အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီ (၁/၂၀၁၈) အစည်းအဝေးကို မေလ(၁၅)ရက်က  နေပြည်တော်ရှိ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနမှာ ကျင်းပရာ အမျိုးသားသဘာဝဘေးအန်္တရာယ်ဆိုင်ရာ စီမံခန့်ခွဲမှုကော်မတီဥက္ကဋ္ဌ ဒုတိယသမ်္မတ ဦးဟင်နရီဗန်ထီးယူ တက်ရောက်အမှာစကားပြောကြားပါတယ်။ 
 
ဒုတိယသမ္မတက ၂၀၁၈ ခုနှစ် မိုးရာသီကာလအတွင်း ဖြစ်ပွားနိုင်သည့် ဘေးအန္တရာယ်များနှင့် အချိန်အခါမရွေး ဖြစ်ပေါ်လာနိုင်သည့် ငလျင်ဘေးအန္တရာယ် အတွက်ကြိုတင် ကာကွယ်ရေး၊ ကြိုတင်ပြင်ဆင်ရေးလုပ်ငန်းများနှင့် ပတ်သက်ပြီး အခု အစည်းအဝေးတွင် ဆွေးနွေးညှိနှိုင်းကြရန်နှင့် အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှု ကော်မတီအနေဖြင့် သဘာဝဘေးအန္တရာယ် စီမံခန့်ခွဲမှုလုပ်ငန်းများနှင့် ပတ်သက်ပြီး အမြဲတမ်းနိုးကြားဆောင်ရွက်နေရမယ်လို့လည်း ပြောကြားခဲ့ပါတယ်။ 
 
  ယခုအချိန်ကာလဟာ မိုးဦးလေဦးရာသီဖြစ်တဲ့အတွက် မုန်တိုင်းဖြစ်ပေါ်ခြင်း၊ လေပြင်း တိုက်ခတ်ခြင်း၊ မိုးသည်းထန်ခြင်း၊ မိုးကြိုးပစ်ခြင်း၊ မိုးသီးကြွေခြင်း၊ ရေကြီးခြင်း၊ လျှပ်တပြက် ရေကြီးခြင်းနှင့် မြေပြိုခြင်းများဖြစ်ပေါ်နိုင်တဲ့အတွက် ဘေးအန္တရာယ်များနှင့်ပတ်သက်ပြီး ကြိုတင်ပြင်ဆင်ဆောင်ရွက်နိုင်မှုများနဲ့ လိုအပ်ချက်များကို ဆွေးနွေးကြရန် တိုက်တွန်းခဲ့ပြီး တစ်ခါတစ်ရံ မိမိဒေသတွင် မဖြစ်နိုင်သော်လည်း အခြားဒေသတွင်ဖြစ်ခဲ့ပြီး နောက်ဆက်တွဲအနေဖြင့် မိမိဒေသကိုလာရောက် ရိုက်ခတ်နိုင်တဲ့ ဘေးအန္တရာယ်များကိုလည်း သတိထားဖို့ ပြောကြား ခဲ့ပါတယ်။ 
 
ကြိုတင်ပြင်ဆင်မှုများ ဆောင်ရွက်တဲ့နေရာမှာ အရေးပေါ်တုံ့ပြန်ရေး လုပ်ငန်းများအတွက် သာမက ပြန်လည်ထူထောင်ရေးလုပ်ငန်းများအတွက်ပါ ကြိုတင်စဉ်းစား ပြင်ဆင်ထားရမှာဖြစ်ပြီး ဒီလိုကြိုတင်ပြင်ဆင်ထားတဲ့အတွက် သဘာဝဘေးအန္တရာယ် ဖြစ်ပေါ်နိုင်တဲ့နေရာနဲ့ ကျရောက် နိုင်ခြေများတဲ့  နေရာတွေကို သိရှိထားပြီးဖြစ်တဲ့အတွက် အိုးအိမ်များပြန်လည်နေရာ ချထားပေး နိုင်ရန်၊ အဆောက်အဦများ ပြန်လည်တည်ဆောက်ပေးနိုင်ရန်အတွက် ဘေးလွတ်ကင်းရာ နေရာများကို ကြိုတင်ရွေးချယ်ထားရန်လိုအပ်ပြီး အသက်မွေးဝမ်းကျောင်းလုပ်ငန်းများ၊ လမ်းပန်းဆက်သွယ်ရေး၊ ကျန်းမာရေး၊ ပညာရေးစတဲ့ ကဏ္ဍအသီးသီးကို သက်ဆိုင်ရာဝန်ကြီးဌာန များနဲ့ အစိုးရအဖွဲ့များပူးပေါင်းပြီး အမြန်ဆုံးနဲ့ စနစ်တကျဖြစ်အောင် ဆောင်ရွက်ပေးနိုင်ရေးအတွက် ကြိုတင်စီမံ ဆောင်ရွက်မှုတွေကိုလည်း အလေးထားဆောင်ရွက်ဖို့ တိုက်တွန်းခဲ့ပါတယ်။
 
အဲ့ဒီနောက် စီမံခန့်ခွဲမှုကော်မတီဒုတိယဥက္ကဋ္ဌ လူမှုဝန်ထမ်းကယ်ဆယ်ရေးနှင့် ပြန်လည်နေရာ ချထားရေး ၀န်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးက သဘာဝဘေးကြိုတင် ကာကွယ်ရေးအတွက် တည်ဆောက်ရေး၊ အသိပညာပေးရေး အပါအ၀င် ကဏ္ဍစုံဆောင်ရွက်နေမှုများ၊ သဘာဝဘေး၊ စီမံခန့်ခွဲမှုကော်မတီအတွင်းရေးမှူး ဒုတိယ၀န်ကြီးဦးစိုးအောင်က တိုင်းဒေသကြီး၊ပြည်နယ်အလိုက် သဘာဝဘေးကြို တင်ကာကွယ်နိုင်ရေးအတွက် ဆောင်ရွက်ပြီးစီးမှုတွေ၊ ဖြစ်ပေါ်လာပါက ၀န်ကြီးဌာနအလိုက် ဆောင်ရွက်နေမှုများနှင့်ကြိုပြင်ဆင်ထားမှုများ၊ ကော်မတီဝင် ပြည်ထောင်စုဝန်ကြီးတွေက သဘာဝဘေး ဖြစ်ပေါ်လာပါက ၀န်ကြီးဌာန အလိုက်ဆောင်ရွက် နေမှုများနှင့် ကြိုပြင်ဆင် ထားမှုများကို ရှင်းလင်းတင်ပြခဲ့ပါတယ်။
 
ဒါ့အပြင် အခုအစည်းအဝေးကို တက်ရောက်လာကြတဲ့ တိုင်းဒေသကြီးနှင့် ပြည်နယ်ဝန်ကြီးချုပ်များက သဘာဝဘေးကြိုတင် ကာကွယ်ရေးအတွက် ဆောင်ရွက်ထားမှုများ၊ အသိပညာပေးရေးလုပ်ငန်း၊ လေကာပင်စိုက်ပျိုးရေး လုပ်ငန်း၊ မုန်တိုင်းဒဏ်ခံ အဆောက်အဦး တည်ဆောက်ပေးရေးနှင့် ဒေသအလိုက် ရေတို၊ ရေရှည်ဆောင်ရွက်ပေးရမည့် လိုအပ်ချက်များ ကိုလည်းကောင်းရှင်းလင်း တင်ပြကြပါတယ်။ 
 
ဒီ့နောက်မှာ စီမံခန့်ခွဲမှုကော်မတီဥက္ကဋ္ဌ ဒုတိယသမ်္မတက တင်ပြချက်များအပေါ် ပေါင်းစပ် ညှိနှိုင်းပေးခဲ့ပါတယ်။ အစည်းအဝေးကို အမျိုးသားသဘာဝဘေးအန်္တရာယ်ဆိုင်ရာ စီမံခန့်ခွဲမှုကော်မတီ ဒုတိယဥက္ကဋ္ဌ၊ စီမံခန့်ခွဲမှုကော်မတီဝင် ပြည်ထောင်စုဝန်ကြီးများ၊ တိုင်းဒေသကြီးနှင့် ပြည်နယ်များမှ ၀န်ကြီးချုပ်များ၊ ဒုတိယ၀န်ကြီးများနှင့် တာဝန်ရှိသူများ ရောက်ခဲ့ကြတယ်လို့ သိရှိရပါတယ်။ 
 
 

Related News