မဟာမဲခေါင်ဒေသတွင်းရှိ လမ်းမကြီးများဖွံ့ဖြိုးတိုးတက်ရေးစီမံကိန်းတွေအတွက် အမေရိကန် ဒေါ်လာသန်း၃၆၀ချေးယူရေးကိစ္စအတွက် မတ်လ ၁၂ ရက်က ပြည်ထောင်စုလွှတ်တော်မှာ စတင်ဆွေးနွေးခဲ့တယ်လို့ သိရပါတယ်။မဟာမဲခေါင်ဒေသတွင်းရှိလမ်းမကြီးတွေ ဖွံ့ဖြိုးတိုးတက်ရေးစီမံကိန်းအတွက် အာရှဖွံ့ဖြိုးရေးဘဏ်နဲ့အာဆီယံ အခြေခံအဆောက်အအုံ ရန်ပုံငွေထံကနေ အမေရိကန်ဒေါ်လာ သန်း၃၆၀ချေးယူပြီး ဒီချေးငွေတွေကို ပြည်တွင်းက လမ်းပိုင်းသုံးခုအဆင့်မြှင့်တင်တဲ့ နေရာမှာ အသုံးပြုသွားမယ်လို့ သိရပါတယ်။ ဆွေးနွေးခဲ့တဲ့လွှတ်တော်ကိုယ်စားလှယ်တွေက အဆင့်မြှင့်တင်မှုတွေ ပြုလုပ်ဖို့ လမ်းပိုင်းရွေးချယ်ထားမှုနဲ့ ပတ်သက်ပြီး အဓိကဆွေးနွေး သွားကြပါတယ်။

ပြည်သူ့လွှတ်တော်ကိုယ်စားလှယ် ဒေါ်ယဉ်မင်းလှိုင်က ယခုချေးငွေရယူပြီး အဆင့်မြှင့်တင်မှု တွေ ပြုလုပ်မယ့် လမ်းပိုင်းထဲက ရန်ကုန်-ပုသိမ်လမ်းပိုင်းဟာBOTစနစ်နဲ့ ဆောင်ရွက်နေတဲ့ လမ်းပိုင်းဖြစ်ပြီး အဆင့်မြှင့်တင်မှုတွေကBOTစနစ်နဲ့ တာဝန်ယူဆောင်ရွက်နေတဲ့ ကုမ္ပဏီကို ပြုလုပ်ခိုင်းသင့်ကြောင်း ဆွေးနွေးပါတယ်။ ဒါ့အပြင်ရန်ကုန်-မန္တလေးအမြန်လမ်းပိုင်းမှ အဆင့်မြှင့်တင်မှုတွေပြုလုပ်မဲ့ မိုင်၄၀ဟာ ယခင်ရက် ၁၀၀စီမံကိန်းတွေအတွင်း ဆောင်ရွက်ခဲ့ဖူးပြီး လက်ရှိအချိန်မှာလဲ အစိုးရအနေနဲ့ ဘဏ္ဍာငွေကိုအသုံးပြုကာပြင်ဆင်မှုတွေ အဆင့်မြှင့်တင်မှုတွေ ပြုလုပ်နေတာကြောင့် လမ်းရွေးချယ်မှုကို ပြန်လည်သုံးသပ်ဖို့လည်း ဆွေးနွေးကြပါတယ်။ ပဲခူး-သံလျင်လမ်းပိုင်းအနေနဲ့ ဗီယက်နန်နိုင်ငံ၊ လာအိုနိုင်ငံ၊ ထိုင်းနိုင်ငံတွေကနေတစ်ဆင့် ပြည်တွင်းကမြ၀တီ၊ ဘားအံမြို့တွေကိုဖြတ်သန်ပြီး ပဲခူးမြို့မှတစ်ဆင့် သီလ၀ါအထူးစီးပွားရေးဇုန်အထိ ရောက်ရှိမှာကြောင့် လုပ်ဆောင်သင့်တယ်လို့ ဆွေးနွေးပါတယ်။ မဟာမဲခေါင်ဒေသတွင်းရှိ လမ်းမကြီးများဖွံ့ဖြိုးတိုးတက်ရေးစီမံကိန်းတွေအတွက် အမေရိကန်ဒေါ်လာ သန်း၃၆၀ချေးယူရေးကိစ္စနဲ့ ပတ်သက်ပြီး လာမည့် ပြည်ထောင်စုလွှတ်တော်အစည်းအဝေးမှာ ဆက်လက် ဆွေးနွေးသွားမယ်လို့လည်းသိရပါတယ်။

 

 

Related News