ်မှတ်ဖို့ရန်ကုန်တိုင်း ဒေသကြီးအစိုးရအဖွဲ့၊ ကျောက်တံတားမြို့နယ် အထွေထွေအုပ်ချုပ်ရေး ဦးစီးဌာနတို့နဲ့ပူးပေါင်း ဆောင်ရွက်နေတယ်လို့ ပြည်သူ့ကျန်းမာရေးဖောင်ဒေးရှင်း ဥက္ကဋ္ဌ ဒေါက်တာသန်းစိန်က ပြောပါတယ်။ ပြီးခဲ့တဲ့ (၂၀၁၈) ခုနှစ်ကတည်းက ကျောက်တံတားမြို့နယ်မှာ ဆေးလိပ်ငွေ့ကင်းစင်ရေး စီမံချက်တွေ လုပ်ဆောင်နေတာဖြစ်ပြီး ဒီလို ဆောင်ရွက်နေမှုကို ဇန်နဝါရီလ (၆) ရက်က မဟာဗန္ဓုလပန်းခြံထဲမှာ လူထုကို တရားဝင်အသိပေးတဲ့ အခမ်းအနားပြုလုပ်ခဲ့ပါတယ်။ အဆိုပါ အခမ်းအနားကိုတော့ ရန်ကုန်မြို့တော်ဝန် ဦးမောင်မောင်စိုး တက်ရောက်ခဲ့ပြီး ဆေးလိပ်နှင့် ဆေးရွက်ကြီးသုံးစွဲမှုထိန်းချုပ်ရေး အသိပညာပေးတာတွေ ဆောင်ရွက်ခဲ့ပါတယ်။ (၂၀၀၆) ခုနှစ် မြန်မာနိုင်ငံ ဆေးလိပ်ဆေးရွက်ကြီးထွက်ပစ္စည်းသောက်သုံးမှု ထိန်းချုပ်ရေးဥပဒေပါ ပြဋ္ဌာန်းချက်တွေမှာ ဆေးလိပ်မသောက်ရနယ်မြေတွေသတ်မှတ်ထားပေမယ့် လိုက်နာဆောင်ရွက်မှုအားနည်းနေတာကြောင့်ကျောက်တံတားမြို့နယ်ကိုစံပြအဖြစ်သတ်မှတ်ပြီး 
ဆေးလိပ်ငွေ့ကင်းစင်ရေးနယ်မြေအဖြစ်ဖော်ထုတ်မှာပဲဖြစ်ပါတယ်။ 

ကျောက်တံတားမြို့နယ်မှာ ဆေးလိပ်ငွေ့ကင်းစင်ရေးလုပ်ငန်းတွေ မဆောင်ရွက်ခင် ဆေးလိပ်မသောက်ရနယ်မြေတွေမှာ လိုက်နာမှု ရှိရဲ့လားဆိုတာကို ကွင်းဆင်းကောက်ခံခဲ့ရာ (၃၀) ရာခိုင်နှုန်းကသာ လိုက်နာမှုရှိပြီး (၇၀) ရာခိုင်နှုန်းက မလိုက်နာပဲ ဆေးလိပ်သောက်နေကြတယ်လို့သိရပါတယ်။ ဒါကြောင့် ကျောက်တံတားကို ဆေးလိပ်ငွေ့ကင်းစင်ရေးနယ်မြေအဖြစ် သတ်မှတ်နိုင်ဖို့ လုပ်ဆောင်နေတဲ့ကာလအတွင်း ကျောက်တံတားမြို့ထဲက ဆေးလိပ်မသောက်ရနယ်မြေတွေထဲမှာ ဆေးလိပ်မသောက်ဖို့ ပညာပေးလုပ်ငန်းတွေ ဆောင်ရွက်သွားမယ်လို့သိရပါတယ်။ ရန်ကုန်မြို့တော်စည်ပင်သာယာနယ်နမိတ်ထဲက မြို့နယ် (၃၃) ခုကို ဆေးလိပ်မသောက်ရနယ်မြေတွေအဖြစ် သတ်မှတ်နိုင်ရေးအတွက် ကျန်းမာရေးနှင့်အားကစားဝန်ကြီးဌာန၊ ရန်ကုန်တိုင်းဒေသကြီးအစိုးရအဖွဲ့နဲ့ ပြည်သူ့ကျန်းမာရေးဖောင်ဒေးရှင်းတို့က ငါးနှစ်တာစီမံကိန်းနဲ့ ဆောင်ရွက်နေတယ်လို့သိရပါတယ်။ 


 

Related News