ငြိမ်းချမ်းရေးလုပ်ငန်းစဉ်အတွင်း ပစ်ခတ်တိုက်ခိုက်မှုဆိုင်ရာ စောင့်ကြည့်ရေးလုပ်ငန်းစဉ်တွေလုပ်ဆောင်ရာမှာအသုံးပြုနိုင်ဖို့ မြန်မာနိုင်ငံဆိုင်ရာ အိန္ဒိယသံရုံးမှ မော်တော်ယာဉ်(၁၀)စီးကို လှူဒါန်းခဲ့ပါတယ်။

လှူဒါန်းတဲ့အခမ်းအနားကိုတော့ ဒီဇင်ဘာ(၁၅)ရက်က ရန်ကုန်မြို့ ရွှေလီလမ်းမှာရှိတဲ့ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ(JMC)ရုံးမှာ ပြုလုပ်ခဲ့ပါတယ်။JMC-U ဥက္ကဋ္ဌ ဒုတိယဗိုလ်ချုပ် ကြီးရာပြည့်နဲ့ JMC-U ကတာဝန်ရှိသူတွေ ၊ မြန်မာနိုင်ငံဆိုင်ရာအိန္ဒိယသံရုံးက ကိုယ်စားလှယ် တွေ တက်ရောက်ခဲ့ကြပြီး မြန်မာနိုင်ငံဆိုင်ရာအိန္ဒိယ သံအမတ်ကြီး မှ အိန္ဒိယနိုင်ငံထုတ် (TATA)အမှတ်တံဆိပ် မော်တော် ယာဉ်(၁၀)စီးကို လွှဲပြောင်း လှူဒါန်းခဲ့ပါတယ်။

မြန်မာ့ငြိမ်းချမ်းရေးလုပ်ငန်းစဉ်မှာ အိန္ဒိယနိုင်ငံက ဆက်လက်ပါဝင်ကူညီပေးမှာဖြစ်တယ်လို့အိန္ဒိယသမ္မတ က ပြီးခဲ့တဲ့ရက်ပိုင်းအတွင်း ၄င်းရဲ့ မြန်မာနိုင်ငံခရီးစဉ်မှာ ပြောကြားထားတာဖြစ်ပါတယ်။ကားတစ်စီးကို ခန့်မှန်းခြေ အမေရိကန်ဒေါ်လာ နှစ်သောင်းနီးပါး တန်ဖိုးရှိပြီး ဒါဟာ ငြိမ်းချမ်းရေး လုပ်ငန်းအတွက် မြန်မာနိုင်ငံဆိုင်ရာအိန္ဒိယသံရုံးရဲ့ ပထမဆုံးမော်တော်ယာဉ် ပါဝင်လှူဒါန်းကူညီမှုဖြစ်ပါတယ်။၂၀၁၅ခုနှစ် အောက်တိုဘာ(၁၅)ရက်က အစိုးရနဲ့တိုင်းရင်းသားလက်နက်ကိုင်အဖွဲ့တွေ NCA စတင်စာချုပ် လက်မှတ်ရေးထိုး ပြီးနောက် အပစ်ရပ်စောင့်ကြည့်ရေးလုပ်ငန်းစဉ်အတွက် ပြည်ထောင်စုအဆင့်ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲ စောင့်ကြည့်ရေးကော်မတီ (JMC-U)ကို ၂၀၁၅ခုနှစ် အောက်တိုဘာ (၁၈)ရက် မှာ စတင်ဖွဲ့စည်းခဲ့တာဖြစ်ပါတယ်။ 

လက်ရှိအချိန်ထိ တစ်နိုင်ငံလုံးအတိုင်းအတာအရ  တိုင်းဒေသကြီးနဲ့ပြည်နယ်အဆင့်ကော်မတီ (JMC-S)ငါးခုနဲ့ဒေသ ဆိုင်ရာအဆင့် (JMC-L)နှစ်ခုဖွဲ့စည်းထားပြီးဖြစ်ပါတယ်။အခုလှူဒါန်းတဲ့မော်တော်ယာဉ်တွေကိုတော့ ကော်မတီအသီးသီးရဲ့ ရုံးလုပ်ငန်းတွေနဲ့ မြေပြင်ကွင်းဆင်းစောင့်ကြည့်မှုတွေအတွက် အသုံးပြုမှာဖြစ်တယ်လို့ သိရပါတယ်။

 

 

Related News