ဆေးကျောင်းသားကျောင်းသူတွေ ခန္ဓာဗေဒဘာသာရပ်အတွက် လက်တွေ့ခွဲစိတ်ရာမှာ အထောက်အကူပြုဖို့ ခန္ဓာကိုယ်လှူဒါန်း ခဲ့တဲ့ ဝိညာဉ်မဲ့မြတ်ဆရာတွေကို တတိယအကြိမ်မြောက်ဂုဏ်ပြုတဲ့ အခမ်းအနားကို ဆေးတက္ကသိုလ်(၁) ရန်ကုန်၊ ခန္ဓာဗေဒဌာနမှာ ဇူလိုင်လ (၁၂) ရက်က ပြုလုပ်ခဲ့ပါတယ်။မိမိခန္ဓာကိုယ်ကို ဆေးပညာရပ်အတွက် အသုံးချဖို့ လှူဒါန်းခဲ့တဲ့ ခန္ဓာကိုယ်ပိုင်ရှင်တွေကို အသိမှတ်ပြုဂုဏ်ပြုတဲ့ အခမ်းအနားပဲ ဖြစ်ပါတယ်။ ဒီခန္ဓာကိုယ်တွေကို ဆေးတက္ကသိုလ်မှာသင်ကြားနေတဲ့ ဘွဲ့ကြိုကျောင်းသား၊ ကျောင်းသူတွေ၊ ခွဲစိတ်ဆရာဝန်တွေ လက်တွေ့ လေ့ကျင့်သင်ကြားရေးအတွက် အသုံးပြုတာဖြစ်ပါတယ်။ လှူဒါန်းလာတဲ့ခန္ဓာကိုယ်တွေကို  ဆေးစိမ်ထားပြီး ခန္ဓာဗေဒ ဘာသာသင်ကြားရေးမှာအသုံးချတာပါ။ ဒီလို လက်တွေ့သင်ကြား၊ ခွဲစိတ်နိုင်ဖို့ ခန္ဓာကိုယ်လှူဒါန်းသူတွေကို  ဝိညာဉ်မဲ့မြတ်ဆရာ တွေအဖြစ် သတ်မှတ်ဂုဏ်ပြုတာဖြစ်ပါတယ်။ဂုဏ်ပြု အခမ်းအနားမှာတော့ လှူဒါန်းထားတဲ့ ခန္ဓာကိုယ်တွေအားလုံးကိုထုတ်ပြီး ဂုဏ်ပြုရင်နေရာအခက်အခဲရှိတာကြောင့် ခန္ဓာကိုယ်အလှူရှင်တွေထဲက သုံးဦးကို ကိုယ်စားလှယ်အဖြစ် ရွေးချယ်ပြီး ဂုဏ်ပြုခဲ့တာပါ။ ဂုဏ်ပြုပွဲကို ခန္ဓာကိုယ်အလှူရှင်တွေရဲ့ မိသားစုဝင်တွေ တက်ရောက်ခဲ့ပြီး ဆေးကျောင်းသားကျောင်းသူတွေနဲ့ အတူ ဂါရဝပြုခဲ့ပါတယ်။ အသက် (၂၅) နှစ်နဲ့ကွယ်လွန်ခဲ့ပေမယ့် ဆေးပညာရပ်အတွက် အသုံးချဖို့ ခန္ဓာကိုယ်လှူဒါန်းခဲ့တဲ့ သမီးဖြစ်သူအတွက် ဂုဏ်ယူတယ်လို့ အလှူရှင်မိသားစုဝင်တစ်ဦးကလည်း ပြောပါတယ်။ ဒီလို ဂုဏ်ပြုပွဲကို ပြီးခဲ့တဲ့ (၂၀၁၇) ခုနှစ်ကဆေးတက္ကသိုလ်(၁ ရန်ကုန်၊ ခန္ဓာဗေဒဌာနကစတင်ပြုလုပ်ခဲ့တာဖြစ်ပါတယ်။ ခန္ဓာကိုယ်လှူဒါန်းမှုတွေကိုလွန်ခဲ့တဲ့ (၁၉၂၀)ပြည့်နှစ်ကျော်ကတည်းကလက်ခံခဲ့တာဖြစ်ပြီး ဒီခန္ဓာကိုယ်တွေကိုဆေးစိမ်ကာ လက်တွေ့ ခွဲစိတ်သင်ကြားရေးတွေဆောင်ရွက်နေတာဖြစ်ပါတယ်။

 

 

Related News