အခြေခံပညာကျောင်းတွေမှာ နို့တိုက်ကျွေးခြင်းလုပ်ငန်းစဉ်အတွက် နိုင်ငံတော်အစိုးရမှ သီးသန့်ရန်ပုံ ငွေချထားပေးရန် အစီအစဉ်မရှိကြောင်းကို စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန ဒုတိယ၀န်ကြီး ဦးလှကျော်က မေလ (၃၀)ရက်က နေပြည်တော်ရှိ ဒုတိယအကြိမ် ပြည်သူ့လွှတ်တော် (၁၂) ကြိမ်မြောက် ပုံမှန်အစည်းအဝေးမှာ ပြောကြားခဲ့ပါတယ်။

အခြေခံပညာကျောင်းများတွင် နို့တိုက်ကျွေးခြင်းလုပ်ငန်း ပိုမိုထိရောက်အောင်မြင်၍ ရာနှုန်းပြည့်ဖော် ဆောင်သွားနိုင်ရန် နိုင်ငံတော်အစိုးရမှ မည်သို့ဆက်လက်ကူညီပံ့ပိုးပေးမည်နှင့် ယင်းလုပ်ငန်းစဉ်အတွက် သီးသန့်ရန်ပုံငွေချထားပေးရန် အစီအစဉ်ရှိ၊ မရှိနှင့် စပ်လျဉ်းသည့် ကြယ်ပွင့်ပြမေးခွန်းကို မောက်မယ်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးစိုင်းငေါင်းဆိုင်ဟိန်းက မေးမြန်းခဲ့တာပါ။ အဆိုပါ မေးခွန်းနဲ့ပတ်သက်ပြီး ဒုတိယ၀န်ကြီး ဦးလှကျော်က အခြေခံပညာကျောင်းတွေမှာ နို့တိုက်ကျွေးခြင်းလုပ်ငန်းကို ပိုမိုထိရောက်အောင် မြင်ဖို့အတွက် ရာနှုန်းပြည့် ဖော်ဆောင်သွားနိုင်ရေးလုပ်ငန်းဟာ ကြီးမားကျယ်ပြန့်တဲ့ လုပ်ငန်းစဉ်ဖြစ်တယ်လို့ သိရပါတယ်။ ဒါ့အပြင် မိမိတို့နိုင်ငံရဲ့ ဘဏ္ဍာငွေကျခံ သုံးစွဲဆောင်ရွက်နိုင်မှုဟာ အကန့်အသတ်တွေရှိနေပြီး အဆိုပါလုပ်ငန်းဟာ ကုန်ကျစရိတ် ပမာဏ များလွန်းတဲ့အတွက် သီးသန့်ရန်ပုံငွေဖြင့် ဆောင်ရွက်ပေးနိုင်ခြင်း မရှိကြောင်း ပြောကြားခဲ့ပါတယ်။

အသက်အရွယ်အလိုက် မူလတန်းအဆင့် ကျောင်းသားကျောင်းသူတစ်ဦး တစ်နေ့သောက်သုံးသင့် သော နွားနို့ပမာဏမှာ ပျမ်းမျှ (၆၆၀) မီလီလီတာနှုန်း ဖြစ်ပါတယ်။ လက်ရှိအချိန်မှာ မွေးမြူရေးနှင့် ကုသရေး ဦးစီးဌာန၊ ကုမ္ပဏီတွေနဲ့ အလှူရှင်တွေက တိုက်ကျွေးနေတယ်လို့ သိရပါတယ်။ လက်ရှိတိုက်ကျွေးနေတဲ့ နွားနို့ ပမာဏဟာ မူလတန်းအဆင့် ကျောင်းသားကျောင်းသူ တစ်ဦးအတွက် တစ်နေ့လျှင် (၂၅၀) မီလီလီတာ ခန့်မှန်း ၄၀၀ကျပ်နှုန်းရှိတယ်လို့ သိရပါတယ်။မေးခွန်းမေးမြန်းခဲ့တဲ့ ပြည်သူ့လွှတ်တော်ကိုယ်စားလှယ် ဦးစိုင်းငေါင်းဆိုင်ဟိန်းက ကျောင်းနေအရွယ် ကလေးတွေကို နို့တိုက်ကျွေးခြင်းအားဖြင့် ကျန်းမာကြံ့ခိုင်တဲ့ ညဏ်ရည်မြင့်မားဖွံ့ဖြိုးသော လူငယ်လူရွယ်များ ပေါ်ထွန်းလာနိုင်စေတာကြောင့် အခုလိုမေးမြန်းခဲ့တာလို့ ပြောပါတယ်။

မူလတန်း ကျောင်းသားကျောင်းသူတစ်ဦးမှာ လက်ရှိတိုက်ကျွေးနေတဲ့ နွားနို့ (၂၅၀) မီလီလီတာ၊ တန်ဘိုး ၄၀၀ ကျပ်နှုန်းနဲ့ ကျောင်းဖွင့်ရက်တွေမှာ တိုက်ကျွေးပါက မူလတန်းကျောင်းသား ကျောင်းသူဦးရေပေါင်း သိန်းငါးဆယ်နီးပါးအတွက် ပညာသင်နှစ်တစ်နှစ်လျှင် စုစုပေါင်း ကျပ်ဘီလီယံ (၃၆၀) ခန့် ကုန်ကျမှာ ဖြစ်တယ်လို့ ပြောပါတယ်။

 

 

Related News