(၂၀၁၆) ခုနှစ်ကစပြီး ငါးတန်ငါးဟာ ကမ္ဘာ့ဈေးကွက်တန်းဝင် အဖြစ် ဈေးကောင်းရလာတာကြောင့် မြန်မာနိုင်ငံ ငါးလုပ်ငန်းအဖွဲ့ချုပ်က မွေးမြူရေး တောင်သူတွေကို ငါးတန်တိုးချဲ့ မွေးမြူဖို့တိုက်တွန်းခဲ့ပါတယ်။ငါးတန်က မွေးမြူရေးကာလတိုပြီး ရောဂါကျရောက်မှုဒဏ် ခံနိုင်ရည်ရှိသလို ပြည်ပဈေးကွက်ရှိပြီးသား ငါးမျိုးလည်း ဖြစ်ပါတယ်။

 ဒါ့အပြင် တရုတ်၊ ဂျပန်၊ အမေရိကန်နဲ့ဥရောပနိုင်ငံတွေကနေ ငါးတန် အဝယ်များလာတာကြောင့် ငါးတန်ငါးဟာ ပြီးခဲ့တဲ့ နှစ်နှစ်လာက်ကစပြီး ကမ္ဘာ့ဈေးကွက်တန်းဝင် ငါးဖြစ် ဈေးကောင်းရလာတာပါ။ဒါကြောင့် ဈေးကောင်းရတဲ့ ငါးတန်ကို မိရိုးဖလာမွေးမြူနေတဲ့ ငါးမြစ်ချင်း၊ ငါးမုတ်စတဲ့ နေရာတွေမှာအစာထိုး ပြောင်းလဲမွေးမြူဖို့အချိန်တန်ပြီဖြစ်တယ်လို့သိရပါတယ်။ မြန်မာ့ငါးတန်နှင့် ယနေ့ခေတ်ဆိုပြီး ငါးတန်အကြောင်း နှီးနှောဖလှယ်ပွဲကို အောက်တိုဘာ (၁၉) ရက်က မြန်မာနိုင်ငံငါးလုပ်ငန်းအဖွဲ့ချုပ်ရုံးမှာ ပြုလုပ်ခဲ့ပါတယ်။ အဆိုပါပွဲမှာ ငါးတန်တိုးချဲ့မွေးမြူဖို့ မြန်မာနိုင်ငံ ငါးလုပ်ငန်းအဖွဲ့ချုပ်နဲ့ အစာတောင့်ကုမ္ပဏီတွေက တက်ရောက်လာတဲ့ မွေးမြူရေး တောင်သူတွေကို တိုက်တွန်းခဲ့တာပါ။

ငါးတန်ကို မြန်မာနိုင်ငံမှာ မွေးမြူနေတာကြာပြီဖြစ်ပေမဲ့ ပြည်ပတင်ပို့လို့ရတဲ့ ပမာဏအထိတော့ မွေးမြူနေတာမျိုးမရှိသေးပါဘူး ။ ဒါကြောင့် ပြည်ပတင်ပို့ချင်လို့ငါးတန်ကို မွေးတော့မယ်ဆိုရင် ငါးသားပေါက် ထုတ်လုပ်တာကနေ နည်းပညာပိုင်းဆိုင်ရာ လိုအပ်ချက်တွေရှိနေသေးတယ်လို့သိရပါတယ်။။ နည်းပညာလိုအပ်ချက်တွေကို ဖြည့်စွက်နိုင်ဖို့ငါးတန်အကြောင်း နှီးနှောဖလှယ်ပွဲမှာ တရုတ်နိုင်ငံ Nutriera ရေသတ္တဝါ အစာနဲ့ မွေးမြူရေးဆိုင်ရာ နည်းပညာ ကုမ္ပဏီက ငါးတန်အကြောင်းတွေကို မွေးမြူရေးတောင်သူတွေထံ မျှဝေပေးခဲ့တာပဲဖြစ်ပါတယ်။

မြန်မာနိုင်ငံငါးလုပ်ငန်းအဖွဲ့ချုပ်ကလည်း ငါးတန်သီးသန့်မွေးမြူမယ့် ဧက တစ်ရာစီမံကိန်းကို ဧရာဝတီတိုင်းဒေသကြီး၊ ပန်းတနော်မြို့နယ်မှာ ဆောင်ရွက်နေပါတယ်။ ယခု အောက်တိုဘာလကုန်တာနဲ့ဧကတစ်ရာစီမံကိန်းမှာ ရှယ်ယာထည့်ဝင်လိုသူတွေကိုလက်ခံသွားမှာဖြစ်ပြီးကျပ်ငွေ(၂၅)ဘီလံယံအသုံးပြုကာစီမံကိန်းကိုအကောင်အထည်ဖော်သွားမယ်လို့သိရပါတယ်။

 

 

Related News