အခုဘဏ္ဍာနှစ်ဖြစ်တဲ့ ၂၀၁၇ ဧပြီကစပြီး(၂၀၁၈)ခုနှစ် ဖေဖော်ဝါရီလအထိ(၁၁) လတာကာလ အတွင်း ပြည်တွင်းမှာ ရင်းနှီးမြှုပ်နှံမှုတွေအနေနဲ့ နိုင်ငံသားနဲ့ နိုင်ငံခြားရင်းနှီးမြှုပ်နှံမှု စုစုပေါင်း (၆.၇)ဘီလီယံကျော်ရှိတယ်လို့ မြန်မာနိုင်ငံရင်းနှီးမြှုပ်နှံမှုကော်မရှင်က သတင်းထုတ်ပြန်ထားပါတယ်။ 
 
အခု(၂၀၁၇-၂၀၁၈) ဘဏ္ဍာနှစ်ရဲ့ (၁၁)လတာကာလအတွင်း  ပြည်တွင်းမှာ  နိုင်ငံသား ရင်းနှီးမြှုပ်နှံမှုတွေအနေနဲ့ ရင်နှီးမြှုပ်နှံမှုလုပ်ငန်းပေါင်း (၁၀၁)ခုမှာ အမေရိကန်ဒေါ်လာ(၁)ဘီလီယံ နီးပါးရင်းနှီးမြှုပ်နှံထားပါတယ်။ နိုင်ငံခြားရင်းနှီးမြှုပ်နှံမှုက လုပ်ငန်းပေါင်း(၂၀၆)ခုမှာ အမေရိကန်ဒေါ်လာ(၅.၃)ဘီလီယံကျော် ၀င်ရောက်ရင်းနှီးမြှုပ်နှံထားတာလည်း ဖြစ်ပါတယ်။ အရင်နှစ်တွေက ရှိပြီးသားနိုင်ငံသား၊ နိုင်ငံခြားရင်းနှီးမြှုပ်နှံမှုလုပ်ငန်းတွေမှာ အမေရိကန်ဒေါ်လာ သန်း(၉၅၀)နီးပါး ထပ်မံတိုးချဲ့ ရင်းနှီးမြှုပ်နှံထားပြီး အထူးစီးပွားရေးဇုန်ဥပဒေအရ သီလ၀ါ အထူးစီးပွားရေးဇုန်မှာလည်း အမေရိကန်ဒေါ်လာ သန်း(၃၆၀)ကျော် ၀င်ရောက်ထားတယ်လို့ မြန်မာနိုင်ငံ ရင်းနှီးမြှုပ်နှံမှု ကော်မရှင်က သတင်းထုတ်ပြန်ထားပါတယ်။
 
စုစုပေါင်းရင်နှီးမြှုပ်နှံမှုပေါင်း အမေရိကန်ဒေါ်လာ (၆.၇)ဘီလီယံကျော် ရှိတာဖြစ်ပါတယ်။ ဖေဖော်ဝါရီ(၂၇)ရက်က  ပြုလုပ်တဲ့ မြန်မာနိုင်ငံ ရင်းနှီးမြှုပ်နှံမှု ကော်မရှင်အစည်းအဝေးမှာ ခွင့်ပြု၊ အတည်ပြုပေးခဲ့တဲ့ လုပ်ငန်းပေါင်း (၁၇)ခုရှိခဲ့ပြီး အလုပ်အကိုင် အခွင့်အလမ်းပေါင်း (၇၀၀၀)ကျော် ဖန်တီးပေးနိုင်မှာ ဖြစ်တယ်လို့လဲ ပြောပါတယ်။
 
ရင်းနှီးမြုပ်နှံမှုနှုင့်ကုမ္ပဏီများညွှန်ကြားမှုဦးစီးဌာန (DICA)ကတော့ နိုင်ငံခြားရင်းနှီးမြှုပ်နှံမှု ပတ်သက်လို့  ၂၀၁၆ ကနေ ၂၀၂၀အထိ တစ်နှစ် အမေရိကန်ဒေါ်လာ (၆)ဘီလီယံဝင်ရောက်ဖို့ မျှော်မှန်းထားပြီး ခုဘဏ္ဍာနှစ်မှာတော့ မျှော်မှန်းချက်ပြည့်ဖို့ အချိန်တစ်လအလိုမှာ ရင်းနှီးမြှုပ်နှံမှု ပမာဏ အမေရိကန်ဒေါ်လာ သန်း(၃၀၀)ကျော်လိုနေသေးတာလည်းဖြစ်ပါတယ်။  DICA ရဲ့ ရေရှည်မျှော်မှန်းချက်မှာတော့ ၂၀၂၁ ကနေ ၂၀၂၅ အထိ ပြည်တွင်းကို နိုင်ငံခြားရင်းနှီး မြုပ်နှံမှု တစ်နှစ်အမေရိကန်ဒေါ်လာ (၈)ဘီလီယံ ၀င်ရောက်ဖို့နဲ့ ၂၀၂၅ ကနေ ၂၀၃၀ အထိ တစ်နှစ်ကို အမေရိကန်ဒေါ်လာ ၁၁ ဘီလီယံ ၀င်ရောက်နိုင်ဖို့ ခန့်မှန်းထားပါတယ်။
 
 
 

Related News