ဒီဇင်ဘာ ၁၁ ရက်ကနေ စတင်တဲ့ ရပ်ရွာအခြေပြု ဂျပန်ဦးနှောက်ရောင် ကာကွယ်ဆေးထိုး လုပ်ငန်းမှာ ကာကွယ်ဆေးမထိုးနှံမီ ကလေးတွေရဲ့ ကျန်းမာရေးအခြေအနေ စမ်းသပ်စစ်ဆေးတဲ့ လုပ်ငန်းကို အချိန်ပိုပေးထားပြီး ကျန်းမာရေးကောင်းမွန်တဲ့ ကလေးတွေကိုသာ ဦးစားပေးထိုးနှံသွားမှာ ဖြစ်တယ်လို့သိရပါတယ်။ ဂျပန်ဦးနှောက်ရောင် ကာကွယ်ဆေးမထိုးနှံမီ ကလေးတွေကို အဖျားရှိ၊ မရှိစစ်ဆေးတာနဲ့ ရောဂါအခံရှိ၊ မရှိ စစ်ဆေးတာတွေကို အချိန်ထပ်တိုးလုပ်ဆောင်နေပြီး ရောဂါလက္ခဏာ လုံးဝမရှိပဲ ကျန်းမာရေးကောင်းမွန်တဲ့ ကလေးတွေကိုသာ ကာကွယ်ဆေးထိုးနှံ ပေးနေတယ်လို့ သိရပါတယ်။
 
ကာကွယ်ဆေးထိုးပြီးရင်လည်း နာရီဝက်စောင့်ကြည့်ပြီးမှ နေရပ်ကို ပြန်လွှတ်ပေးတာဖြစ်ပါတယ်။ ကျောင်းအခြေပြု ကာကွယ်ဆေးထိုးလုပ်ငန်းမှာ ရောဂါအခံရှိတာကြောင့် ကာကွယ်ဆေးထိုးနှံမှုအပြီးမှာ သေဆုံးခဲ့တဲ့ကလေး ငါးဦးအထိရှိပြီး ယခုပြုလုပ်နေတဲ့ ရပ်ရွာအခြေပြု ကာကွယ်ဆေးထိုးလုပ်ငန်းမှာတော့ ဒီလို နောက်ဆက်တွဲဖြစ်စဉ်တွေ မရှိအောင် ကလေးတွေရဲ့ ကျန်းမာရေးကောင်းမွန်မှ ထိုးနှံပေးမှာဖြစ်ပြီး တစ်ရက်မှာ ဆေးထိုးစုရပ်နှစ်ခုနဲ့ သားဖွားဆရာမတစ်ဦးက ကလေးအယောက် တစ်ရာကိုသာ တာဝန်ယူထိုးနှံပေးမယ်လို့သိရပါတယ်။
 
ဂျပန်ဦးနှောက်ရောင်ကာကွယ်ဆေးကို သက်ဆိုင်ရာ ရပ်ကွက်အုပ်ချုပ်ရေးမှူးရုံးတွေ၊ ဓမ္မာရုံတွေနဲ့ သတ်မှတ်ဆေးထိုး စုရပ်တွေမှာ ထိုးနှံပေးနေပြီး ဆေးထိုးစုရပ်တွေမှာ မထိုးနှံလိုက်ရတဲ့ မိဘတွေအနေနဲ့ ဒေသန္တရဆေးခန်းတွေမှာ မနက်ကိုးနာရီ ကနေ နေ့လည်နှစ်နာရီအထိ သွားရောက်ထိုးနှံနိုင်မှာ ဖြစ်ပါတယ်။ရပ်ရွာအခြေပြု ကာကွယ်ဆေးထိုးစုရပ်တွေမှာ လာရောက် ထိုးနှံတဲ့ မိဘအများစုကတော့ ကျောင်းတက်နေတဲ့ သားသမီးတွေကိုလည်း စာသင်ကျောင်းတွေမှာ ထိုးနှံပေးခဲ့ပြီးဖြစ်ပေမဲ့ ဘေးထွက်ဆိုးကျိုးမရှိတာကြောင့်  ယခု ကာကွယ်ဆေးထိုးလုပ်ငန်းမှာလည်း ကျောင်းမနေသေးတဲ့ ကလေးအငယ်တွေကို လာရောက် ထိုးနှံတာဖြစ်တယ်လို့ ပြောပြပါတယ်။
 
လက်ရှိ ထိုးနှံပေးနေတဲ့ ရပ်ရွာအခြေပြု ကာကွယ်ဆေးထိုးလုပ်ငန်းမှာ အသက်ကိုးလကနေ ငါးနှစ်အရွယ်ကလေးတွေ၊ ကျောင်းမနေတဲ့ အသက်ငါးနှစ်ကနေ တစ်ဆယ့်ငါးနှစ်အရွယ်ကလေးတွေနဲ့ စာသင်ကျောင်းတွေမှာ ကာကွယ်ဆေးထိုးနှံဖို့ ကျန်ခဲ့တဲ့ကလေးတွေကို ထိုးနှံသွားမှာဖြစ်ပြီး တစ်နိုင်ငံလုံးက စုစုပေါင်းကလေးဦးရေ ခြောက်သန်းကို ထိုးနှံပေးဖို့ ရည်ရွယ်ထားတယ်လို့သိရပါတယ်။
 
 
 

Related News