မြန်မာ့ပိုးချည်ကဏ္ဍဖွံ့ဖြိုးတိုးတက်ရေးနဲ့ ခိုင်မာသောဈေးကွက် ယှဉ်ပြိုင်မူတွေဖြစ်ပေါ်စေရေးအတွက် ဆွေးနွေးညှိနှိုင်း အဖြေရှာကြဖို့ စိုက်ပျိုးရေးမွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူက တိုက်တွန်းပြောကြားလိုက်ပါတယ်။
 
နေပြည်တော်မှာရှိတဲ့ တော်ဝင်နေပြည်တော်ဟိုတယ်မှာ ဇန်န၀ါရီလ ၉ ရက်က ပြုလုပ်တဲ့ မြန်မာ့ပိုးချည်ကဏ္ဍ ဖွံ့ဖြိုးတိုးတက်ရေးဆိုင်ရာ အလုပ်ရုံဆွေးနွေးပွဲမှာ ပြည်ထောင်စုဝန်ကြီး ဒေါက်တာအောင်သူက အခုလို တိုက်တွန်းပြောကြားခဲ့တာပါ။ 
 
ယခုကျင်းပခဲ့တဲ့ မြန်မာ့ပိုးချည်ကဏ္ဍ ဖွံ့ဖြိုးတိုးတက်ရေးဆိုင်ရာ အလုပ်ရုံဆွေးနွေးပွဲကို ပိုးချည်ပညာရှင်တွေ၊ ပိုးချည်လုပ်ငန်းကို လုပ်ကိုင်နေတဲ့ ပုဂ်္ဂလိကအဖွဲ့အစည်းတွေက တာဝန်ရှိသူတွေ အစိုးရအဖွဲ့ အစည်းတွေက တာဝန်ရှိသူတွေ တက်ရောက်ခဲ့တာကြောင့် မြန်မာ့ပိုးချည်ကဏ္ဍအတွက် အထောက်အကူ ဖြစ်စေကြောင်းပြောကြားခဲ့ပါတယ်။ ပိုးကဏ္ဍဟာ နိုင်ငံလူဦးရေရဲ့လူ ၁၀၀၀၀ မှာ (၃၂ ဒဿမ ၈)ယောက်ကို အလုပ်အကိုင် အခွင့်အလမ်းတွေ ဖန်တီးပေးထားနိုင်ပြီး ပိုးလုပ်ငန်းဟာ စိုက်ပျိုးရေးအခြေခံစက်မှုလုပ်ငန်းဖြစ်တာကြောင့် ပိုးစာစိုက်ပျိုးခြင်း၊ ပိုးမွေးမြူခြင်းနဲ့ ပိုးချည်ထုတ်လုပ်တဲ့ လုပ်ငန်းတွေကို ပြည်သူတွေပိုမိုသိရှိစေဖို့ လုပ်ဆောင်ရမှာဖြစ်ပါတယ်။ ထုတ်လုပ်မှုတွေ တိုးတက်လာအောင် ဆောင်ရွက်ကာ နိုင်ငံတကာအဆင့်မီ အရည်အသွေးပြည့်ဝတဲ့ ဈေးကွက်ဝင် ကုန်ပစ္စည်းတွေ ဖြစ်အောင်လုပ်ဆောင်ဖို့လည်း တိုက်တွန်းခဲ့ပါတယ်။ 
 
  မြန်မာ့ပိုးချည်ကဏ္ဍ ဖွံ့ဖြိုးတိုးတက်ရေးဆိုင်ရာ အလုပ်ရုံဆွေးနွေးပွဲဟာ မြန်မာနိုင်ငံမှာ ပထမဦးဆုံး ကျင်းပတာဖြစ်ပြီး ပိုးမွေးမြူရေးနှင့် ပိုးချည်ထုတ်လုပ်မူ လက်ရှိအခြေအနေ စာတမ်းတွေ၊ ပိုးမွေးမြူရေး ဆောင်ရွက်နိုင်မယ့် အလားအလာစာတမ်းတွေအပါအ၀င် ပိုးချည်ပိုးထည်ထုတ်လုပ်မှု စာတမ်းတွေကို ဖတ်ကြားခဲ့တာပါ။
 
 
 

Related News