လျှပ်စစ်ဓာတ်အားကို လက်ရှိတစ်နိုင်ငံလုံးရဲ့ ၄၁ ရာခိုင်နှုန်းကျော်အထိ သုံးစွဲနိုင်နေပြီလို့ လျှပ်စစ်နှင့် စွမ်းအင် ၀န်ကြီးဌာန က အောက်တိုဘာလ၁၁ရက်က လျှပ်စစ်နှင့် စွမ်းအင်ဝန်ကြီးဌာနရုံးမှာ ပြုလုပ်ခဲ့တဲ့ သတင်းစာရှင်းလင်းပွဲက သိရပါတယ်။ ၂၀၁၆ခုနှစ်တုန်းက လျှပ်စစ်ဓာတ်အားကို တစ်နိုင်ငံလုံးရဲ့ ၃၆ရာခိုင်နှုန်းသာ သုံးစွဲနိုင်ခဲ့တာဖြစ်ပြီး ၂၀၁၈စက်တင်ဘာလမှာတော့   တစ်နိုင်ငံလုံးရဲ့ ၄၁ဒသမ၈ရာခိုင်နှုန်းအထိ သုံးစွဲနိုင်ပြီ ဖြစ်တယ်လို့ ဆိုပါတယ်။ ဝန်ကြီးဌာနအနေနဲ့ ၂၀၂၀-၂၀၂၁ ခုနှစ်မှာတော့ လျှပ်စစ်ဓါတ်အားကို တစ်နိုင်ငံလုးံရဲ့ ၅၀ရာခိုင်နှုန်း အထိ ရရှိအောင် ဆောင်ရွက်သွားဖို့ ပြင်ဆင်ထားတယ်လို့ လျှပ်စစ်နှင့်စွမ်းအင်ဝန်ကြီးဌာန ဒုတိယအမြဲတမ်းအတွင်းဝန် ဦးစိုးမြင့်က ပြောပါတယ်။

လက်ရှိမှာ လျှပ်စစ်နှင့်စွမ်းအင်ဝန်ကြီးဌာနက (၃၃၅၈)မဂ္ဂါဝပ်ကို ထုတ်လုပ်နိုင်တယ်လို့ သိရပါတယ်။  လျှပ်စစ်ဓာတ်အားတွေကို ရေအားလျှပ်စစ်ဓာတ်အား ပေးရုံ(၂၈)ရုံက(၂၄၀၀)မီဂ္ဂါဝပ်ကျော်နဲ့ ကျန်တာတွေကိုတော့ သဘာဝဓာတ်ငွေ့သုံးဓာတ်အားပေးစက်ရုံတွေနဲ့ ကျောက်မီးသွေးသုံး ဓာတ်အားပေးစက်ရုံတို့ကနေ ထုတ်လုပ်ရရှိ နေတယ်လို့ သိရပါတယ်။ 

မြန်မာနိုင်ငံအနေနဲ့ လက်ရှိလျှပ်စစ်ဓာတ်အား(၃၀၀၀)မဂ္ဂါဝပ် ကျော်သာထုတ်လုပ်နိုင်ပေမဲ့ လာမည့် သုံးနှစ်အတွင်းမှာ နောက်ထပ်(၃၀၀၀)မဂ္ဂါဝပ်တိုးတက်ထုတ်နိုင်မယ့်  ဦးစားပေး အစီအစဉ် တစ်ရပ် ကို ပြီးခဲ့တဲ့ ဇန်န၀ါရီလအတွင်း ချမှတ်နိုင်ခဲ့တယ်လို့ သိရပါတယ်။ ဒါကြောင့် သတ်မှတ်ထား တဲ့ လျှပ်စစ်ဓာတ်အားတွေရရှိရေးအတွက် ရေအား လျှပ်စစ်ဓာတ်အားပေးစက်ရုံ၊ သဘာဝဓာတ်ငွေ့သုံးဓာတ် အားပေးရုံတွေအပါအ၀င် နေရောင်ခြည်စွမ်းအင်သုံး ဓာတ်အားပေးစက်ရုံတွေကနေ ရရှိအောင် ဆောင်ရွက်သွားမယ်လို့ သိရပါတယ်။

 

-

Related News