စက်တင်ဘာ (၁၈)ရက် မနက်ပိုင်း အခေါက်ရွှေ အဖွင့်ဈေးဟာ  တစ်ကျပ်သားကို (၉)သိန်းကိုးသောင်းကိုးထောင့်ငါးရာကျပ် ရှိနေရာကနေ စက်တင်ဘာ(၁၉)ရက် မနက်မှာတော့ အခေါက်ရွှေအဖွင့်ဈေး (၁)ကျပ်သားကို (၁၀)သိန်းတစ်သောင်းလေးထောင်ကို ရောက်ရှိ လာတာကြောင့် တစ်ရက်အတွင်း ငွေကျပ် တစ်သောင်းငါးထောင်နီးပါးဈေးတက်ခဲ့တာ ဖြစ်ပါတယ်။ပြည်တွင်းအခေါက်ရွှေဈေးက စက်တင်ဘာလ အစပိုင်းက အခေါက်ရွှေတစ်ကျပ်သားကို (၉)သိန်း(၇)သောင်းကျော်ကနေ မြင့်တက်လာခဲ့ရာ လက်ရှိမှာတော့  ပြည်တွင်းဒေါ်လာငွေလဲနှုန်း မြင့်တက်လာမှုနဲ့ အတူ  ပြည်တွင်းအခေါက်ရွှေဈေးဟာ တစ်ကျပ်သားကို  (၁၀)သိန်းကျော်ကို ရောက်ရှိလာခဲ့တာဖြစ်ပါတယ်။ ပုံမှန်အားဖြင့်  ကမ္ဘာ့ရွှေဈေးတက်ရင် ပြည်တွင်းအခေါက်ရွှေဈေးလိုက်တက်ပေမယ့် လက်ရှိမှာတော့ ဒေါ်လာငွေလဲနှုန်းမြင့်တက်လာမှုကြောင့် ပြည်တွင်းအခေါက်ရွှေဈေး တက်လာရတာဖြစ်တယ် လို့ သိရပါတယ်။ 

ပြီးခဲ့တဲ့နှစ်တွေက ပြည်တွင်းရွှေဈေးဟာ စံချိန်တင်မြင့်တက်ခဲ့တာမျိုးမရှိခဲ့ပေမယ့် အခု (၂၀၁၈)ခုနှစ် စက်တင်ဘာ(၁၉) ရက်မှာတော့ ပြည်တွင်းအခေါက်ရွှေဈေးက ကျပ် (၁၀) သိန်းကျော်အထိ စံချိန်တင်မြင့်တက်ခဲ့တာလို့သိရပါတယ်။ အခုလို ပြည်တွင်းရွှေဈေးတက်နေပေမယ့်  စီးပွားရေးလုပ်ငန်းလုပ်ကိုင်သူအချို့တော့ ရွှေကို ၀ယ်ယူစုဆောင်းတာတွေရှိနေပေမယ့် ပွင့်လင်းရာသီလောက်တော့ ရောင်းအားသိပ်မရှိဘူးလို့ ရွှေဆိုင်လုပ်ငန်းရှင်တွေ ထံက သိရပါတယ်။ 
အခေါက်ရွှေတစ်ကျပ်သားကို  စက်တင်ဘာ(၁၉)ရက်နေ့ ညနေအပိတ်ဈေးမှာ   ဆယ်သိန်းနှစ်သောင်းနှစ်ထောင့်ငါးရာ ဖြစ်ပြီး  (၁၅)ပဲရည်တစ်ကျပ်သားကို ကျပ် ကိုးသိန်း(၆)သောင်းလေးထောင်ပေါက်ဈေးရှိနေပါတယ်။

 

 

Related News