မန္တလေးတိုင်းဒေသကြီး ကျောက်ဆည်ခရိုင် စဥ့်ကိုင်မြို့နယ်အတွင်းရှိ စွန်ရဲအင်းကြီးမှာ နုန်းများကျရောက်နေပြီး ဒေသဖွံဖြိုးမှုအတွက် ပြန်လည်တူးဖော်ပေးသင့်ကြောင်း ဒေသန္တရစီမံကိန်းအရ အသုံးငွေစာရင်းနှင့် ဘဏ္ဍာရေးဆိုင်ရာ ကော်မတီမှ မေလ ၂၃ ရက် ဒုတိယအကြိမ် မန္တလေးတိုင်း ဒေသကြီးလွှတ်တော် ဒသမပုံမှန်အစည်းအဝေး(ဒုတိယ)နေ့အခမ်းအနားမှာ တင်ပြဆွေးနွေးခဲ့ပါတယ်။မန္တလေးတိုင်းဒေသကြီးအစိုးရ၏ ၂၀၁၈၊ အောက်တိုဘာလ(၁)ရက် မှ ၂၀၁၉ ၊ စက်တင်ဘာလ (၃၀)ရက်အထိ ရေးဆွဲထားတဲ့  ဘဏ္ဍာငွေအရအသုံးဆိုင်ရာ ခန့်မှန်းခြေငွေ စာရင်း လျာထားချက်အားစိစစ်တင်ပြခြင်းကို ဒေသန္တရစီမံကိန်းအရအသုံးငွေစာရင်းနှင့် ဘဏ္ဍာရေးဆိုင်ရာကော်မတီမှ မန္တလေးတိုင်းဒေသကြီးလွှတ်တော် အစည်းအဝေးမှာ တင်ပြခဲ့ပါတယ်။

တင်ပြတဲ့အထဲမှာ မန္တလေးတိုင်းဒေသကြီး ကျောက်ဆည်ခရိုင်၊စဥ့်ကိုင်မြို့နယ် အတွင်းရှိ စွန်ရဲအင်းကြီး သဲနုန်းတူးဖော်ရန်အတွက် တိုင်းဒေသကြီးဘက်ဂျက်မှ ငွေလုံးငွေရင်းနှင့်(၃၁၁၁)သန်း တောင်းခံထားတယ်လို့ သိရပါတယ်။ စွန်ရဲအင်းကြီးမှာရှေးယခင်နှစ်ပေါင်းများစွာကတည်းကတည်ရှိခဲ့ပြီး ယခုအခါ နုန်းများကျရောက်ပြီး ကန်ကြီးတိမ်ကောနေပြီ ဖြစ်တယ်လို့သိရပါတယ်။ ဒါကြောင့် ကန်ကို သဲနုန်းတူးဖော်ပေးလိုက်မည်ဆိုပါကဒေသခံပြည်သူများရဲ့အကျိုးစီးပွားနဲ့ဆန္ဒကိုဖြည့်ဆီးရာရောက်ပြီးဒေသဖွံ့ဖြိုးမှုအတွက်လည်းကူညီရာ ရောက်မှာ ဖြစ်တာကြောင့် စွန်ရဲအင်းကိုပြန်လည်တူးဖော်ပေးသင့်တယ်လို့ ဒေသန္တရစီမံကိန်းအရအသုံးငွေစာရင်းနှင့် ဘဏ္ဍာရေးဆိုင်ရာ ကော်မတီဥက္ကဋ္ဌမှ ဆွေးနွေးတင်ပြခဲ့ပါတယ်။

စွန်ရဲအင်းကြီးမှာ မူလက ကန်ရေပြည့် ရေပြင်အကျယ် ဧရိယာ(၁၃၆၀)ဧကရှိပြီး ယခုလက်ရှိ (၁၀၅၆) ဧကသာ ကျန်ရှိပြီး မူလက ကန်ရေသောက်ဧရိယာမှာ(၃၄၀၀)ဧကရှိပြီး ယခုလက်ရှိ(၃၁၀၅)ဧကသာ ကျန်ရှိတယ်လို့ သိရပါတယ်။ စွန်ရဲအင်းကြီး ပြန်လည်တူးဖော်ပေးမည်ဆိုပါကလည်း  ပြည်သူ့ငွေစာရင်းသုံးစွဲမှုစိစစ်ရေးကော်မတီ မှ ဒေသခံလွှတ်တော်ကိုယ်စားလှယ်နှင့် ပူးပေါင်းပြီး လုပ်ငန်းပြီးမြောက်မှုကို ကြပ်မှတ်ဆောင်ရွက်စေလိုတယ်လို့ ပြောပါတယ်။ စွန်ရဲအင်းကြီးတူးဖော်ဖို့နဲ့ ပတ်သက်ပြီး ဘဏ္ဍာငွေ လေလွင့်ပြုန်းတီးမှုမဖြစ်အောင်လည်း ဆောင်ရွက်ဖို့ လိုတယ်လို့ ပြောကြားခဲ့ပါတယ်။

 

 

Related News