ပြည်သူ့ကျန်းမာရေးဖောင်ဒေးရှင်းနဲ့ မြန်မာဂျပန်ပူးပေါင်းဆောင်ရွက်ရေးအဖွဲ့ (MJCP) တို့ ပူးပေါင်း ဆောင်ရွက်တဲ့ Akane Scholarship (အဲကာနဲ စကောလားရှစ်) အစီအစဉ်ကို ဧရာဝတီတိုင်း၊ ကျောင်းကုန်းမြို့မှာ အကောင်အထည် ဖော်ခဲ့ပြီး အဲ့ဒီအစီအစဉ်ကနေ အရန်သားဖွား သင်တန်းဆင်းဦးရေ ရှစ်ဆယ်ကျော် သင်ကြားပေးထားနိုင်ခဲ့ပါတယ်။

Akane ပညာသင်ဆု အစီအစဉ်က ဆေးရုံဆေးခန်းတွေနဲ့ ဝေးလံတဲ့ အရပ်ဒေသတွေမှာ မိခင်နှင့်ကလေး ကျန်းမာရေးကို စောင့်ရှောက်ကြပ်မတ်ပေးနိုင်မဲ့ စေတနာ့ဝန်ထမ်း အရန်သားဖွားဆရာမတွေကို မွေးထုတ်ပေးတာပဲဖြစ်ပါတယ်။ အဲ့ဒီအစီအစဉ်ကို မြန်မာနိုင်ငံမှာ ၂၀၁၄ ခုနှစ်တည်းက စတင်ခဲ့ပြီး ဧရာဝတီတိုင်း၊ ကျောင်းကုန်ုးမြို့နယ်က ကျေးရွာနေအမျိုးသမီးတွေကို အရန်သားဖွားဆရာမအဖြစ် လေ့ကျင့်သင်ကြားပေးခဲ့တာပါ။ တစ်နှစ်ကို သင်တန်းသူ နှစ်ဆယ်နဲ့ ခြောက်လ သင်ကြားပေးပြီး ယခု ၂၀၁၈ ခုနှစ်မှာတော့ အရန်သားဖွား သင်တန်းဆင်း ရှစ်ဆယ်ကျော် အထိ မွေးထုတ်ပေးနိုင်ခဲ့ပါတယ်။ အဲ့ဒီ သင်တန်းဆင်း အရန်သားဖွားဆရာမတွေကတော့ အခုဆိုရင် ကျေးရွာပေါင်း ၉၅ ရွာမှာ ကူညီကုသပေးနေပြီ ဖြစ်ပါတယ်။ 

ဘာသာပြန်- ကျွန်တော်တို့အဖွဲ့က မြန်မာနိုင်ငံရဲ့ ကျန်းမာရေးကဏ္ဍမှာ ပါဝင်ပက်သက်ကူညီနေခဲ့တာ နှစ်ပေါင်း သုံးဆယ်ကျော်နေပြီ။ အဲ့ဒီမှာ သတိထားမိတာကတော့ မြန်မာနိုင်ငံမှာ မီးဖွားရင်း မိခင်နဲ့ ကလေး သေဆုံးနှုန်းက ဂျပန်နိုင်ငံထက် အဆငါးဆယ်လောက်ကို မြင့်နေတယ်။ ဒါဘာကြောင့် ဖြစ်နေလဲ စုံစမ်းလိုက်တော့ ဝေးလံခေါင်ဖျားတဲ့ ကျေးရွာနေအမျိုးသမီးအများစုမှာ ကျန်းမာရေး ဗဟုသုတွေ မပြည့်စုံတာ၊ ဆေးရုံဆေးခန်းနဲ့ အလှမ်းဝေးတာ၊ ရွာမှာ ကျွမ်းကျင် ကျန်းမာရေး ဝန်ထမ်းမရှိတာ စတဲ့ အခက်အခဲတွေကြောင့် မီးဖွားရင်း သေဆုံးနေကြတာတွေ့ရပါတယ်။ ဒါကြောင့်ပဲ ကျွန်တော်တို့က ကျေးရွာနေအမျိုးသမီးချင်း ဖေးမကူညီနိုင်အောင် ဒီလို သားဖွားဆရာမသင်တန်းတွေ ပို့ချပေးခဲ့တာပါ။ 

ပြီးခဲ့တဲ့ နှစ်တွေမှာတော့ ကျောင်းကုန်းမြို့နယ်ရှိ ကျေးရွာပေါင်း လေးရာကျော်မှာ အရန်သားဖွားဆရာမ ခြောက်ဆယ်ကျော်ကပဲ တာဝန်ယူဆောင်ရွက်ခဲ့ရတာ ဖြစ်ပါတယ်။  ဒီလို အင်အားမမျှတာကြောင့် အရန်သားဖွားဆရာမလုပ်လိုတဲ့ စေတနာ့ဝန်ထမ်းအမျိုးသမီးတွေကို ခြောက်လ သင်တန်းပေး ခဲ့တာဖြစ်ပါတယ်။ စေတနာ့ဝန်ထမ်းတွေကိုတော့ ကျေးလက်ကျန်းမာရေးဌာနခွဲနဲ့ ဝေးလံတဲ့  ကျေးရွာနေအမျိုးသမီးတွေကို ဦးစားပေး ခေါ်ယူခဲ့တယ်လို့သိရပါတယ်။ သင်တန်းပြီးသူတွေရဲ့ရပ်ရွာက ကိုယ်ဝန်ဆောင်မိခင်တွေကို ပုံမှန်စစ်ဆေးပေးတာ၊ မီးဖွားပေးတာနဲ့ မွေးကင်းစကလေးတွေကို ကြပ်မတ်စောင့်ရှောက်တာတွေ လုပ်ဆောင်နိုင်ဖို့  AMW kit တွေလည်း ပေးထားတယ်လို့ သိရပါတယ်။ 

၂၀၁၄ ခုနှစ် သန်းခေါင်းစာရင်းအရ မြန်မာနိုင်ငံက ကိုယ်ဝန်ဆောင်မိခင်ဦးရေ တစ်သိန်းမှာ မွေးဖွားပြီးတာနဲ့ မိခင် သုံးရာကျော် သေဆုံးနေပြီး မွေးပြီးစ ကလေးကတော့ တစ်ထောင်ကျော် သေဆုံးလျက်ရှိတယ်လို့သိရပါတယ်။ အဆိုပါ ကလေးမွေးဖွားပြီး သေဆုံးနှုန်းက အရှေ့တောင်အာရှနိုင်ငံတွေထဲမှာ အမြင့်ဆုံးဖြစ်တယ်လို့ သိရပါတယ်။ 

 

 

Related News