မြန်မာနိုင်ငံ ၀ိဇ္ဇာနှင့်သိပ္ပံပညာရှင်အမှုဆောင်အဖွဲ့က ကြီးမှူးပြီး (၁၈)ကြိမ်မြောက်သုတေသန စာတမ်းဖတ်ပွဲကို နိုဝင်ဘာလ(၅)ရက်ကနေ (၈)ရက်ထိ  ရန်ကုန်တက္ကသိုလ်၊ ၀ိဇ္ဇာခန်းမမှာ ပြုလုပ်နေပါတယ်။ သုတေသနစာတမ်းဖတ်ပွဲမှာ မြန်မာနိုင်ငံဝိဇ္ဇာနှင့်သိပ္ပံပညာရှင်တွေအနေနဲ့ မိမိတို့တတ်ကျွမ်းတဲ့ ပညာရပ်နဲ့ နိုင်ငံတော်ကို အထောက် အကူပြုပံ့ပိုးနိုင်ရန်၊ နိုင်ငံတော်ကိုအကျိုးပြုမယ့် သုတေသနလုပ်ငန်းများဆောင်ရွက်နိုင်ပြီး သုတေသန လမ်းညွှန်မှုများပေးနိုင်ရန်၊ ၀ိဇ္ဇာနှင့်သိပ္ပံပညာရှင်မွေးထုတ်နိုင်ရေးအတွက် စီမံဆောင်ရွက်ရန်စတဲ့ ရည်ရွယ်ချက်တွေနဲ့ နှစ်စဉ်ကျင်းပပြုလုပ်နေတာ ဖြစ်ပါတယ်။ 

အဆင့်မြင့်ပညာရေးကဏ္ဍမှာ သုတေသနလုပ်ငန်းမှ ပညာရပ်ဖွံ့ဖြိုးဖို့၊ ဆရာ၊ဆရာမတွေရဲ့ ပညာအရည်အချင်းနဲ့ စွမ်းဆောင်ရည်ကို မြှင့်တင်ဖို့ ၊ သင်ကြားရေးနဲ့သင်ယူရေးမှာ အရည်အသွေးမြင့်မားလာစေဖို့အတွက် လုပ်ငန်းအဖွဲ့များဖွဲ့စည်းလုပ်ဆောင်နေတာပါ။ဒီလို ဖွဲ့စည်းလုပ်ဆောင်ရာမှာ  မြန်မာနိုင်ငံ ၀ိဇ္ဖာနှင့်သိပ္ပံပညာရှင်အဖွဲ့မှ  သင်ကြားရေးနဲ့သင်ယူရေးအဖွဲ့ ၊ သုတေသနလုပ်ငန်းလမ်းညွှန် မှုပေးရေးအဖွဲ့ ၊ ပညာပြန့်ပွားရေးနဲ့ ပညာဖြန့်ဖြူးရေးအဖွဲ့နဲ့ ပညာရှင်များပြုစုပျိုးထောင်ရေးအဖွဲ့ဆိုပြီး လုပ်ငန်းအဖွဲ့(၄)ခုဖွဲ့စည်းပြီး လုပ်ဆောင်နေတာဖြစ်ပါတယ်။  

မြန်မာနိုင်ငံ ၀ိဇ္ဇာနှင့်သိပ္ပံပညာရှင်အဖွဲ့အနေနဲ့ သုတေသနစာတမ်းဖတ်ပွဲတွေကို (၂၀၀၁)ခုနှစ်ကတည်းက ကျင်းပခဲ့တာဖြစ်ပါတယ်။ အခုပြုလုပ်တဲ့ (၁၈)ကြိမ်မြောက်သုတေသနစာတမ်းဖတ်ပွဲမှာတော့ ဘာသာရပ်(၂၅)ခုရဲ့ စာတမ်းပေါင်း (၄၈၇)စောင်ဖတ်ကြားသွား မယ်လို့သိရပါတယ်။

 

Related News