နေပြည်တော်မှာရှိတဲ့ ၀န်ထမ်းတွေရဲ့စွမ်းဆောင်ရည်မြင့်မားစေဖို့နဲ့ လူ့စွမ်းအားအရင်းအမြစ် ဖွံ့ဖြိုးတိုးတက်မှုကို အထောက်အကူ ဖြစ်စေဖို့အတွက် ရည်ရွယ်ပြီး ပြည်သူ့ရေးရာစီမံခန့်ခွဲမှုပညာဘွဲ့လွန်ဒီပလိုမာနှင့် စာရင်းအင်းပညာ ဘွဲ့လွန်ဒီပလိုမာသင်တန်းတွေကို ဖွင့်လှစ်ခဲ့တယ်လို့ သိရပါတယ်။ ဘွဲ့လွန်ဒီပလိုမာသင်တန်းတွေ ဖွင့်လှစ်ခြင်းဖြင့် အစိုးရ၀န်ထမ်းတွေအနေနဲ့ လုပ်ငန်းခွင်တွေမှာ စွမ်းဆောင်ရည်တွေ ပြည့်ဝလာပြီး နိုင်ငံတော်ရဲ့အုပ်ချုပ်မှုဟာလည်း တိုးတက်လာနိုင်တယ်လို့ သိရပါတယ်။ ဒါ့အပြင် ဒီသင်တန်းတွေမှာသင်ကြားပေးမယ့် ပညာရပ်တွေ သင်တန်းသားတွေအတွက် လုပ်ငန်းခွင်မှာ အထောက်အကူ ဖြစ်စေသလို ဘ၀တစ်သက်တာအတွက် အထောက်အပံ့ပေးတဲ့ ပညာရပ်တွေလည်းဖြစ်တယ်လို့ ဗဟိုစာရင်းအင်းအဖွဲ့မှ ညွှန်ကြားရေးမှူးချုပ် ဒေါက်တာဝါ၀ါမောင်က ပြောပါတယ်။ပြည်သူ့ရေးရာစီမံခန့်ခွဲမှု ပညာဘွဲ့လွန်ဒီပလိုမာ နှင့် စာရင်းအင်းပညာဘွဲ့လွန်ဒီပလိုမာ သင်တန်းဖွင့်ပွဲအခမ်းအနားကို ဒီဇင်ဘာလ ၁၉ရက်က နေပြည်တော် မှာရှိတဲ့ အမျိုးသားမှတ်တမ်းများမော်ကွန်းတိုက်ဦးစီးဌာနမှာ ကျင်းပပြုလုပ်ခဲ့ပါတယ်။

စီမံကိန်းနှင့်ဘဏ္ဍာရေးဝန်ကြီးဌာန လက်အောက်ရှိ အုပ်ချုပ်မှုနှင့် ဖွံ့ဖြိူးမှုပညာဘွဲ့လွန်သင်တန်းဌာနနဲ့ မိတ္ထိလာစီးပွားရေးတက္ကသိုလ်တို့ပူးပေါင်းဖွင့်လှစ်တာဖြစ်ပြီး ဒီသင်တန်းကိုသင်တန်းသား (၁၃၁) ဦးက တက်ရောက်မှာဖြစ်တယ်လို့သိရပါတယ်။ ပြည်သူ့ရေးရာစီမံခန့်ခွဲမှု ပညာဘွဲ့လွန်ဒီပလိုမာသင်တန်းက မြန်မာနိုင်ငံမှာ လက်ရှိဆောင်ရွက်နေတဲ့ အုပ်ချုပ်မှုဆိုင်ရာကိစ္စရပ်တွေမှာ လက်တွေ့အသုံးချနိုင်စေဖို့အတွက် သင်ကြားပေးမှာ ဖြစ်ပါတယ်။ ဒါ့အပြင် စာရင်းအင်းပညာဘွဲ့လွန်ဒီပလိုမာ သင်တန်းကတော့ လက်တွေ့အသုံးချနေတဲ့ သက်ဆိုင်ရာစာရင်းအင်းကိစ္စရပ်တွေကို စနစ်တကျလေ့လာနိုင်အောင် သင်ကြားပေးသွားမှာဖြစ်တယ်လို့ သင်တန်းရေးရာ ဌာနမှ ညွှန်ကြားရေးမှူး ဒေါက်တာကျော်ဆန်းက ပြောပါတယ်။အခုဖွင့်လှစ်တဲ့ သင်တန်းကို  အပတ်စဉ် တနင်္လာနေ့မှသောကြာနေ့အထိ  ညနေ ၅ နာရီခွဲမှ ည ၇နာရီခွဲအထိ သင်ကြားပေးသွားမှာဖြစ်ပါတယ်။ ဒါ့အပြင် ယခုသင်တန်းတွေကနေ သင်တန်းဆင်းဘွဲ့လွန်ဒီပလိုမာ လက်မှတ်ရရှိထားသူတွေအတွက်လည်း  မာစတာဒီဂရီတွေအထိပါ တက်ရောက်ခွင့်ရှိအောင် စီစဉ်ဆောင်ရွက်သွားမယ်လို့လည်းသိရပါတယ်။

 

 

Related News