ဧရာဝတီတိုင်းဒေသကြီး၊ ပန်းတနော်မြို့နယ်မှာ မြန်မာနိုင်ငံငါးလုပ်ငန်းအဖွဲ့ချုပ်ရဲ့ စီမံမှုနဲ့ ဧကတစ်ရာငါးမွေးမြူရေးကန်စီမံကိန်းကို ယခုနှစ်အတွင်း ဖော်ဆောင်သွားမယ်လို့မြန်မာနိုင်ငံ ငါးလုပ်ငန်းအဖွဲ့ချုပ်ရဲ့ ဒုတိယဥက္ကဌ ဒေါ်တိုးနန္ဒာတင်က ပြောပါတယ်။ဒီစီမံကိန်းကို မြန်မာနိုင်ငံငါးလုပ်ငန်းအဖွဲ့ချုပ်က စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနထံ တင်ပြထားပြီး ဧရာဝတီတိုင်းဒေသကြီး၊ ပန်းတနော်မြို့နယ်မှာ ငါးတန်တွေကို ဧကတစ်ရာမွေးမြူမယ်လို့ သိရပါတယ်။

စီမံကိန်းဖြစ်မြောက်ရေးအတွက် မြန်မာနိုင်ငံ ငါးလုပ်ငန်းအဖွဲ့ချုပ်က ကျပ်ငွေဘီလီယံ ၂၀ ထည့်ဝင်ဖို့လျာထားပြီး ရှယ်ယာပါဝင်လိုတဲ့  လုပ်ငန်းရှင်ဦးရေ ငါးဆယ်ဖိတ်ခေါ်ထားပါတယ်။ ရှယ်ယာထည့်ဝင်လိုတဲ့ သူတွေအနေနဲ့ အောက်တိုဘာလကုန်ကစတင်ပြီး တစ်ဦးလျှင် ကျပ်သိန်းတစ်ထောင် ထည့်ဝင်နိုင်ကြောင်း ဒါမှမဟုတ် ငါးယောက်တစ်ဖွဲ့ကို ကျပ်သိန်းတစ်ထောင်နဲ့ ရှယ်ယာဝင်နိုင်တယ်လို့ ဒေါ်တိုးနန္ဒာတင်ကပြောပါတယ်။

ဧကတစ်ရာ ငါးမွေးမြူရေးကန်စီမံကိန်းမှာ မြန်မာနိုင်ငံငါးလုပ်ငန်းအဖွဲ့ချုပ်ရဲ့ ငါးသားပေါက်စခန်းက Pangasius hypophthalmus (ပန်ဂတ်ဆီးယပ် ဟစ်ပိုသာမက်စ်)ငါးတန်တွေကို မွေးမြူမှာ ဖြစ်ပါတယ်။ အဲ့ဒီ ငါးတန်မျိုးစိတ်က ရောဂါဒဏ်ခံနိုင်ရည်ရှိပြီး မွေးမြူရေးသက်တမ်းတိုတဲ့အပြင် ပြည်ပတင်ပို့ဖို့ ဈေးကွက်ရှိပြီးသား ငါးဖြစ်တယ်လို့ သိရပါတယ်။အဆိုပါ စီမံကိန်းအတွက် အစိုးရဘက်ကလည်း ကျပ်ငွေ ၂၀ ဘီလီယံ ကူညီပေးမှာဖြစ်ပြီး မြန်မာနိုင်ငံငါးလုပ်ငန်းအဖွဲ့ချုပ်နဲ့ စပ်တူလုပ်ကိုင်တဲ့ ပထမဆုံး မွေးမြူရေးကဏ္ဍ စီမံကိန်းတစ်ခုဖြစ်လာမှာပါ။ 

 

 

 

Related News