မြန်မာ့စီးပွားရေးဖွံ့ဖြိုးတိုးတက်မှုနှုန်းဟာ ပြီးခဲ့တဲ့ဘဏ္ဍာနှစ်နဲ့ယှဉ်ရင် အခုဘဏ္ဍာနှစ်မှာ အနည်းငယ်လျော့ကျသွားနိုင် တယ်လို့ ကမ္ဘာ့ဘဏ်က ခန့်မှန်းထားပါတယ်။ ဒါပေမယ့် ဒါဟာ ဒေသတွင်းနဲ့ နိုင်ငံတကာမှာတော့ အားကောင်းတဲ့ တိုးတက်မှုနှုန်းအဖြစ် ရှိနေသေးတယ်လို့ကမ္ဘာ့ဘဏ်ရဲ့မြန်မာ့စီးပွားရေးစောင့်ကြည့်အစီရင်ခံစာမှာဖော်ပြထားပါတယ်။ 

မနှစ်က၂၀၁၇-၂၀၁၈ဘဏ္ဍာနှစ်မှာ မြန်မာ့စီးပွားရေးဟာ (၆.၈)ရာခိုင်နှုန်းအထိတိုးတက်ခဲ့ပေမယ့် အခုလက်ရှိ ၂၀၁၈-၂၀၁၉ ဘဏ္ဍာနှစ်မှာတော့ (၆.၂)ရာခိုင်နှုန်းကို အနည်းငယ်ကျဆင်းသွားမယ်လို့ကမ္ဘာ့ဘဏ်ကခန့်မှန်းပါတယ်။ ဒါဟာကမ္ဘာလုံး ဆိုင်ရာ စီးပွားရေးနှေးကွေးမှုနဲ့မြန်မာ့စီးပွားရေးပြုပြင်ပြောင်းလဲမှုပေါ်မူတည်တယ်လို့ ဖော်ပြထားပါတယ်။ 

ကုမ္ပဏီဥပဒေသစ်ပြောင်းလဲကျင့်သုံးတာ ၊ ဘဏ်လုပ်ငန်းဖြေလျော့တာ ၊ Belt and Road စီမံကိန်းလို အခွင့်အလမ်းတွေကြောင့် ၂၀၂၀-၂၀၂၁ မှာတော့ မြန်မာ့စီးပွားရေးတိုးတက်မှုနှုန်းကအကောင်းဘက်မှာ ဆက်ရှိနိုင်ပြီး (၆.၆)ရာခိုင်နှုန်းရှိနိုင်တယ်လို့ ခန့်မှန်းထားပါတယ်။ဒါပေမယ့်ရခိုင်ကိစ္စအပါအ၀င် ဥရောပနိုင်ငံတွေရဲ့ ကုန်သွယ်ရေးကင်းလွတ်ခွင့် ပြန်လည်ကန့်သတ် နိုင်တဲ့ အခြေအနေတွေက မြန်မာ့စီးပွားရေး တိုးတက်မှုအတွက်စိန်ခေါ်မှုတွေအဖြစ်ရှိလာနိုင်တယ်လို့ ကမ္ဘာ့ဘဏ်က သုံးသပ်ပါတယ်။   

ကဏ္ဍအလိုက် တိုးတက်မှုနှုန်းကလည်း စက်မှုကဏ္ဍဟာ အခုဘဏ္ဍာနှစ်မှာ မနှစ်ကထက် (၁.၂)ရာခိုင်နှုန်း လျော့ကျလာနိုင်ပြီး ၀န်ဆောင်မှုကဏ္ဍကလည်း (၀.၇)ရာခိုင်နှုန်းထပ်မံကျဆင်း နိုင်တယ်လို့ သုံးသပ်ထား ပါတယ်။ ပြီးခဲ့တဲ့(၆)လအတွင်း မြန်မာကျပ်ငွေတန်ဖိုး(၁၈)ရာခိုင်နှုန်းအထိကျဆင်းခဲ့တာကို ထောက်ပြ ထားပြီး လာမယ့်နှစ်မှာ ငွေကြေးဖောင်းပွမှုနှုန်းထပ်မံ မြင့်တက်လာနိုင်တယ်လို့ ဒီအစီရင်ခံစာကဖော်ပြထားပါတယ်။ 

ငွေလဲနှုန်းမြင့်တက်တာနဲ့ စားသောက်ကုန်ဈေးနှုန်းတွေ မြင့်တက်လာတာကြောင့် ပြီးခဲ့တဲ့နှစ်က ငွေကြေးဖောင်းပွမှုနှုန်း (၅.၅)နှုန်းရှိခဲ့ပြီး အခုဘဏ္ဍာနှစ်မှာ  (၈.၈) ရာခိုင်နှုန်း အထိဖြစ်လာနိုင်တယ်လို့ ကမ္ဘာ့ဘဏ်ခန့်မှန်းလိုက်ပါတယ်။

နောက်ဆုံးသုံးနှစ်အတွင်း နိုင်ငံခြားရင်းနှီးမြုပ်နှံမှုဝင်ရောက်တာ လျော့ကျလာတာလည်း ရေရှည်မြန်မာ့ စီးပွားရေးအတွက် စိုးရိမ်မှုရှိတယ်လို့ ကမ္ဘာ့ဘဏ်အစီရင်ခံစာမှာ ထောက်ပြထားပါတယ်။ဒါပေမယ့် မြန်မာ အစိုးရဘက် ကတော့ နှစ်(၂၀) အတွင်း ရင်းနှီးမြုပ်နှံမှုအမေရိကန်ဒေါ်လာ သန်း(၂၀၀)ကျော်အထိ ၀င်ရောက်နိုင်ဖို့ ရင်းနှီးမြုပ်နှံမှုမြှင့် တင်ခြင်းစီမံကိန်း (MIPP)ကို ရေးဆွဲလုပ်ဆောင်နေပြီး လုပ်ငန်းစတင် လုပ်ကိုင်ရလွယ်မှုအဆင့်ကိုလည်း လက်ရှိ အဆင့် (၁၇၁)ကနေ (၁၀၀)အောက်ရောက်ဖို့လုပ်ဆောင် နေတယ်လို့ အခုနှစ်အတွင်းထုတ်ပြန်ထားပါတယ်။

 

Related News