ရန်ကုန်မြို့တော်စည်ပင်သာယာနယ်နမိတ်အတွင်း လိုင်စင်မရှိဘဲဖွင့်လှစ်လုပ်ကိုင်နေတဲ့ ဈေးဆိုင်တွေနဲ့ လုပ်ငန်းတွေကို လုပ်ငန်းပိတ်သိမ်းတာ ဒါမှမဟုတ် ရန်ကုန်မြို့တော်စည်ပင်သာယာရေး ကော်မတီကပေးတဲ့ လုပ်ငန်းဆောင်ရွက်ခွင့် လိုင်စင်၊ လက်မှတ်ရရှိတဲ့အထိ တရားစွဲဆိုနေတယ်လို့ ရန်ကုန်မြို့တော်ဝန် ဦးမောင်မောင်စိုးက ပြောကြားလိုက်ပါတယ်။ရန်ကုန်မှာ လက်ရှိလိုင်စင်မရှိဘဲဖွင့်လှစ်ထားတဲ့ အိမ်ဆိုင်ခန်းတွေ၊ အလှပြင်ခန်းတွေ၊ တည်းခိုခန်းတွေ ပိုမိုများပြားလာနေပြီး ဒီဆိုင်ခန်းလိုင်စင်ဝင်ငွေတွေကရရှိမယ့် နိုင်ငံ့ဘဏ္ဍာငွေတွေ ဆုံးရှုံးနေတယ်လို့ လမ်းမတော်မြို့နယ်လွှတ်တော်အမတ် ဒေါ်အေးအေးမာက ပြောပါတယ်။ ဒါ့ကြောင့် နိုင်ငံ့ဘဏ္ဍာငွေတွေပိုမိုရရှိစေရေး အပါအ၀င် လိုင်စင်ပြုလုပ်မယ့်သူတွေအတွက် ရည်ရွယ်ကာ အိမ် ဈေးဆိုင်ခန်းတွေ၊ စားသောက်ဆိုင်တွေ၊ မီနီမားကက်တွေရဲ့ လုပ်ငန်းလိုင်စင်လျှောက်ထားမှုအခြေအနေနဲ့ ပတ်သက်လို့ မေးမြန်းခဲ့တာဖြစ်ပါတယ်။

ဒါဟာ အများပြည်သူသိရှိဖို့လိုအပ်သလို  ၂၀၁၃ ရန်ကုန်မြို့တော်စည်ပင်သာယာရေးဥပဒေအရ မည်သူမဆို  မြို့တော်စည်ပင်နယ်နိမိတ်အတွင်း လုပ်ငန်းတစ်ရပ်ရပ်ကိုဆောင်ရွက်ဖို့အခြားမည်သည့် ခွင့်ပြုမိန့် လိုင်စင်လက်မှတ်တစ်ခုခုရှိစေကာမူ ကော်မတီကထုတ်ပေးထားတဲ့လိုင်စင်မရှိဘဲ လုပ်ငန်း ဆောင်ရွက်ခြင်းမပြုရလို့ ပြဋ္ဌာန်းပါတယ်လက်ရှိကော်မတီရဲ့စီမံရေးရာဌာနကထုတ်ပေးနေပြီးထုတ်ပေးတဲ့လိုင်စင်တစ်ခုခုကိုရရှိပြီးမှ သာဆောင်ရွက်ခွင့်ရှိတယ်လို့ရန်ကုန်မြို့တော်ဝန်ဦးမောင်မောင်စိုးက ပြောကြားပါတယ်။ လိုင်စင်မရှိဘဲဖွင့်ထားတဲ့လုပ်ငန်းတွေကိုတော့ လိုင်စင်လျှောက်ထားဖို့ အကြောင်းကြားတာ၊ ခေါ်ယူသတိပေးဆွေးနွေးတာတွေလုပ်ပေးနေတယ်လို့ပြောပါတယ်။ မလိုက်နာရင်  စည်ပင်သာယာရေးဥပဒေအရ ပထမအကြိမ်တရားစွဲဆိုပြီး ထပ်မံကျူးလွန်ရင် လုပ်ငန်းပိတ်သိမ်းတာ ဒါမှမဟုတ် လိုင်စင်ခွင့်ပြုချက်ရတဲ့အထိ တရားစွဲဆိုနေတယ်လို့လည်းဆိုပါတယ်။

လက်ရှိ ရန်ကုန်စည်ပင်သာယာနယ်နမိတ်အတွင်း ဈေးဆိုင်နဲ့ လုပ်ငန်းလုပ်ဆောင်တာတွေကို အစားအသောက်လိုင်စင်၊ လုပ်ငန်းလိုင်စင်၊ တည်းခိုခန်းလိုင်စင်၊ ဘော်ဒါဆောင်လိုင်စင်၊ ကိုယ်ပိုင်ဈေးလိုင်စင်၊ ယာဉ်နဲ့ လှည့်လည်ရောင်းချခွင့်လိုင်စင်၊ ယာယီဇာတ်ရုံခွင့်ပြုမိန့်လိုင်စင်ဆိုပြီး (၇)မျိုးခွဲခြားကာ ထုတ်ပေးနေတယ်လို့ သိရပါတယ်။ ဘဏ္ဍာရေးနှစ်အလိုက် တစ်နှစ်တစ်ကြိမ် သက်တိုးရပြီး နှစ်အလိုက်လည်း လိုင်စင်ချထားပေးနေပါတယ်။ သက်ဆိုင်ရာဌာနတွေရဲ့ ထောက်ခံချက်တွေ ထပ်မံယူရပြီး၊ အဆောက်အဦးအသစ်ဖြစ်မယ်ဆို ဆောက်လုပ်ခွင့်ပြုမိန့်၊ ပြင်ဆင်ခွင့်ပြု မိန့်တွေ ရယူရတာလည်းဖြစ်ပါတယ်။ လိုင်စင်ထုတ်မပေးခင်ရေဆိုး၊ မိလ္လာ၊ အမှိုက် ဒါတွေကို မြေမြင်ကွင်းဆင်း စစ်ဆေးပြီးတော့မှ ခွင့်ပြုပေးနေတယ်လို့ မြို့တော်ဝန်က ပြောပါတယ်။ ဒီလိုင်စင်(၇)မျိုး ခွင့်ပြုမှုတွေအနေနဲ့ (၂၀၁၈)ခုနှစ် မတ်လ(၃၁)ရက်ထိ အစားအသောက်လိုင်စင်က (၈၄၀၀)ကျော်၊ လုပ်ငန်းလိုင်စင်က (၄၆၀၀၀)ကျော်၊ တည်းခိုခန်းလိုင်စင်က (၄၅၀)ကျော်၊  ဘော်ဒါဆောင်လိုင်စင် (၃၆၀)၊ ကိုယ်ပိုင်ဈေးလိုင်စင်က (၈၀)ကျော်၊ ယာဉ်နဲ့လှည့်လည်ရောင်းချခွင့်လိုင်စင်(၁၇၀)ကျော်၊ ယာယီဇာတ်ရုံလိုင်စင်က(၂၆)ခုဖြစ်ပြီး စုစုပေါင်း (၅၅၀၀၀)ကျော် ခွင့်ပြုပေးထားတယ်လို့သိရပါတယ်။ 

 

 

 

Related News