ယခု ၂၀၁၈ခုနှစ် မတ်လ ၃၁ ရက်မှ စတင်ပြီး ဆော်ဒီအာရေဗျနိုင်ငံက ဗီယက်နမ်နိုင်ငံ ဘင်္ဂလားဒေ့ရ်ှနိုင်ငံ၊  အိန္ဒိယ နိုင်ငံနဲ့ မြန်မာနိုင်ငံတို့မှ ရေချိုပုစွန်နဲ့ ငါးတင်သွင်းမှုကို ယာယီပိတ်ပင် သွားမှာ ဖြစ်တယ်လို့ သိရပါတယ်။
 
မြန်မာနိုင်ငံကနေ ဆော်ဒီနိုင်ငံကို ငါးမြစ်ချင်း အဓိက တင်ပို့နေပြီး ယခုလို တင်သွင်းခွင့် ပိတ်ပင်လိုက်ရင် ရေချိုငါးတင်ပို့မှု  ၁၀ ရာခိုင်နှုန်းကျော် ဆုံးရှုံးနိုင်ခြေရှိတယ်လို့ သိရပါတယ်။ဒါပေမဲ့ ရေထွက်ကုန်ပစ္စည်းတင်ပို့မှုဈေးကွက်ကို ကြီးကြီးမားမားထိခိုက်မှု မရှိနိုင်ပဲ အခြား အရှေ့အလယ်ပိုင်းဒေသနိုင်ငံတွေဖြစ်တဲ့ အီရတ်၊ ကူဝိတ်နဲ့ တခြားနိုင်ငံတွေကို မျှဝေပြီး တင်ပို့နိုင်တယ်လို့ သိရပါတယ်။
 
ဗီယက်နမ်နိုင်ငံရှိ ရေထွက်ကုန် တင်ပို့နေတဲ့ စက်ရုံပေါင်း ၂၄ ရုံကို ဆော်ဒီအာရေဗျနိုင်ငံ FDA  နဲ့ ငါးမွေးမြူရေးလုပ်ငန်း အသင်းအဖွဲ့တို့က ၀င်ရောက်စစ်ဆေးခဲ့ပြီး ကျန်းမာရေးနှင့်သန့်ရှင်းမှု ဆိုင်ရာ စံချိန်စံညွှန်းကိုက်ညီတဲ့ စက်ရုံ ၉ ရုံကိုသာ အတည်ပြုနိုင်ခဲ့တာကြောင့်  ဗီယက်နမ်နိုင်ငံမှ ရေချိုပုစွန်နဲ့ ငါးတွေ ဆော်ဒီနိုင်ငံကို တင်သွင်းနေမှု ယာယီရပ်ဆိုင်းရန် ဆုံးဖြတ်ခဲ့တယ်လို့သိရပါတယ်။ ဒီလို ယာယီရပ်ဆိုင်းတဲ့နေရာမှာ ဗီယက်နမ်အပြင် ဆော်ဒီကို ရေချိုငါးတင်ပို့နေတဲ့ ဘင်္ဂလားဒေ့ရှ်၊ အိန္ဒိယ နဲ့ မြန်မာနိုင်ငံတို့မှ ရေထွက်ပစ္စည်းတင်သွင်းမှုကိုပါ ယာယီရပ်ဆိုင်းလိုက်တယ်လို့ သိရပါတယ်။ 
 
ဆော်ဒီနိုင်ငံကနေ မြန်မာနိုင်ငံမှ ရေချိုငါးနဲ့ပုစွန် တင်သွင်းမှု ယာယီပိတ်ပင်တဲ့ အခြေအနေကို စီးပွားရေးနှင့်ကူးသန်းရောင်းဝယ်ရေး ၀န်ကြီးဌာနရှိ မြန်မာ့ကုန်သွယ်မှုမြှင့်တင်ရေးအဖွဲ့နဲ့ ငါးလုပ်ငန်းဦးစီးဌာနကို တင်ပြထားဆဲဖြစ်ပါတယ်။
 
ယခု ပိတ်ပင်မှုက ယာယီသာဖြစ်ပြီး ဆော်ဒီနိုင်ငံရဲ့ လိုအပ်တဲ့ ကျန်းမာရေးနှင့် သန့်ရှင်းမှုဆိုင်ရာ စံချိန်စံညွှန်းနှင့်အညီ ထုတ်လုပ်မွေးမြူနိုင်ပါက ဆော်ဒီနိုင်ငံက ဈေးကွက် ပြန်ဖွင့်ပေးမယ့် အခြေအနေရှိတယ်လို့ သိရပါတယ်။ ၂၀၁၆ခုနှစ်က ပြည်ပကို ငါးမြစ်ချင်းတင်ပို့နိုင်မှု မက်ထရစ်တန်ချိန် ခြောက်သောင်းနီးပါးရှိပြီး ပြည်ပ၀င်ငွေ အမေရိကန်ဒေါ်လာ ၅၅ သန်းခန့်ရရှိထားပါတယ်။ 
 
 

Related News