၂၀၁၈ ခုနှစ်၊ နိုဝင်ဘာ ၃ရက်မှာ ကျင်းပခဲ့တဲ့ ကြားဖြတ်ရွေးကောက်ပွဲကို စောင့်ကြည့်လေ့လာထားတဲ့ ကနဦးအစီရင်ခံစာကို ရွေးကောက်ပွဲပညာပေးရေးနှင့် စောင့်ကြည့်လေ့လာရေးမိတ်ဖက်များ (EEOP) က နိုဝင်ဘာ ၅ ရက်က Park Royal ဟိုတယ်မှာ ထုတ်ပြန်ခဲ့ပါတယ်။ ဇင်ဝင့်သူဇော် တင်ဆက်ပေးမှာပါ။ မြန်မာနိုင်ငံ ဒေသအနှံ့အပြားမှ အဖွဲ့တွေ  ပါဝင်ဖွဲ့စည်းထားတဲ့ ရွေးကောက်ပွဲပညာပေးရေးနှင့် စောင့်ကြည့်လေ့လာရေးမိတ်ဖက်များ (EEOP) က မဲဆန္ဒနယ် (၁၃)ခုကို ကာလရှည်ကြာ စောင့်ကြည့်လေ့လာသူ ၁၃ ဦးအပါအဝင် ရွေးကောက်ပွဲ ကာလတိုစောင့်ကြည့်လေ့လာသူဦးရေ ၁၄၉ ဦးနဲ့ စောင့်ကြည့်လေ့လာခဲ့ပါတယ်။

ကနဦးပေးပို့လာတဲ့ အစီရင်ခံစာပေါင်း လေးရာကျော်နီးပါးကို လေ့လာအပြီးမှာတော့ ကြားဖြတ်ရွေးကောက်ပွဲကို ဒီမိုကရေစီစံနှုန်းထားတွေအရ ငြိမ်းချမ်းစွာ ဆောင်ရွက်နိုင်ခဲ့တယ်လို့ သုံးသပ်ထားပါတယ်။ ကြားဖြတ်ရွေးကောက်ပွဲကို စောင့်ကြည့်လေ့လာခဲ့တဲ့ EEOP ရဲ့ ကနဦးအစီရင်ခံစာမှာ အမျိုးသမီး ရွေးကောက်ပွဲဝင် ကိုယ်စားလှယ်တွေ ပါဝင်မှုနှုန်းက ၂၀၁၇ ခုနှစ် ကြားဖြတ်ရွေးကောက်ပွဲနဲ့ နှိုင်းယှဉ်ပါက ၇ ရာခိုင်နှုန်းလျော့ကျသွားတာတွေ့ရပြီး ရွေးကောက်ပွဲအပေါ်မှာ လူငယ်တွေ စိတ်ဝင်စားမှု နည်းပါးတာကိုလည်း တွေ့ရတယ်လို့ ဆိုပါတယ်။ 

ကြားဖြတ်ရွေးကောက်ပွဲကို အသက်အရွယ်ကြီးတဲ့သူတွေနဲ့အမျိုးသမီးတွေသာ အများဆုံးလာရောက် မဲပေးခဲ့ပြီး လူငယ်တွေ လာရောက်မဲပေးမှု မတွေ့ခဲ့ရကြောင်း ဆိပ်ကမ်းမြို့နယ်က မဲရုံတွေမှာ စောင့်ကြည့်လေ့လာခဲ့သူ ဦးတင်ထွန်းအောင်က ပြောပါတယ်။ ကနဦး အစီရင်ခံစာမှာတော့ ကြားဖြတ်ရွေးကောက်ပွဲအတွက် တိုင်းဒေသကြီးနဲ့ ပြည်နယ်ကိုးခုက မဲပေးခဲ့သူ လေးဆယ်ရာခိုင်နှုန်းဝန်းကျင်ရှိတယ်လို့ သိရပါတယ်။ 

EEOP က ကြားဖြတ်ရွေးကောက်ပွဲကာလအတွင်း မဲရုံဖွင့်လှစ်တာ၊ မဲပေးတာ၊ မဲရုံပိတ်သိမ်းတာနဲ့ မဲရေတွက်တာတွေကို စောင့်ကြည့်လေ့လာခဲ့ပြီး လေ့လာတွေ့ရှိချက်တွေကို ELMO အချက်အလက်ပေးပို့မှု ဆော့ဖ်ဝဲလ်နဲ့ ပေးပို့စုစည်းရယူခဲ့တယ်လို့သိရပါတယ်။ ကနဦးအစီအရင်ခံစာအပြင် ထပ်မံရောက်ရှိလာတဲ့ အစီရင်ခံစာတွေကို စုစည်းသုံးသပ်ပြီးရင် ၂၀၁၈ ခုနှစ်၊ ကြားဖြတ်ရွေးကောက်ပွဲ နောက်ဆုံးအစီရင်ခံစာ ထုတ်ပြန်ဦးမယ်လို့သိရပါတယ်။ 


 

Related News