၂၀၁၂-၂၀၁၃ ပညာသင်နှစ်မှစပြီး ရန်ကင်းပညာရေးကောလိပ် အဆင့်မြင့်ပညာဦးစီးဌာနမှ ဖွင့်လှစ်သင်ကြားပေးနေတဲ့ ဆရာအတတ်ပညာသင်တန်းမှ မူလတန်းပြဆရာ၊ ဆရာမအယောက် (၂၅၀)ကို ဖေဖော်ဝါရီလ(၇)ရက်က ဆရာအတတ်ပညာသင်တန်းဆင်း လက်မှတ်ပေးအပ်ခဲ့ပါတယ်။မူလတန်းဆရာအတတ်ပညာသင်တန်းကို တက္ကသိုလ်မှ ဘွဲ့ရကျောင်းသား၊ ကျောင်းသူတွေသာ ၀င်ခွင့်ဖြေဆိုပြီး စာမေးပွဲအောင်မြင်သူတွေကို သင်တန်းကာလ(၆)လသင်တန်းပေးကာ မူလတန်းပြဆရာအတတ်ပညာကို သင်ကြားပေးနေတာ ဖြစ်ပါတယ်။

သင်ကြားတဲ့အခါမှာ မူလတန်းပြဆရာအတတ်ပညာသင်တန်းမှာ လာရောက်သင်ကြားနေတဲ့ ကျောင်းသား၊ ကျောင်းသူတွေရဲ့ နေထိုင်တဲ့ မြို့နယ်(သို့မဟုတ်)ဒေသတွေရဲ့ အနီးစပ်ဆုံးအခြေခံကျောင်းတွေမှာ လက်တွေ့သင်တန်းဆင်းသင်ကြားမှုတွေ ပြုလုပ်ပေးပြီးမှသာ အခုလို သင်တန်းဆင်းလက်မှတ် ထုတ်ပေးတာ ဖြစ်တယ်လို့ ဆိုပါတယ်။မူလတန်းဆရာအတတ်ပညာသင်တန်းမှာ သင်ကြားရတဲ့ ပညာရေးသဘောတရားနဲ့ ပညာရေးစိတ်ပညာ(၂)မျိုးရှိပြီး နောက်ထပ်သင်ပြနည်းဘာသာ (၅)ဘာသာအပြင် ဖွံ့ဖြိုးရေးဘာသာ တွေကိုပါစာတွေ့၊ လက်တွေ့သင်ကြားပေးတာဖြစ်ပါတယ်။

ဖွံ့ဖြိုးရေးဘာသာရပ်တွေအနေနဲ့ ကာယ၊ ပန်းချီ၊ ဂီတစိုက်ပျိုးရေးနဲ့ မိန်းကလေးတွေကို အိမ်တွင်းမှုပညာပိုင်းသင်ကြားပေးပြီး ယောကျာ်းလေးတွေကိုတော့ စက်မှုပညာပိုင်းကိုသင်ကြားပေးတာဖြစ်တယ်လို့သိရပါတယ်။ သင်တန်းမှာလာရောက်ပညာသင်ကြားကြတဲ့ သူတွေဟာ ရန်ကုန်မြို့တွင်းမှ နည်းပါးပြီး နယ်ဘက်တွေမှ လာရောက်သင်ကြားသူများပြားတယ်လို့ ဆိုပါတယ်။အခြေခံကျောင်းတွေကို လက်တွေ့သွားရောက်သင်ကြားရာမှာ ကလေးငယ်တွေကို သင်ကြားတဲ့ အခါအခက်အခဲတွေရှိတယ်လို့ သိရပါတယ်။

ဒီလိုသင်ကြားမှုအပိုင်းက အခက်အခဲတွေကို ဆရာ၊ ဆရာမတွေနဲ့ ပြန်လည်ဆွေးနွေးပြီး ကလေးငယ်တွေကို ပြုစုစောင့်ရှောက်ထိန်းသိမ်းနည်းတွေကို ပြန်လည်မျှဝေသုံးသပ်ကြတဲ့အခါ သင်ကြားမှုအပိုင်းမှာ တိုးတက်လာမှုတွေရှိတာကို တွေ့ရှိရတယ်လို့ ဆိုပါတယ်။ မူလတန်းဆရာအတတ်ပညာ သင်တန်းဆင်းလက်မှတ်ရရှိပြီးတဲ့ ဆရာ၊ ဆရာမတွေကို သူတို့နေထိုင်တဲ့မြို့နယ်က အခြေခံပညာကျောင်းတွေမှ ခန့်အပ်ပေးသွားမှာ ဖြစ်တယ်လို့ သိရပါတယ်။ ယခုပြုလုပ်ခဲ့တဲ့ မူလတန်းဆရာအတတ်ပညာသင်တန်းဟာ(၄)ကြိမ်မြောက်ပြုလုပ်တာဖြစ်ပြီး  (၅)ကြိမ်မြောက်မူလတန်း ဆရာအတတ်ပညာသင်တန်းကိုတော့ ယခု(၂၀၁၈)ခုနှစ်၊ ဧပြီလပိုင်းမှာ ပြန်လည်ဖွင့်လှစ်သွားမယ်လို့ သိရပါတယ်။

 

 

 

Related News