နိုဝင်ဘာ(၃)ရက်မှာ ပြုလုပ်မယ့် ၂၀၁၈ ကြားဖြတ်ရွေးကောက်ပွဲကို အခြားရွေးကောက်ပွဲ စောင့်ကြည့် ရေးအဖွဲ့တွေအပြင် လူ့အခွင့်အရေးကော်မရှင်ကပါ  စောင့်ကြည့်သွားမယ်လို့ သိရပါတယ်။ လာမယ့် ၂၀၂၀ ရွေးကောက်ပွဲ အတွက် ကြိုတင်ပြင်ဆင်တဲ့ အနေနဲ့ အခု ကြားဖြတ်ရွေးကောက်ပွဲကို စောင့်ကြည့်တာလို့ ကော်မရှင်ရဲ့ပြောရေးဆိုခွင့်ရှိသူ ဦးယုလွင်အောင်က ပြောပါတယ်။

ကြားဖြတ်ရွေးကောက်ပွဲမှာတော့ လစ်လပ်မဲဆန္ဒနယ်က (၁၃)နေရာရှိနေပေမယ့် ကော်မရှင်ရဲ့ အင်အားအရ ယှဉ်ပြိုင်မှု အားကောင်းတဲ့ နေရာတွေဖြစ်နိုင်တဲ့ မြစ်ကြီးနား၊ မန္တလေး၊ မင်းဘူး၊ ပဲခူးနဲ့ ရန်ကုန်က မဲဆန္ဒနယ် နေရာ(၆)ခုမှာ စောင့်ကြည့်မှာ ဖြစ်တယ်လို့ သိရပါတယ်။  နိုင်ငံတကာက လူ့အခွင့်အရေးကော်မရှင်တွေရဲ့ ရွေးကောက်ပွဲစောင့်ကြည့်မှုလုပ်ငန်းစဉ်တွေကို လေ့လာသုံးသပ်ပြီး မဲပေးခွင့်အပြည့်အ၀ရရှိမှု ရှိမရှိ၊ မဲပေးရာမှာ အဆင်ပြေမပြေ၊ မဲရုံဝန်ထမ်းတွေရဲ့ အခြေအနေ၊ ရွေးကောက်ပွဲမသမာမှုတွေ ရှိမရှိ အပါအ၀င် နောက်ဆုံးမဲရေတွက်ချိန်အထိ ရွေးကောက်ပွဲတစ်နေ့တာကို စောင့်ကြည့်မယ်လို့ သိရပါတယ်။

လာမယ့် နိုဝင်ဘာကြားဖြတ်ရွေးကောက်ပွဲကိုတော့ နိုင်ငံအတွင်း  နေရာ(၁၃)ခုမှာ ကျင်းပမှာဖြစ်ပြီး မဲပေး ခွင့်ရှိသူ (၉)သိန်းကျော်ရှိနေပြီး နိုင်ငံရေးပါတီ(၂၄)ခုက ကိုယ်စားလှယ်(၆၂)ဦးနဲ့တစ်သီးပုဂ္ဂလ(၇)ဦး စုစုပေါင်း ကိုယ်စားလှယ် (၆၉)ဦးက ၀င်ရောက်ယှဉ်ပြိုင်မှာပါ။အခုကြားဖြတ်ရွေးကောက်ပွဲတွေ့ရှိချက်တွေကိုတော့ လူ့အခွင့်အရေးကော်မရှင်ရဲ့ လုပ်ငန်းစဉ်အရ နိုင်ငံတော်သမ္မတနဲ့ ပြည်ထောင်စုလွှတ်တော်ကိုတင်ပြမှာ ဖြစ်ပါတယ်။ လူ့အခွင့်အရေးကော်မရှင်မှာတော့ အဖွဲ့ဝင်(၁၀)ဦးရှိပြီး ကော်မရှင် အတွင်းရေးမှူးပါဝင်ပါက လာမယ့်(၂၀၂၀) ရွေးကောက်ပွဲမှာလည်း အများဆုံး မဲဆန္ဒနယ်(၁၁)ခု လောက်ကိုပဲ စောင့်ကြည့် နိုင်တယ့်အခြေအနေရှိတယ်လို့ သိရပါတယ်။

မြန်မာနိုင်ငံအမျိုးသား လူ့အခွင့်အရေးကော်မရှင်ကို ၂၀၁၄ စက်တင်ဘာမှာ ဖွဲ့စည်းခဲ့တာဖြစ်ပြီး ကော်မရှင် အတွက်လည်း  ပထမဆုံးရွေးကောက်ပွဲ စောင့်ကြည့်မှုဖြစ်ပါတယ်။ အခုကြားဖြတ်ရွေးကောက်ပွဲကိုတော့ လူ့အခွင့်အရေးကော်မရှင်အပြင် ရွေးကောက်ပွဲစောင့်ကြည့်လေ့လာရေး အဖွဲ့(၄)ဖွဲ့က စောင့်ကြည့်မှာဖြစ်တယ်လို့ သိရပါတယ်။

 

Related News