ကမ္ဘာတစ်ဝှမ်းက ချည်မျှင်နှင့်အထည်အလိပ်ဆိုင်ရာ နည်းပညာတွေ ပြသမယ့် သတ္တမအကြိမ်မြောက် မြန်မာ့အပြည်ပြည်ဆိုင်ရာ ချည်မျှင်နှင့် အထည်အလိပ်ဆိုင်ရာ စက်ပစ္စည်းပြပွဲကို လာမယ့် ဒီဇင်ဘာ ၆ ရက်ကနေ ၉ ရက်အတွင်း ရန်ကုန်ကွန်ဗင်းရှင်းစင်တာခန်းမအသစ်တွင် ကျင်းပပြုလုပ်သွားမယ်လို့ ပြပွဲ အကြိုသတင်းစာရှင်းပွဲက သိရပါတယ်။ သတ္တမအကြိမ်မြောက် မြန်မာ့အပြည်ပြည်ဆိုင်ရာ ချည်မျှင်နှင့် အထည်အလိပ် ဆိုင်ရာ စက်ပစ္စည်းပြပွဲမှာ ဂျပန်၊ တရုတ်၊ ဟောင်ကောင်၊ စင်ကာပူ၊ ဂျာမနီစတဲ့ နိုင်ငံများက အထည်ချုပ် လုပ်ငန်းသုံး အဆင့်မြင့် စက်ပစ္စည်းတွေကို ပြသသွားမယ်လို့သိရပါတယ်။ အဆိုပါ စက်ရုံသုံး စက်ကိရိယာတွေက ကြီးမားပြီး သယ်ယူရအခက်အခဲ ရှိတာကြောင့် ပြပွဲအတွင်း စက်အကြောင်းကို ပရိုဂျက်တာနဲ့ ရှင်းလင်းတင်ပြမယ်လို့သိရပါတယ်။

ပြည်တွင်းလုပ်ငန်းရှင်တွေက အဆိုပါစက်ပစ္စည်းတွေကို ဝယ်ယူချင်ရင်တော့ စမ်းသပ်ကာလအနေနဲ့ တစ်ပတ်ကနေ တစ်လအတွင်း ပေးသုံးသွားမှာဖြစ်ပြီး လုပ်ငန်းနဲ့ကိုက်ညီမှုရှိမှ ဝယ်ယူရန် ငွေပေးချေရမယ့် အခွင့်အရေးတွေ ရှိတယ်လို့ မြန်မာနိုင်ငံချည်မျှင်နှင့် အထည်အလိပ်လုပ်ငန်းရှင်များအသင်းက ပြောပါတယ်။ 

ပြပွဲကိုတော့ ရန်ကုန်ကွန်ဗင်းရှင်းစင်တာ ခန်းမအသစ်မှာ ပြုလုပ်သွားမှာဖြစ်ပြီး ပြခန်းပေါင်း ၁၅၀ ကျော်ပါဝင်မယ်လို့သိရပါတယ်။ ဒီပြပွဲကို Yorkers ကုန်သွယ်ရေးနှင့် ဈေးကွက်ဝန်ဆောင်မှုကုမ္ပဏိလီမိတက်နဲ့ မြန်မာနိုင်ငံ အထည်ချုပ်လုပ်ငန်းရှင်များအသင်း၊ မြန်မာနိုင်ငံ ချည်မျှင်နှင့် အထည်အလိပ်လုပ်ငန်းရှင်များအသင်းတို့က ဦးဆောင်ပြုလုပ်တာဖြစ်ပြီး UMFCCI က ပံ့ပိုးကူညီပေးထား တာဖြစ်ပါတယ်။ 

မြန်မာ့အပြည်ပြည်ဆိုင်ရာချည်မျှင်နှင့် အထည်အလိပ်ဆိုင်ရာ စက်ပစ္စည်းပြပွဲကြီး ကို အရင်ကတည်းက Yorkers ကုန်သွယ်ရေးနှင့် ဈေးကွက်ဝန်ဆောင်မှုကုမ္ပဏိလီမိတက်နဲ့ လက်တွဲပြုလုပ်ခဲ့တာဖြစ်ပြီး ဆဋ္ဌမအကြိမ်ထိ ပြုလုပ်ပြီးဖြစ်တယ်လိုသိရပါတယ်။ 

 

Related News