ယခင်က ပေးဆောင်ထားခြင်းမရှိတဲ့ ငါးမွေးကန်လိုင်စင်အကြွေးဟောင်းတွေကို ဆပ်ပြီးမှသာ ငါးမွေးကန်ဆက်လက် လုပ်ကိုင်ဖို့အတွက် ဒဏ်ကြေးသုံးသောင်း ပေးဆောင်တာကို လက်ခံမှာဖြစ်တယ်လို့ ရန်ကုန်တိုင်းဒေသကြီး၊ ငါးလုပ်ငန်းဦးစီးဌာနမှ ဒုတိယညွှန်ကြားရေးမှူးက ပြောပါတယ်။တရားဝင်ခွင့်ပြုမိန့်မရရှိထားတဲ့ ငါးမွေးမြူရေးကန်တွေကို ဒဏ်ကြေးသုံးသောင်း ပေးဆောင်ပြီး ဆက်လက်လုပ်ကိုင်ခွင့်ပေးဖို့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနနဲ့ မြန်မာနိုင်ငံငါးလုပ်ငန်းအဖွဲ့ချုပ်တို့ ညှိနှိုင်းနေဆဲဖြစ်ပါတယ်။ ဒါပေမဲ့ ဒဏ်ကြေးမဆောင်ခင် ယခင်က မပေးဆောင်ရသေးတဲ့ ငါးမွေးကန်လိုင်စင် အကြွေးတွေကို ဆပ်ဖို့လိုတယ်လို့သိရပါတယ်။

ငါးမွေးကန်လိုင်စင်ကတော့ တစ်ဧကကို တစ်နှစ်လျှင် ကျပ်သုံးထောင် ပေးဆောင်ရတာဖြစ်ပြီး ပုံမှန်လာရောက် ပေးဆောင်ထားခြင်းမရှိတဲ့ ငါးမွေးမြူရေးလုပ်ငန်းရှင်တွေကြောင့် လွန်ခဲ့တဲ့ ဆယ်နှစ်ကတည်းကနေ ယခုအချိန်ထိ ရန်ကုန်တိုင်းငါးလုပ်ငန်းဦးစီးဌာနမှာ ငါးမွေးကန်လိုင်စင်အကြွေး ကျပ်သိန်း ၁၅၀၀ ကျော် ရှိနေပါတယ်။ ဒါကြောင့် ငါးမွေးကန်တွေ ဆက်လက်လုပ်ကိုင်ခွင့်ရဖို့ လိုင်စင်အကြွေးတွေ လာရောက်ပေးဆောင်ရမယ်လို့ ရန်ကုန်တိုင်းဒေသကြီး၊ ငါးလုပ်ငန်းဦးစီးဌာနမှ ဒုတိယညွှန်ကြားရေးမှူးက ပြောပါတယ်။မြန်မာနိုင်ငံငါးလုပ်ငန်းဦးစီးဌာနမှ ရရှိထားတဲ့ အချက်အလက်တွေအရ တစ်နိုင်ငံလုံးမှာ ငါးမွေးမြူရေးကန် ဧက လေးသိန်းကိုးသောင်းကျော်ရှိတဲ့အနက် ဧက တစ်သိန်းနှစ်သောင်းကျော်သာ လယ်ယာမြေကို အခြားနည်းဖြင့်အသုံးချခွင့် (လန/၃၀) ရရှိထားပြီး ကျန်ရှိနေတဲ့ ငါးမွေးမြူရေးကန်တွေက (လန/၃၀) ရရှိထားခြင်းမရှိပါဘူး။ အဲ့ဒီ (လန/၃၀) မရထားတဲ့ ငါးမွေးကန်တွေကို အချို့တိုင်းဒေသကြီးနဲ့ပြည်နယ်တွေမှာ ဒဏ်ကြေးအနေနဲ့ တစ်ဧကကို ကျပ်တစ်သိန်းကောက်ခံမှုတွေရှိနေပါတယ်။

အဆိုပါ ပမာဏက ငါးမွေးမြူရေးလုပ်ငန်းရှင်တွေအတွက် အခက်အခဲဖြစ်နေတာကြောင့် ဒဏ်ကြေးကျပ်သုံးသောင်းပေးဆောင်ပြီး ငါးကန်ဆက်လက်လုပ်ကိုင်ခွင့်ရဖို့ ဆွေးနွေးနေကြတာပဲဖြစ်ပါတယ်။ငါးမွေးကန်ဆက်လက်လုပ်ကိုင်ခွင့်ရလိုတဲ့ ငါးမွေးမြူရေးလုပ်ငန်းရှင်တွေအနေနဲ့ ငါးမွေးကန် လိုင်စင်အကြွေးကို ပေးဆောင်လိုပါက သက်ဆိုင်ရာ မြို့နယ်ငါးလုပ်ငန်းဦးစီးဌာနတွေမှာ သွားရောက်စုံစမ်း၊ ပေးဆောင်နိုင်တယ်လို့သိရပါတယ်။ ငါးမွေးကန်လိုင်စင်အကြွေးတွေ ပေးဆောင်ခြင်းမရှိပါက ဆင့်ခေါ်စာနဲ့ အရင်ဆုံးသတိပေးပြီး လိုက်နာဆောင်ရွက်ခြင်းမရှိရင် အကြွေးမပေးဆောင်တဲ့ကန်တွေကို တရားစွဲတဲ့အထိ အရေးယူနိုင်တယ်လို့သိရပါတယ်။

 

 

Related News