ဒေသတစ်ချို့မှာမဲရုံအခင်းအကျင်းနဲ့ မဲရလာဒ်ထုတ်ပြန်မှုလိုအပ်ချက်ရှိခဲ့ပေမယ့်ရွေးကောက်ပွဲတစ်ခုလုံး ခြုံကြည့်ရင်နိုဝင်ဘာ(၃)ရက်က ပြုလုပ်ခဲ့တဲ့ (၂၀၁၈)ကြားဖြတ် ရွေးကောက်ပွဲဟာ ပွင့်လင်းပြီး မျှတတဲ့ ရွေးကောက်ပွဲ ဖြစ်ခဲ့တယ်လို့အခုကြားဖြတ်ရွေးကောက်ပွဲကို စောင့်ကြည့်လေ့လာခဲ့တဲ့ Myanmar Election Observation Network (MEON) (မီရွန်)ကထုတ်ပြန်ပါတယ်။ဒီအဖွဲ့ဟာ အခုကြားဖြတ်ရွေးကောက်ပွဲကို ကာလရှည် စောင့်ကြည့်လေ့လာသူ(၁၅၀)နီးပါးနဲ့ရွေးကောက်ပွဲ ပြုလုပ်တဲ့(၁၃)နေရာလုံးကို စောင့်ကြည့်ခဲ့တာဖြစ်ပါတယ်။ရွေ့လျားစနစ်ကိုသုံးပြီးတစ်ဦးကိုမဲရုံ(၅)ခုနှုန်းနဲ့စုစုပေါင်း မဲရုံ(၁၃၀၀)ထဲကမဲရုံ(၇၀၀)ကို စောင့်ကြည့်ခဲ့တယ်လို့သိရပါတယ်။

အခုကြားဖြတ်ရွေးကောက်ပွဲအတွင်း ကနဦးတွေ့ရှိချက်တွေကို ရန်ကုန်မြို့လမ်း(၅၀)က မြန်မာဂျာနယ်လစ် ကွန်ယက် ရုံးခန်းမှာ နိုဝင်ဘာ(၆)ရက်နေ့က ထုတ်ပြန်ခဲ့ပါတယ်။ မဲဆန္ဒနယ်တစ်ချို့မှာ  ကြိုတင်မဲနဲ့ပတ်သက်ပြီး လိုအပ်ချက်ရှိခဲ့သလို မြစ်ကြီးနား၊မတူပီနဲ့ရသေ့တောင် မြို့နယ်တွေမှာတွေ့ရှိခဲ့တဲ့ မဲရုံအခင်းအကျင်းနဲ့မဲရေတွက်မှုဖြစ်စဉ်တွေကြောင့် မဲရုံစီမံခန့်ခွဲမှုနဲ့ဒီမိုကရေစီ ရွေးကောက်ပွဲစံနှုန်းနဲ့အညီရှိမှုအခြေအနေဟာ (၉၂)ရာခိုင်နှုန်းသာရှိခဲ့တယ်လို့ဒီအဖွဲ့ကတာဝန်ရှိသူတစ်ဦးကပြောပါတယ်။အခုကြားဖြတ်ရွေးကောက်ပွဲမှာတော့မဲလာပေးသူထက်ဝက်နီးပါးရှိခဲ့တာကြောင့် (၂၀၁၇)ကြားဖြတ်ရွေးကောက်ပွဲထက် မဲပေးမှုနှုန်းထားတိုးတက်လာခဲ့တယ်လို့ပြည်ထောင်စုရွေးကောက်ပွဲကော်မရှင်ထံက သိရပါတယ်။

ဒါပေမယ့်အခုရွေးကောက်ပွဲကျင်းပတဲ့အချိန်ဟာ အဝေးသင်စာမေးပွဲကာလဖြစ်တာကြောင့် ရွေးကောက်ပွဲ မှာပါဝင်နိုင်ဖို့ အခက်အခဲရှိခဲ့တဲ့ လူငယ်တွေလည်းရှိခဲ့ပြီး လာမယ့်ရွေးကောက်ပွဲတွေမှာတော့ ပထမဆုံးအကြိမ် မဲပေးမယ့် လူငယ်တွေအတွက်ပိုမိုထည့်သွင်းစဉ်းစားနိုင်ဖို့ Myanmar Election Observation Network အဖွဲ့ကအကြံပြုပါတယ်။ (၂၀၂၀)ခုနှစ်မှာ  မဲရုံစီမံခန့်ခွဲမှုနဲ့မဲရလာဒ်ပိုမိုမြန်ဆန်စွာထုတ်ပြန်နိုင်ပြီး ပိုမိုပြီးပြည့်စုံတဲ့ရွေးကောက်ပွဲဖြစ်လာစေဖို့ ပြည်ထောင်စုရွေးကောက်ပွဲကော်မရှင်အနေနဲ့မြို့နယ်နဲ့ကျေးရွာအဆင့်တွေမှာ ရွေးကောက်ပွဲ စွမ်းရည်မြှင့်သင်တန်းတွေထပ်ပေးဖို့ ဒီအဖွဲ့ကတိုက်တွန်းလိုက်ပါတယ်။ အခု ကြားဖြတ်ရွေးကောက်ပွဲကိုတော့နိုင်ငံရေးပါတီ (၂၄)ခုက ကိုယ်စားလှယ်(၆၂)ဦးနဲ့တစ်သီးပုဂ္ဂလ (၇)ဦး စုစုပေါင်း ကိုယ်စားလှယ် (၆၉)ဦးက ၀င်ရောက်ယှဉ်ပြိုင်ခဲ့တာဖြစ်ပြီး ရွေးကောက်ပွဲစောင့်ကြည့်ရေးအဖွဲ့(၅)ဖွဲ့ ၊ ပြင်ပစောင့်ကြည့်ရေးအဖွဲ့ (၇)ဖွဲ့ နဲ့သံရုံး (၂၂) ရုံးက စုစုပေါင်း စောင့်ကြည့်လေ့လာသူ (၁၃၉၃) ဦးက စောင့်ကြည့်ခဲ့ကြတာဖြစ်ပါတယ်။


 

Related News