(၂၀၁၈)ကြားဖြတ်ရွေးကောက်ပွဲ အဆင်ပြေချောမွေ့စွာ ကျင်းပနိုင်ခဲ့တယ်လို့ ဆိုပေမယ့် တိကျခိုင်မာတဲ့ လုပ်ငန်းလမ်းညွှန်မှု မရှိတာကြောင့် ရွေးကောက်ပွဲစီမံခန့်ခွဲမှုမှာ လိုအပ်ချက်တွေရှိနေသေးတာကိုတွေ့ရတယ်လို့ ၂၀၁၈ခုနှစ် ကြားဖြတ် ရွေးကောက်ပွဲ စောင့်ကြည့်လေ့လာမှု ကနဦး အစီရင်စာက ထုတ်ပြန်ပြောကြားခဲ့တာပါ။ သက်စိုးအောင်က တင်ဆက် ပေးမှာဖြစ်ပါတယ်။ရွေးကောက်ပွဲနေ့ဖြစ်စဉ်တစ်ခုလုံးရဲ့ ပွင့်လင်းမြင်သာမှု၊ အားလုံးပါဝင်နိုင်မှု၊ တာဝန်ယူမှုစတဲ့ အရည်အသွေးတွေကို စနစ်တကျအကဲဖြတ်နိုင်ဖို့ ရွေးကောက်ပွဲဆိုင်ရာ ပြည်သူ့လှုပ်ရှားမှုအဖွဲ့(PACE)နှင့် ဖန်တီးအိမ်အဖွဲ့(PTE)တို့က စောင့်ကြည့်လေ့လာမှုတွေပြုလုပ်ခဲ့ပြီး ကနဦးအစီရင်ခံစာအဖြစ်ထုတ်ပြန်ကာ နိုဝင်ဘာလ(၄)ရက်က ဆူးလေရှန်ဂရီလာဟိုတယ်မှာ သတင်းမီဒီယာတွေနဲ့ တွေ့ဆုံပြီး ရှင်းလင်းပြောကြားခဲ့ပါတယ်။ မဲဆန္ဒနယ် (၁၃)ခုမှာ (၁၂)ခုကို စောင့်ကြည့်လ့လာမှုတွေပြုလုပ်ခဲ့တာဖြစ်ပါတယ်။

စောင့်ကြည့်လေ့လာမှုတွေအရ  ထူးခြားတဲ့ဖြစ်ရပ်တွေ မတွေ့ရဘဲ  မဲပေးတဲ့ဖြစ်စဉ်တွေကတော့  အဆင်ပြေ ချောမွေ့တယ်လို့ ဆိုနိုင်တယ်လို့လည်း ရှင်းလင်းပြောကြားပါတယ်။ ဒါပေမယ့် လုပ်ထုံလုပ်နည်း၊ စီမံခန့်ခွဲမှုတွေနဲ့ ပတ်သက်လို့တော့ တိုးတက်မှုကြီးကြီးမားမား မတွေ့ရတဲ့အပြင် တိကျခိုင်မာတဲ့ လုပ်ငန်းလမ်းညွှန်မရှိတာကြောင့် ရွေးကောက်ပွဲစီမံခန့်ခွဲမှုမှာ လိုအပ်ချက်တွေရှိနေသေးတာကို တွေ့ရတယ်လို့လည်း ပြောပါတယ်။ အဓိကအနေနဲ့ မဲရုံအခင်းအကျင်းမှာ မသန်စွမ်း မဲဆန္ဒရှင်တွေအတွက်  အလွယ်တကူ လာရောက်မဲပေးဖို့ခက်ခဲနေတာ၊ ရွေးကောက်ပွဲစောင့်ကြည့် လေ့လာသူတွေနဲ့ပတ်သက်လို့ မဲရုံတွေရဲ့သိရှိမှုအားနည်းတာ၊ မဲစာရင်းမှာ အားနည်းချက်တွေရှိနေသေးတာ၊ မဲရုံတာဝန်ရှိသူတွေက လုပ်ထုံးလုပ်နည်းတွေအတိုင်း လိုက်နာမှု အားနည်းတာတွေကို တွေ့ရတယ်လို့ ဆိုပါတယ်။ 

ဒီအချက်တွေနဲ့ပတ်သက်လို့ မဲရုံတာဝန်ရှိသူတွေကို ပိုမိုထိရောက်တဲ့ သင်တန်းတွေပေးခြင်းဖြင့်  အားနည်းချက်အချို့ကို ဖြေရှင်းနိုင်မယ်လို့လည်း ဆိုပါတယ်။ ရွေးကောက်ပွဲဆိုင်ရာ ပြည်သူ့လှုပ်ရှားမှုအဖွဲ့(PACE)နှင့် ဖန်တီးအိမ်အဖွဲ့(PTE)တို့က ကာလတိုစောင့်ကြည့်လေ့လာသူ အယောက်(၅၈၀) နီးပါးကို မဲဆန္ဒနယ်(၁၂)ခုကို စေလွှတ်ပြီး မဲရုံအပြင်အဆင် အပါအ၀င် မဲပေးတာ၊မဲရုံပိတ်တာ၊ နဲ့မဲရေတွက်တာစတဲ့ ရွေးကောက်ပွဲနေ့ဖြစ်စဉ်တစ်ခုလုံးကို ရွေးကောက်ပွဲနေ့စောင့်ကြည့်လေ့လာမှု ပုံစံတွေ အသုံးပြုပြီး စောင့်ကြည့်ခဲ့တာဖြစ်တယ်လို့သိရပါတယ်။

မဲပေးမှုတွေ မစတင်မီ မဲရုံတွေအတွင်းကိုဝင်ရောက်ကာ မဲရုံခင်းကျင်းပြင်ဆင်တာတွေကို စောင့်ကြည့်လေ့လာခွင့် မရတဲ့ပမာဏဟာ စောင့်ကြည့်လေ့လာသူအာလုံးရဲ့(၄)ရာခိုင်နှုန်းရှိပြီး နောက်ပိုင်းမှာကော်မရှင်အဖွဲ့ခွဲတာဝန်ရှိသူတွေနဲ့ ညှိနှိုင်းဆောင်ရွက်မှုကြောင့် စောင့်ကြည့်လ့လာခွင့်ရတာ၊ မဲရုံတွေရဲ့ (၈၉)ရာခိုင်နှုန်းမှာ ကြိုတင်မဲပုံးတွေ မဲရုံမဖွင့်လှစ်မီကပင်  ရောက်ရှိနေပေမယ့် ကျန်(၁၁)ရာခိုင်နှုန်းကတော့ ကြိုတင်မဲပုံးတွေမဲရုံမဖွင့်မီ ရောက်ရှိလာတာကို မတွေ့ရှိရသလို မဲရုံပိတ်ချိန်ထိ မရောက်ရှိသေးတာတွေ၊  ဘီးတပ်ကုလားထိုင်နဲ့လာတဲ့ မဲဆန္ဒရှင်တွေအတွက်  အဆင်ပြေလွယ်ကူစွာ ဆန္ဒပြုခန်းပြင်ဆင်ထားမှုမှာတော့ မဲရုံတွေရဲ့(၄၄)ရာခိုင်နှုန်းသာရှိတယ်လို့ ကနဦးအစီရင်ခံစာမှာ ရာခိုင်နှုန်းတွေနဲ့တိကျစွာဖော်ပြထားပါတယ်လို့သိရပါတယ်။


 

Related News