လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာနမှ မသန်စွမ်းသက်ကြီးသင်တန်းကျောင်းကိုဖွင့်လှစ်ထားပြီး မသန်စွမ်းသက်ကြီးတွေအတွက် စက်ချုပ်ပညာတွေကိုလည်း အခမဲ့ သင်ကြားပေးနေတယ်လို့သိရပါတယ်။လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာနမှ မသန်စွမ်းသက်ကြီးသင်တန်းကျောင်းမှာ ကိုယ်အင်္ဂါချို့ယွင်းသူ၊ အကြားအာရုံချို့ယွင်းသူ၊သူငယ်နာအကြောတင်းသူ၊ ပိုလီယို အကြောသေသူ စတဲ့ မသန်စွမ်းသူတွေကို အသက်မွေးဝမ်းကြောင်းပညာသင်ကြားပေးနေတာပါ။သင်တန်းတက်ရောက်မယ့်သူတွေအတွက်ကို အသက်(၁၈) နှစ်မှ (၄၅)နှစ်အထိ သတ်မှတ်ထားတာဖြစ်ပြီး  မသန်စွမ်းတွေအနေနဲ့ မိသားစုနဲ့ အခြားသူတွေအပေါ် မှီခိုလိုစိတ်ပပျောက်ပြီး မိမိကိုယ်ကိုရပ်တည်နိုင်အောင် လေ့ကျင့်သင်ကြားပေးနေတာဖြစ်တယ်လို့ မသန်စွမ်းသက်ကြီး သင်တန်းကျောင်း မှ ကျောင်းအုပ် ဦးကျော်ဇင်ဦး ကပြောပါတယ်။

မသန်စွမ်းသက်ကြီးသင်တန်းကျောင်းရဲ့ စက်ချုပ်သင်တန်းမှာ စက်နင်းလေ့ကျင့်ခြင်း၊ အခြေခံချုပ်ရိုးများအကြောင်း၊ ကျားရှပ်အကျီ င်္၊ ဘောင်းဘီ၊ မိန်းမ၀တ်ပုံစံများညှပ်ခြင်း၊ချုပ်ခြင်းများကို ဂျပန်စင်တီမီတာနည်းနဲ့ သင်ကြားပေးနေတယ်လို့သိရပါတယ်။သင်တန်းကာလကို(၃)လသက်မှတ်ထားပြီး သင်တန်းဆင်းပြီးရင် သက်ဆိုင်ရာ လုပ်ငန်းတွေနဲ့ ချိတ်ဆက်ပြီး အလုပ်အကိုင် ရှာဖွေပေးတယ်လို့ မသန်စွမ်းသက်ကြီးသင်တန်း ကျောင်းရဲ့ စက်ချုပ်သင်တန်းမှ သင်တန်းနည်းပြ ဒေါ်သန်းသန်းစိုး ကပြောပါတယ်။စက်ချုပ်သင်တန်းမှာတက်ရောက်နေတဲ့မသန်စွမ်းတွေကတော့ အရင်က မိဘအိမ်မှာ ၀ိုင်းကူနေရတာထက်အခု လို ၀ါသနာပါတဲ့ အသက်မွေးဝမ်းကျောင်းပညာသင်ကြားရတာကြောင့် မိမိကိုယ်ကိုပိုပြီးယုံကြည်မှုရှိလာတယ် လို့ပြောပါတယ်။

ဒါ့အပြင် အရင်ကမိဘ၊ ညီအစ်ကို မောင်နှမတွေကို မှီခိုနေရပြီး ကိုယ်တက်ထားတဲ့ပညာနဲ့ ပြန်လည်လုပ်ကျွေးမှာဖြစ်တာကြောင့် ၀မ်းသာနေရတယ်လို့ ဧရာဝတီတိုင်းမှ စက်ချုပ်သင်တန်းလာရောက် သင်ကြားတဲ့ သင်တန်းသူမထားထားဦးကပြောပါတယ်။လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာနမှ မသန်စွမ်း သက်ကြီးသင်တန်းကျောင်းမှာသင်တန်းတက်ရောက်နေသူတွေကို လူမှုဝန်ထမ်းဦးစီးဌာနမှ စားရိတ်ငြိမ်း တာဝန်ယူပြီး အိပ်ဆောင်မှာ နေထိုင်ရေးနဲ့ နယ်မှ သင်တန်းသား၊သင်တန်းသူတွေ အတွက် အိမ်အပြန်ခရီးစရိတ် ထောက်ပံ့ပေးတယ်လို့သိရပါတယ်။

 

 

Related News