မြန်မာနိုင်ငံမှာ လက်ရှိ ရင်းနှီးမြုပ်နှံမှုအားလုံးရဲ့ (၇၀)ရာခိုင်နှုန်း က ရန်ကုန်တိုင်းဒေသကြီးကို ၀င်ရောက်နေတာ ဖြစ်ပါတယ်။ ရင်းနှီးမြုပ်နှံမှုနှင့်ကုမ္ပဏီများညွှန်ကြားမှုဦးစီးဌာန (DICA) ကတော့ ဖွံ့ဖြိုးမှုနည်းတဲ့ မြို့တွေမှာ ရင်းနှီးမြုပ်နှံမှု ပိုမိုဝင်ရောက်လာစေဖို့ မြို့အလိုက်အခွန်ကင်း လွတ်ခွင့်တွေကို ပြန်လည်သုံးသပ်နေတယ်လို့ ပြောပါတယ်။လမ်းပန်းဆက်သွယ်ရေး၊လျှပ်စစ်မီး၊ကျွမ်းကျင်လုပ်သားနဲ့လုံခြုံရေးစတဲ့ အချက် လေးချက်ပေါ် အဓိက မူတည်ပြီး အမှတ်ပေးကာ မြို့အလိုက် အခွန်ကင်းလွတ်ခွင့်တွေ ပြင်ဆင်သတ်မှတ်ဖို့ လုပ်ဆောင်နေတယ်လို့ သိရပါတယ်။ ရင်းနှီးမြုပ်နှံမှု ကော်မရှင် (MIC) အောက်က လုပ်ငန်းတွေ အတွက် အခွန်ကင်းလွတ်ခွင့်တွေသတ်မှတ်ထားတာ တစ်နှစ်ကျော်ပြီ ဖြစ်ပါတယ်။

လက်ရှိ အခွန်ကင်းလွတ်ခွင့်မှာ မြို့နယ်တွေကို ဇုန်အလိုက်ခွဲ သတ်မှတ်ထားတာဖြစ်ပြီး အခုအခါ ပြန်သုံးသပ်ကာ မြို့အလိုက် ပြန်လည်သတ်မှတ်နိုင်ဖို့ဆောင်ရွက်နေတာဖြစ်ပါတယ်။ လက်ရှိ ဘဏ္ဍာရေးနှစ် ဆယ်လတာကာလအတွင်းမှာလည်း နိုင်ငံခြားရင်းနှီးမြုပ်နှံမှု အမေရိကန်ဒေါ်လာ (၅.၄) ဘီလီယံ ကျော်ဝင်ရောက်ထားပြီး ရန်ကုန်တိုင်းဒေသကြီးနဲ့ မန္တလေးတိုင်း ဒေသကြီးကို အများဆုံးဝင်ရောက်ထားတာဖြစ်ကာ ကယားပြည်နယ်၊ရခိုင်ပြည်နယ် နဲ့ ချင်းပြည်နယ်ကိုတော့ နိုင်ငံခြား ရင်းနှီးမြုပ်နှံမှု ၀င်ရောက်ထားခြင်းမရှိသေးပါဘူး။

၂၀၁၆ခုနှစ် အောက်တိုဘာလမှာ ပြဋ္ဌာန်းခဲ့တဲ့ ရင်းနှီးမြုပ်နှံမှုဥပဒေရဲ့ နောက်ဆက်တွဲအနေနဲ့ မြန်မာနိုင်ငံက မြို့တွေကို ဇုန်(၃)ခုခွဲပြီး ဇုန်အလိုက် ၀င်ငွေခွန်ကင်းလွတ်ခွင့်ကို (၃)နှစ်၊(၅)နှစ်နဲ့ (၇)နှစ်ဆိုပြီး ပေးထားတာဖြစ်ပါတယ်။ ဒီဇုန်သတ်မှတ်ချက်အရ ကယား၊ရခိုင်၊ကရင်၊နဲ့ ချင်းပြည်နယ်တွေက မြို့နယ်အားလုံးဟာ ဖွံ့ဖြိးမှုနည်းတဲ့ဒေသတွေအဖြစ် ဇုန်(၁) ထဲမှာ ထည့်သွင်းထားပြီး အခွန်ကင်းလွတ်ခွင့်(၇)နှစ်ပေးထားပါတယ်။ရန်ကုန်နဲ့ မန်္တလေးက မြို့နယ် အများစုကတော့ ဇုန်(၃)ထဲ မှာပါပြီး အခွန်ကင်းလွတ်ခွင့်(၃)နှစ်ပေးထား တာဖြစ်ပါ တယ်။

(၇)နှစ်အတွင်း နိုင်ငံခြားရင်းနှီးမြုပ်နှံမှုတွေရဲ့ တစ်ဝက်ကျော်ဟာ ရန်ကုန်တိုင်းဒေသကြီး မှာဖြစ်ပါတယ်။၂၀၁၁ ခုနှစ်ကနေ ပြီးခဲ့တဲ့၂၀၁၇ ဒီဇင်ဘာလကုန်အထိ နိုင်ငံခြားရင်းနှီးမြုပ်နှံမှု အမေရိကန် ဒေါ်လာ (၃၈)ဘီလီယံကျော် ၀င်ရောက်ခဲ့ပြီး (၁၉)ဘီလီယံက ရန်ကုန်မှာဖြစ်ပါတယ်။ ဒါပေမယ့် ချင်းပြည်နယ်နဲ့ကယားပြည်နယ်ကတော့(၇)နှစ်အတွင်း အမေရိကန် ဒေါ်လာ (၁)သန်းနဲ့(၃)သန်း ကြားသာ နိုင်ငံခြား ရင်းနှီးမြုပ်နှံမှုဝင်ရောက်ခဲ့ပါတယ်။ကချင်ပြည်နယ်မှာတော့ ၂၀၁၂နောက်ပိုင်း နိုင်ငံခြား ရင်းနှီးမြုပ်နှံမှု ထပ်မံ ၀င်ရောက်မှုမရှိတော့သလို ရခိုင်ပြည်နယ်မှာ လည်း လက်ရှိအစိုးရသက်တမ်းအတွင်း နိုင်ငံခြားရင်းနှီးမြုပ်နှံမှုအသစ်မ၀င် ရောက်သေးပါဘူး။

 

 

 

Related News