လာမယ့် (၂၀၂၀) ပြည့်နှစ်မှာ အသက် (၁၀) နှစ်ကနေ (၁၄) နှစ်အရွယ် မိန်းကလေးတွေကို ကျောင်းအခြေပြုကာကွယ် ဆေးထိုး အစီအစဉ်နဲ့ သားအိမ်ခေါင်းကင်ဆာကာကွယ်ဆေး အခမဲ့စတင်ထိုးနှံပေးတော့မှာဖြစ်တယ်လို့ ပြည်သူ့ကျန်းမာရေးဦးစီးဌာန၊ ဗဟိုတိုးချဲ့ကာကွယ်ဆေးထိုးလုပ်ငန်းမှ သိရပါတယ်။သားအိမ်ခေါင်းကင်ဆာရောဂါက Human Papilloma Virsus ကူးစက်ခံရတာကြောင့် အများဆုံးဖြစ်ပွားတာပါ။ ဒါကြောင့် အဆိုပါ ဗိုင်းရပ်စ်ကို ကြိုတင်ကာကွယ်ပေးနိုင်တဲ့ သားအိမ်ခေါင်းကင်ဆာကာကွယ်ဆေးကို မြန်မာတစ်နိုင်ငံလုံးက ဆယ်ကျော်သက်မိန်းကလေးတွေကို အခမဲ့ထိုးနှံပေးတော့မှာပဲဖြစ်ပါတယ်။ ကာကွယ်ဆေးထိုးအစီအစဉ်ကိုတော့ ကျန်းမာရေးနှင့်အားကစားဝန်ကြီးဌာန၊ ကမ္ဘာ့ကျန်းမာရေးအဖွဲ့(WHO) နဲ့ Unicef တို့ပူးပေါင်းဆောင်ရွက်တာဖြစ်ပြီး လာမယ့် (၂၀၂၀) ပြည့်နှစ်ရဲ့ကျောင်းဖွင့်ရာသီ ဇွန်လနဲ့ ဇူလိုင်လတွေမှာ ထိုးနှံပေးတော့မှာပါ။

ဒီကာကွယ်ဆေးကတော့ ကမ္ဘာ့ကျန်းမာရေးအဖွဲ့(WHO) အသိအမှတ်ပြု သားအိမ်ခေါင်းကင်ဆာကာကွယ်ဆေးဖြစ်ပြီး အသက် (၁၀) နှစ်ကနေ (၁၄) နှစ်အရွယ် မိန်းကလေးတွေကို (၂၀၂၀) မှာ တစ်ကြိမ်၊ (၂၀၂၁) ခုနှစ်မှာ တစ်ကြိမ်နဲ့စုစုပေါင်း နှစ်ကြိမ် ထိုးနှံပေးမှာဖြစ်ပါတယ်။ အသက် (၁၀) နှစ်ကနေ (၁၄) နှစ်အရွယ် မိန်းကလေးတွေကို (၂၀၂၀)နဲ့ (၂၀၂၁) ခုနှစ်မှာပဲ တစ်ကြိမ်စီ ထိုးနှံပေးမှာဖြစ်ပြီး (၂၀၂၂) ခုနှစ်ကစတင်ကာ သားအိမ်ခေါင်းကင်ဆာကာကွယ်ဆေးကို ပုံမှန်ကာကွယ်ဆေးထိုးအစီအစဉ်ထဲ ထည့်သွင်းပြီး အသက် (၉) နှစ်ပြည့်ပြီးသား မိန်းကလေးတွေကိုပဲ ထိုးနှံပေးတော့မှာဖြစ်ပါတယ်။သားအိမ်ခေါင်းကင်ဆာက မြန်မာနိုင်ငံနေ အမျိုးသမီးထုတွေထဲမှာ ဒုတိယဖြစ်ပွားမှုအများဆုံးကင်ဆာဖြစ်ပြီး မြန်မာနိုင်ငံမှာ တစ်ရက်ကို သားအိမ်ခေါင်းကင်ဆာကြောင့် အမျိုးသမီးရှစ်ဦးခန့်သေဆုံးနေရတယ်လို့သုတေသနစစ်တမ်းတွေအရသိရပါတယ်။

ဒါကြောင့် သားအိမ်ခေါင်းကင်ဆာကာကွယ်ဆေးကို အရွယ်မရောက်သေးတဲ့ မိန်းကလေးတွေကို ကြိုတင်ကာကွယ်တဲ့အနေနဲ့ထိုးနှံပေးရင် သားအိမ်ခေါင်းကင်ဆာ ဖြစ်ပွားနိုင်နှုန်း (၇၀) ရာခိုင်နှုန်းအထိ လျှော့ချနိုင်မှာဖြစ်တယ်လို့သိရပါတယ်။ ရန်ကုန်တိုင်းဒေသကြီးမှာတော့သားအိမ်ခေါင်းကင်ဆာကာကွယ်ဆေးကို မြို့နယ် (၄၅) မြို့နယ်လုံးမှာ ထိုးနှံပေးမှာဖြစ်ပြီး ကျောင်းအခြေပြုနဲ့ပြည်သူလူထုအခြေပြု ကာကွယ်ဆေးထိုးလုပ်ငန်းတွေကို (၂၀၂၀) ပြည့်နှစ်မှာ စတင်တော့မှာပါ။ လာမယ့် (၂၀၂၀) ပြည့်နှစ်မှာ စတင်မယ့် သားအိမ်ခေါင်းကင်ဆာ ကာကွယ်ဆေးထိုးစီမံကိန်းမှာ အသက်ကိုးနှစ်ကနေ (၁၄) နှစ်အရွယ်မိန်းကလေးဦးရေ သုံးသန်းကျော်ကို ထိုးနှံပေးဖို့ရည်မှန်းထားတယ်လို့သိရပါတယ်။

 

 

Related News