စစ်ကိုင်းတိုင်းဒေသကြီးအတွင်း သိမ်းဆည်းခံမြေယာများ မူလတောင်သူများထံ ပြန်လည် လွှဲပြောင်းပေးအပ်ပွဲ သုံးကြိမ်ကျင်းပနိုင်ခဲ့ပြီး တောင်သူ(၅၂၈)ဦးထံ စိုက်ပျိုးမြေဧက(၄၉၃၂)ဧက
လွှဲပြောင်းပေးအပ်နိုင်ခဲ့ကာ တိုင်းဒေသကြီးနှင့်ပြည်နယ်အားလုံးတွင် ဒုတိယအများဆုံး ပြန်လည်လွှဲပြောင်း ပေးအပ်နိုင်ခဲ့ခြင်းဖြစ်ကြောင်း လယ်ယာမြေနှင့် အခြားမြေများ သ်ိမ်းဆည်းခြင်း ခံရမှုများ ပြန်လည်စိစစ်ရေးဗဟိုကော်မတီဥက္ကဋ္ဌ ဒုတိယသမ္မတ ဦးဟင်နရီဗန်ထီးယူက မေလ ၁၆ ရက်က ကန့်ဘလူမြို့မှာကျင်းပတဲ့ သိမ်းဆည်းခံမြေယာများ မူလတောင်သူများထံ ပြန်လည်လွှဲပြောင်းပွဲ အခမ်းအနားမှာ ပြောကြားပါတယ်။ 
 
ဒုတိယသမ္မတက နိုင်ငံဖွံ့ဖြိုးတိုးတက်ရေးနှင့် လုံခြုံရေးအတွက် နိုင်ငံတော်စီမံကိန်း လုပ်ငန်းများဖြစ်သည့် ရထားလမ်း၊ ကားလမ်း၊ လေယာဉ်ကွင်းများ တိုးချဲ့တည်ဆောက်တာတွေ ၊ စိုက်ပျိုးရေး၊ မွေးမြူရေး စီမံကိန်းလုပ်ငန်းများ ဆောင်ရွက်ရာတွင် ဌာနဆိုင်ရာများ၊ ကုမ္ပဏီများ၊ ပုဂ္ဂလိကလုပ်ငန်းရှင်များအား လုပ်ပိုင်ခွင့်မြေနေရာချ ထားပေးခဲ့ရပြီး၊ တပ်မတော်၊ တပ်ရင်းတပ်ဖွဲ့များ တိုးချဲ့ဖွဲ့စည်းခြင်းတို့အတွက် အကြောင်းအမျိုးမျိုးကြောင့် မြေသိမ်းဆည်းမှုများ ဆောင်ရွက်ခဲ့ရာတွင် လယ်ယာမြေများ ပါဝင်သွားသည့် အတွက် ပြည်သူများ နစ်နာဆုံးရှုံးမှုရှိသည်ကို တွေ့ရှိရတယ်လို့ ပြောပါတယ်။ 
 
ဆုံးရှုံးနစ်နာမှုများကို ကုစားနိုင်ရန်အတွက် သက်ဆိုင်ရာ အဖွဲ့အစည်းများမှ ပြန်လည်စွန့်လွှတ် လာသည့် သိမ်းဆည်းလယ်ယာမြေနှင့် အခြားမြေများကို မူလမြေပိုင်ရှင်များအား ပြန်လည် 
လွှဲပြောင်းပေးအပ်နိုင်ရေးနှင့်စပ်လျဉ်းပြီး မူဝါဒများ၊ စိစစ်ရန် အချက်များ၊ လုပ်ငန်းစဉ်များကို ချမှတ်ကာ စိစစ်ဖြေရှင်းဆောင်ရွက်ပေးလျက်ရှိနေတယ်လို့လည်း ဒုတိယသမ္မတက ပြောပါတယ်။ 
 
ဒီနောက်မှာ အခမ်းအနားကိုတက်ရောက်တဲ့ ကာကွယ်ရေးဝန်ကြီးဌာန ဒုတိယ၀န်ကြီး ဗိုလ်ချုပ်မြင့်နွယ်၊ နယ်စပ်ရေးရာဝန်ကြီးဌာန ဒုတိယ၀န်ကြီး ဗိုလ်ချုပ်သန်းထွဋ်နှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယ၀န်ကြီးဦးစိုးအောင်၊ ပြည်ထဲရေးဝန်ကြီးဌာန အမြဲတမ်းအတွင်းဝန် ဦးတင်မြင့်တို့က ပြန်လည်စွန့်လွှတ်သည့် ကန့်ဘလူ ခရိုင်အတွင်းရှိ မြေလွတ်မြေရိုင်း ဧက ၃၅၀ နီးပါး၊ မုံရွာခရိုင်အတွင်းရှိ မြေလွတ် မြေရိုင်း ဧက တစ်ထောင့်တစ်ရာကျော်၊ ကသာခရိုင်အတွင်းရှိ မြေလွတ်မြေရိုင်း ဧကတစ်ထောင့်ခုနှစ်ရာနီးပါး နှင့် ရွှေဘိုခရိုင်အတွင်းရှိ မြေလွတ်မြေရိုင်း ဧကတစ်ထောင့်ကိုးရာကျော်တို့ကို သက်ဆိုင်ရာ ခရိုင်အုပ်ချုပ်ရေးမှူးများထံ လွှဲပြောင်းပေးအပ်တယ်လို့ သိရပါတယ်။ 
 
အခုလွှဲပြောင်းမှုတွေအပြင်  ကာကွယ်ရေးဝန်ကြီးဌာနအနေဖြင့် အသုံးပြုရန် မရှိသည့် ကန့်ဘလူခရိုင်၊ မုံရွာခရိုင်၊ ကသာခရိုင်နှင့် ရွှေဘိုခရိုင်တို့ရှိ  မြေလွတ်၊ မြေရိုင်းများ စုစုပေါင်းဧက 
ငါးထောင့်တစ်ရာကျော်ကို နိုင်ငံတော်သို့ ပြန်လည်လွှဲပြောင်းအပ်နှံသွားမည်ဖြစ်ကြောင်း သိရပါတယ်။ 
 
 
 

Related News