စီမံကိန်းနှင့်ဘဏ္ဍာရေးဝန်ကြီးဌာနကတော့ အာမခံကဏ္ဍပိုမိုဖွံ့ဖြိုးလာဖို့ ၂၀၁၉ခုနှစ် ဇန်န၀ါရီလ(၂)ရက်မှာ နိုင်ငံခြားအာမခံကုမ္ပဏီတွေကို ပြည်တွင်းမှာလုပ်ကိုင်ခွင့် စတင်ခွင့်ပြုလိုက်တာဖြစ်ပြီး အသက်အာမခံနဲ့ အထွေထွေအာမခံအတွက် ခွင့်ပြုခဲ့တာဖြစ်ပါတယ်။ အသက်အာမခံအတွက်ကတော့ နိုင်ငံခြားကုမ္ပဏီ(၃)ခုကို ရာနှုန်းပြည့် လုပ်ကိုင်ခွင့်ပေးမှာဖြစ်ပြီး ပြည်တွင်းမှာ ကိုယ်စားလှယ်ရုံးဖွင့်ထားတဲ့ နိုင်ငံခြားအာမခံကုမ္ပဏီတွေအနေနဲ့လည်း ပြည်တွင်းအာမခံကုမ္ပဏီတွေနဲ့ ဖက်စပ်လုပ်ကိုင်ခွင့်ရှိ မှာဖြစ်ပါတယ်။

အထွေထွေ အာမခံအတွက်ကတော့ ပြည်တွင်းမှာ ကိုယ်စားလှယ်ရုံးဖွင့်ထားတဲ့ နိုင်ငံခြားအာမခံကုမ္ပဏီတွေကိုသာ ပြည်တွင်းအာမခံကုမ္ပဏီတွေနဲ့ ဖက်စပ်လုပ်ကိုင်ခွင့်ပြုမှာဖြစ်ပါတယ်။ နိုင်ငံခြားအာမခံကုမ္ပဏီတွေကိုတော့ ၂၀၁၃ခုနှစ်ကစပြီး ပြည်တွင်းမှာ ကိုယ်စားလှယ်ရုံးသာ ဖွင့်ခွင့်ပေးထားတာဖြစ်ပြီး လက်ရှိအချိန်မှာ ၀န်ဆောင်မှုပေးဖို့ စတင်ခွင့်ပြုလိုက်တာဖြစ်ပါတယ်။ နိုင်ငံခြားအာမခံကုမ္ပဏီတွေအနေနဲ့ အခုဘဏ္ဍာနှစ်အတွင်း စတင်လုပ်ကိုင်ခွင့်ရမှာဖြစ်ပြီး လပိုင်းအတွင်း လုပ်ငန်းအဆိုပြုလွှာတွေတောင်းခံဖို့ ရှိနေတယ်လို့ သိရပါတယ်။

မြန်မာနိုင်ငံမှာ အာမခံလုပ်ငန်းကို(၁၉၅၂)ခုနှစ်ကစပြီး နိုင်ငံပိုင်လုပ်ငန်းအနေနဲ့ စတင်ဝန်ဆောင်မှုပေးခဲ့တာဖြစ်ပါတယ်။ ၁၉၉၆ ခုနှစ်မှာ ပြဋ္ဌာန်းခဲ့တဲ့ အာမခံလုပ်ငန်းလုပ်ကိုင်ခွင့်ဥပဒေအရ ၂၀၁၃ခုနှစ်မှာ ပုဂ္ဂလိကကဏ္ဍကို စတင်လုပ်ကိုင်ခွင့်ပေးတဲ့အနေနဲ့ နိုင်ငံသားလုပ်ငန်း(၁၁)ခုကို စတင်ခွင့်ပြုခဲ့ပြီး နိုင်ငံခြားကုမ္ပဏီတွေကိုလည်း ကိုယ်စားလှယ်ရုံး ဖွင့်ခွင့်ပေးခဲ့ပါတယ်။ လက်ရှိအာမခံကဏ္ဍမှာ ပြည်တွင်းပုဂ္ဂလိကအာမခံလုပ်ငန်း(၁၁)ခုက ရုံးခွဲပေါင်း(၆၀)ကျော်နဲ့ ပြည်ပအာမခံ လုပ်ငန်းတွေရဲ့ ကိုယ်စားလှယ်ရုံး(၃၀)ကျော်ရှိနေပြီဖြစ်ပါတယ်။ မြန်မာ့အာမခံလုပ်ငန်းကတော့ အာမခံအမျိုးအစားပေါင်း(၂၉)မျိုးကို ၀န်ဆောင်မှုပေးနေပြီး ပုဂ္ဂလိကအာမခံတွေကတော့ အမျိုးအစား(၁၅)မျိုးလောက်ကို ၀န်ဆောင်မှုပေးနေတယ်လို့သိရပါ တယ်။

အာမခံကဏ္ဍမှာ ပြည်တွင်းကုမ္ပဏီတွေကိုလည်း လုပ်ကိုင်ခွင့်ပြုတာနောက်ကျခဲ့တဲ့အတွက် ပြည်ပကုမ္ပဏီတွေဝင်ရောက်လာတာကိုလည်း အချိန်စောတယ်လို့မယူဆကြောင်းနဲ့ ဒါပေမယ့် ၁၀၀ရာခိုင်နှုန်းထက် တဆင့်ပြီး တဆင့် ခွင့်ပြုသင့်တယ်လို့ CB Insurance မှ ဦးသောင်းဟန်ကပြောပါ တယ်။အောက်စဖို့ဒ် စီးပွားရေးအုပ်စုရဲ့ သုံးသပ်ချက်အစီရင်ခံစာမှာတော့ မြန်မာနိုင်ငံလူဦးရေရဲ့ ၀.၈ ရာခိုင်နှုန်း လောက်ကသာ အာမခံထားရှိထားကြပြီး အသက်အာမခံထားရှိသူက လူဦးရေရဲ့ ၀.၀၁ရာခိုင်နှုန်းနဲ့ အထွေထွေအာမခံထားရှိသူက ၀.၇ ရာခိုင်နှုန်းသာ ရှိတယ်လို့သိရပါတယ်။

 

 

Related News